Read pokomo Yohana 21 Bible Online

Yohana 21 - pokomo bible

Yohana 21

¹Ḅaad̯aye, Yesu kawat̯upukia wanafund̯iwe geri ya ziwa ḍya Galilaya.[28] Na hivi ndivyo vihendekeyevyo:

²Simioni Pet̯ero, Tomasi eyeakihanwa Mwana mpatsa, Natanaeli jwa mudzi wa Kana wiwo ḍyimbo ḍya Galilaya, pfamodza na wana wa Zebed̯ayo na wanafund̯i wangine wawii, wewa wakaa pfamodza.

³Simioni Pet̯ero kawamba hawa wenziwe, “Mimi nyakwendani kulowani.” Na hawa wenziwe wamwamba, “Naswi hunakuuḅa.” Ndookomu wonse wanjia chomboni kwenda wakalowe. Ela siku zima ntawakugiza kintu.

⁴Huju yunkundu jwa magura jwipfokumpuya, Yesu kasumama geri ya hiḍi ziwa, ela hawa wanafund̯i ntawakumuhambuya kwamba ndiye.

⁵Yesu kawakulisa na kawamba, “Wanangu, ntamudzagiza visembe hat̯a?” Nao wamwambukuya wamwamba, “Moro, ntahudzagiza kintu.”

⁶Yesu kawamba, “Gisani hi nyavu yenu na ḍanda ya mukono kuyume ye chombo nanywi munagiza visembe.” Nao wepfohenda hivi wambiijwevyo, wagiza visembe vinji hat̯a washindwa kuinuha hi nyavu waingize humuḍe chomboni.

⁷Makisa huyuḍe mwanafund̯i jwa Yesu amutsakiyee muno kamwamba Pet̯ero, “Huyu aneneye naswi ni Ḅwana!” Simioni Pet̯ero kudzasikia hivi, kaidzifwecha hi nkanzuye kwa kwamba ndiyo eyovwaa t̯u, na katsumpa humu madzini.

⁸Ao hawa wanafund̯i wangine wasaiyeo humuḍe chomboni, wadza ne chombo wakyenda na kuinuha hi nyavu iyokuwa na visembe t̯ipu. Hapfa wepfowakivuwa pfewa si kuye muno na gubani, pfewa ni chima cha hat̯uwa gana t̯u.

⁹Wepfokwojeka, waona kukozwa moho na kwikikokwa visembe na kwiwa na mukahe.

¹⁰Yesu kawamba, “Yehani hivi visembe vingine mugiziyevyo.”

¹¹D̯ubva Simioni kenda kainuha hi nyavu kaiyavya gubani. Hi nyavu iwa na visembe vikuu vikuu gana na miyongo mitsano na vihahu, ela hat̯a vivyo, ntaikuḅaika-ḅaika.

¹²Kisa Yesu kawamba, “Nzoni mufunguye kanwa.” Hapfo wonse wamuhambuya kwamba ni Ḅwana. Ndookomu ntaku hat̯a mumodza jwao eyekuwa na mume wa kumuuza kwamba jeje ni ga.

¹³Yesu kahwaa hu mukahe na hizi nswi kawagawiya wanafund̯iwe.

¹⁴Hu wiwa ni mweedha wa hahu wa Yesu kuwat̯upukia wanafund̯iwe hangu epfofufuka kuyawa kwa wafu.

¹⁵Wepfofunguya kanwa wakisa, Yesu kamuuza Simioni Pet̯ero kamwamba, “Dze Simioni mwana jwa Yohana, kunitsaka kuwachia awaa?” Pet̯ero kamwambukuya kamwamba, “Ḅwana, wewe mwenye kumanya ya kwamba mimi nikutsaka!” Nae Yesu kamwamba, “Haya, zit̯ikise hizi mbuzi zangu.”

¹⁶Kisa Yesu kamuuza Pet̯ero ḍya pfii kamwamba, “Dze Simioni mwana jwa Yohana, kunitsaka?” Pet̯ero kamwamba, “Ḅwana, wewe mwenye kumanya ya kwamba mimi nikutsaka!” Nae Yesu kamwamba, “Haya, zit̯unze hizi mbuzi zangu.”

¹⁷Makisa Yesu kamuuza Pet̯ero ḍya hahu kamwamba, “Dze Simioni mwana jwa Yohana, kunitsaka?” Pet̯ero kasikia tsungu kwa dzambo ḍya hivi vya Yesu amuuziyevyo mweedha wa hahu kwamba kamutsaka ambu hat̯a. Nae kamwamba, “Ḅwana, wewe kumanya kula kintu. Wewe mwenye kumanya ya kwamba mimi nikutsaka!” D̯ubva nae Yesu kamwamba, “Haya, zit̯ikise mbuzi zangu.

¹⁸Koro hachi nyakukwambiani, wipfokuwa muurani wikidzielekanya na ukenda wikonatsaka wewe mwenye. Ela udzepfojara, kudzagonzowa mikonoyo na muntu yungine kadzakugija akupfiike usikotsaka kwenda.”

¹⁹Yesu kanena hivi kuyanga namuna ya Pet̯ero adzevyofwa, na namuna ye kifoche kidzevyomumpa Muungu kushad̯wa. Kisa Yesu kamwamba Pet̯ero, “Niuḅa.”

²⁰Pet̯ero kakwira nyuma na kamuona huyuḍe mwanafund̯i jwa Yesu eyetsaka muno kakuwauḅani. (Huyu ni huyuḍe mwanafund̯i eyet̯ura na Yesu wepfowakiḍya kaḅila Yesu nkadzagijwa. Ni yuyuḍe amuuziye Yesu kwamba ayu jwa kumuḍawanya ni ga.)

²¹Pet̯ero epfomuona, kamuuza Yesu kamwamba, “Ḅwana, ehe ayu?”

²²Yesu kamwambukuya kamwamba, “Ae ikiwa kwamba nitsaka akae mojo hat̯a nidzepfouja, hayo hayo yakumud̯a na? Wewe niuḅa mimi t̯u!”

²³Ndookomu kuḍabva kuzunguuka uvumi kahi ya hawa wahikiza kwamba, huyuḍe mwanafund̯i nkakwakufwa. Ela sivyo vya Yesu aneneyevyo. Jeje ewa kamba, “Ae ikiwa kwamba nitsaka akae mojo hat̯a nidzepfouja, hayo hayo yakumud̯a na?”

²⁴Huyu ni huyu mwanafund̯i ayaoneye haya mambo na matsoye mwenye na akiyora. Naswi humanya ya kwamba haya aneneyeyo ni ḍugha.

²⁵Kuna na mambo yangine menji ya Yesu ahendeyeyo. Ela t̯ambere yonse ni kworegwa, nat̯ara hat̯a huju lumwengu jwenye ntajundeewa na pfantu pfa kuviweka hivi vyuo vya kwamba vindekworegwa.