Read pokomo Yohana 3 Bible Online

Yohana 3 - pokomo bible

Yohana 3

¹Kwiwa muyongozi mumodza jwa Kiyahud̯i eyeakihanwa Nekod̯emo, eyekuwa muntu jwa kit̯aro cha *Mafarisayo.

²Nsiku modza, kamwendea Yesu nasiku kamwamba, “Mwaalimu, humanya ya kwamba wewe u muntu uhumijwe ni Muungu. Koro t̯ambere Muungu nkakwaa pfamodza nawe, nkundeeweza kuhenda haya mafara ya kumakisa wiyokuhendani.”

³Yesu kamwambukuya kamwamba, “Hachi nyakukwambiani, muntu asidzavyajwa yupfii[7] nkawezi kuunjia Uhaju wa Muungu.”

⁴Nekod̯emo nae kamuuza kamwamba, “Muntu akimaawa muntu mukuu muzima, anawezadze kuvyajwa yupfii? Nkawezi kunjia mahumboni mwa mamajwe avyajwe mweedha wa pfii t̯i!”

⁵Yesu kamwambukuya kamwamba, “Hachi nyakukwambiani, muntu asidzavyajwa kwa njia ya madzi na huyu Ruhu, nkawezi kuunjia Uhaju wa Muungu.

⁶Muntu anavyajwa kimwii ni wavyaziwe, ela anavyajwa kiruhu ni huyu Ruhu.

⁷Nkudzomake kwamba niukwamba muntu ni had̯i avyajwe yupfii.

⁸Huyu Ruhu ndiye eyenahendeza wantu wavyajwe yupfii. Jeje ka dza hi mpepfo. Koro hi mpepfo inabiga kwenda kuḍekwonse ikonatsaka kwenda. Unaisikia t̯u ikwakubigani, ela nkumanye iyawiyeko wala ikokwendani.”

⁹Nekod̯emo kamuuza kamwamba, “Hayo hayo yanawezekanadze?”

¹⁰Yesu kamwambukuya kamwamba, “Wewe mwaalimu muzima jwa Kiisiraeli, nawe haya haya nkuyadzi?

¹¹Hachi nyakukwambiani, swiswi hunanena hayaḍe humanyiyeyo na kusumwiiya hayaḍe huoneyeo na matso, ela nywinywi ntamuvikuḅali.

¹²Ninkwakumwambiani mambo ya humu humu lumwenguni t̯u ntamunihikize, ehe fat̯i ninkimwambia mambo ya mbinguni munanihikizadze?

¹³Ntaku yuḍejwonse endeyee mbinguni lamud̯a huyu *Mwana jwa Ad̯amu, ayawiyee huko huko.

¹⁴Na dza viviḍe vya Musa ailelevyeevyo hiḍe nyoka ya shaḅa hukuḍe yuwandani, ndivyo vyangu mimi Mwana jwa Ad̯amu nidzevyopfatsikwa,

¹⁵ili kula anihikiziye awe na maisha ya kuunga na yuungo.”

¹⁶Koro Muungu kajutsaka lumwengu hat̯a kamuyavya Mwanawe madiani, ili kula amuhikiziye atsekwaara, ela awe na maisha ya kuunga na yuungo.

¹⁷Muungu nkakumuhuma Mwanawe lumwenguni kudzajuhukumu lumwengu, ela kamuhuma kudzajupfonya.

¹⁸Ndookomu kula amuhikiziye nkahukumigwe, ela kula asiyemuhikiza huyo kesakuhukumigwa kwa dzambo kadziza kumuhikiza Mwana madiani jwa Muungu.

¹⁹Hi hukumu yao idza na kwamba: Hu muyanga udza lumwenguni, ela wantu watsaka kiza kuliko muyanga, kwa dzambo ḍya kwamba mahendo yao ni mazuka.

²⁰Koro kula eyenahenda mazuka kaukeva hu muyanga, na nkawezi kuufikia hafufi kwa dzambo ḍya kushooga kwamba haya mahendoye yanamanyikana.

²¹Ela kula eyenahenda yeyo ya hachi anaudziya hu muyanga, ili wantu wapate kuona kwamba haya eyokuhendani ndiyo ya Muungu eyonatsaka.

²²Ḅaad̯aye, Yesu na wanafund̯iwe wanuka na Yerusalemi wenda ḍanda zingine za ḍyimbo ḍya Yud̯aya wendeekowakikaa kwa muḍa. Na hukuḍe, Yesu ekikaa na kut̯opya wantu.

²³Yohana nae ekit̯opya wantu pfantu pfepfo pfakihanwa Ainoni, hafufi na Salemi, koro hapfaḍe pfantu pfewa na madzi menji na wantu wewa wagija kumwendea ili awat̯opye.

²⁴Haya yahendeka kaḅila Yohana nkadzangizwa gerenzani.

²⁵Kudzakujumuka yuḍaat̯o kahi ya Muyahud̯i mumodza na wanafund̯i wa Yohana dzuu ya kudzidheresa kiadha.

²⁶Wanafund̯i wa Yohana wamudzia Yohana wamwamba, “Mwaalimu, huyuḍe muntu wiyekuwa nae hu ḍoombe ye tsana ya Yorod̯ani, huyuḍe wambiye ndiye huyu *Masiya, nae kakut̯opyani wantu! Wantu wonse sasa wakumuhikiani jeje.”

²⁷Yohana kawambukuya kamba, “Muntu nkawezi kuhenda kintu ikiwa kwamba nkakuwezeswa ni Muungu.

²⁸Nywinywi wenye mu mashaahiḍi kwamba, niinena kwamba mimi simi huyu Masiya. Mimi nihumwa kudzamuelekanyia jeje hi njia t̯u.

²⁹Ḅiḅi harusi, muumewe ni huyu ḅwana harusi. Ḅamujwe huyu ḅwana harusi anatsekea kusumama mya amusikiiye huyu ḅwana harusi akwakunenani. Yesu ndiye huyu ḅwana harusi nami ndimi huyu ḅamujwe, ndookomu mimi nina tsekea muno.

³⁰Ni had̯i jeje agije kushad̯wa zaid̯i na zaid̯i, nami nigije kutsowa shad̯u.

³¹Huyu ayawiye kuyawa dzuu ni mukuu kuchia muntu yungine yuḍejwonse. Muntu jwa kuyawa humu lumwenguni ananena mambo ya humu lumwenguni. Ela huyu jwa kuyawa mbinguni ni mukuu kuchia wangine wonse.

³²Jeje anasumwiiya hayaḍe asikiiyeyo na aoneyeyo, ela ntaku eyenahikiza haya eyonanena.

³³Ela hawaḍe wamuhikiziyeo, wakuyangani kwamba Muungu ni muhachi.

³⁴Huyu ahumijwe ni Muungu anasumwiiya vyuuwo vya Muungu, koro Muungu anamumpa Ruhu jwakwe pfasipfo chima.

³⁵Muungu Baba kamutsaka huyu Mwanawe na kamumpa mamulaka dzuu ya kula kintu.

³⁶Kula amuhikiziye huyu Mwana ana maisha ya kuunga na yuungo. Ela kula asiyemut̯ii huyu Mwana, huyo nkawezi kuwa na maisha ya kuunga na yuungo, ishinu hukumu ya Muungu imukaiya.”