Read pokomo Yohana 8 Bible Online

Yohana 8 - pokomo bible

Yohana 8

¹Ela Yesu kanuka kenda Murima wa mihi ya Mizeituni.

²Kisa chamukoche, magura mapfema, kauja kawii hukuḍe Hekaluni. Iyo saa kut̯uut̯aa wantu wenji na wenji, nae kakaa chihako kaḍabva kuwayongweeza.

³Epfoakiyongweeza, hawa waalimu wa *Sharia na *Mafarisayo wadza na muke agijijwe na muumewe muntu. Wamusumamisa usoni ya hi t̯ut̯a,

⁴kisa wamwamba Yesu, “Mwaalimu, huyu muke huyu kagijwa na muyume jwa muntu.

⁵Na kuuḅana na hi Sharia ya Musa, muke dza huyu ni kubigwa na mawe ayagwe. Haya, ehe nawe kwambadze?”

⁶Wamuuza dza hivi ili wapate kumusocha na wapate dzambo ḍya kumusit̯aki naḍyo. Ela Yesu kenama na kaḍabva kwora na ḍowe hapfa mutsangani.

⁷Na wepfohamat̯a na maswali yao, Yesu kasumama wima na kawamba, “Huyuḍe asiye nabvise iḍeyonse kahi yenu, nawe muntu jwa d̯ura jwa kuḍabva kumubiga na mawe huyu muke.”

⁸Kisa kenama kawii na kaḍabva kwora hapfa mutsangani.

⁹Hawa wantu kudzasikia hivi vya Yesu aneneyevyo, waḍabva kunuka mumodza mumodza. Kuḍabva kunuka hawa wantu wakuu nguzi, mumpaka mwiso kuhafa Yesu na huyuḍe muke t̯u.

¹⁰Kisa Yesu kasumama wima na kamwamba huyuḍe muke, “Awa weowakikusit̯aki wendaa? Ntaku hat̯a mumodza asaiye jwa kukuhukumu kwamba u munabvise?”

¹¹Huyuḍe muke kamwambukuya Yesu kamwamba, “Ntaku hat̯a mumodza Ḅwana.” Nae Yesu kamwamba, “Hat̯a nami sikwakukuhukumu. Enda, na manya utsehenda nabvise kawii.”]

¹²Kisa Yesu kanena na hawa wantu kawii kawamba, “Mimi ndimi muyanga wa huju lumwengu. Muntu eyenaniuḅa mimi nkawezi kwenenda kizani meshi, ela anawa na hu muyanga wiwonapfa wantu maisha.”

¹³Hawa Mafarisayo wamwambukuya wamwamba, “Hivi wivyokunenani ntavihikizike, maanaye kwakudziyaviyani ushaahiḍi wewe mwenye.”

¹⁴Yesu kawamba, “Haya niyokunenani nza ḍugha hat̯a ingawa nyakudzishuhuḍiani mimi mwenye. Koro mimi nimanya niyawiyeko na nikokwendani, ela nywinywi haya haya ntamuyadzi.

¹⁵Nywinywi munayayowa mambo kiwanaad̯amu na mukadzinihukumia ḅasi. Ela mimi sikudzia kuhukumu muntu.

¹⁶Na hat̯a ninkitsaka kuhukumu muntu, hukumu yangu inawa ni hukumu ya hachi, kwa kwamba simi mimi heket̯u, ndimi na huyu Baba anihumiye.

¹⁷Hi Sharia yenu iyo yenye yamba kwamba, ikiwa kwamba dzambo ḍiyavijwa ushaahiḍi ni wantu wawii, ḅasi huo ushaahiḍi mbwa kuhikizika.

¹⁸D̯ubva mimi mwenye ndimi huyu shaahiḍi jwa d̯ura, na Baba anihumiye ndiye huyu shaahiḍi jwa pfii.”

¹⁹Hawa Mafarisayo wamuuza wamwamba, “Ayu babajo kaku?” Yesu kawambukuya kawamba, “Nywinywi ntamunidzi mimi wala Baba. T̯ambere mundeewa munimanya mimi kwamba ni gani, mundeewa mumumanya na Baba pia.”

²⁰Yesu kanena haya haya yonse epfoakiyongweeza humuḍe Hekaluni, hafufi na haya masand̯uku ya kuwekea mvuugiya. Ela ntaku muntu amugijiye kwa dzambo ḍya kwamba wakatiwe wiwa ntaudzafika.

²¹Kisa Yesu kanena na hawa wantu kawii kawamba, “Mimi nijwakumuyatsa. Nanywi munanilacha na kunilacha ela munafwa nabvise mwenu. Huku nikokwendani mimi nywinywi ntamuwezi kwenda.”

²²Ndookomu hawa wakuu wa Kiyahud̯i waḍabva kuuzana wao na wao wakyamba, “Munamba ayu muntu anatsaka kudziyaga? Kut̯i kakwambani ekokwendani swiswi ntahuwezi kwenda?”

²³Yesu kawamba, “Nywinywi mu wa huju huju lumwengu, ela mimi sikwaa jwa huju huju lumwengu. Nywinywi muyawa humu humu lumwenguni, ela mimi niyawa mbinguni.

²⁴Ndiyo maana nimwambiiyeyo ya kwamba munafwa nabviseni mwenu. Koro ikiwa kwamba ntamukuhikiza kwamba, ‘Mimi Ndimi,’[16] ḅasi munafwa nabviseni mwenu.”

²⁵Nao wamuuza wamwamba, “Awe munamba u ga?” Yesu kawambukuya kawamba, “Mimi niḍabva kumwambia hangu iiḍe kwamba mimi ni ga!

²⁶Kuna menji niyonaweza kunena dzuu yenu, na kuna menji niyonaweza kumuhukumu nayo. Ela mimi najwambia huju lumwengu hayaḍe nisikiiyeyo kuyawa kwa huyu anihumiye t̯u. Na haya eyonanena jeje nza ḍugha.”

²⁷Ela wao ntawakuimuka ya kwamba Yesu ekinena dzuu ya Babajwe jwa mbinguni.

²⁸D̯ubva Yesu kawamba, “Mimi *Mwana jwa Ad̯amu mudzepfonipfatsika muhini mwa mpatsa, munamanya ya kwamba ndimi haswa! Na munamanya ya kwamba, mimi siwezi kuhenda kiḍechonse kwa uwezo wangu mwenye. Haya niyonanena ni hayaḍe ya Baba aniyongweezeyeyo.

²⁹Na jeje anihumiye ka pfamodza nami, nkadzaniyatsa. Nkadzaniyatsa kwa kwamba mimi meshi nahenda yeyonamutsakiza jeje.”

³⁰Na wantu wenji weomusikia Yesu akinena hivi wamuhikiza.

³¹Kisa Yesu kanena na hawaḍe wantu wamuhikiziyeo kawamba, “Nywinywi mukiyagija haya mayongweezo yangu munawa wanafund̯i wangu wa ḍugha.

³²Munaimanya hi hachi ne hachi nayo inamuweka huru.”

³³Ela wao wamwambukuya wamwamba, “Swiswi hu vit̯ukut̯uku vya Iburahimu. Na ntahudzawa wahumwa wa yuḍejwonse. D̯ubva unakwambadze kwamba hunawekwa huru?”

³⁴Yesu kawambukuya kawamba, “Hachi nyakumwambiani, kula eyenahenda nabvise ni muhumwa jwa nabvise.

³⁵Muhumwa nkat̯aligwe kwamba ni muntu jwa hapfaḍe nyumbani aipfo. Ela mwana jwa muntu ni mwana jwa hapfaḍe nyumbani maishi.

³⁶D̯ubva huyu Mwana akimufunguya akimuweka huru, munawa huru hachi!

³⁷Nimanya ya kwamba nywinywi mu vit̯ukut̯uku vya Iburahimu. Ela nywinywi munatsaka kuniyaga kwa dzambo ḍya kwamba ntamuyat̯aki haya mayongweezo yangu.

³⁸Mimi nyakumwambiani haya ya Baba aniyangiyeyo, ela nywinywi munahenda haya ya baba jwenu amwambiiyeyo.”

³⁹Wao wamwambukuya wamwamba, “Swiswi baba jwehu ni Iburahimu.” Ela Yesu kawamba, “T̯ambere mundeewa mu wana wa Iburahimu ḍugha, mundeewa mu wantu mwiwo dzae.

⁴⁰Mimi nimwambia hi hachi ya Muungu anyambiiyeyo, ela nywinywi munatsaka kuniyaga. T̯ambere ni Iburahimu, jeje nkandehenda dza hivyo.

⁴¹Ela nywinywi munahenda dza hivi vya huyu baba jwenu evyonahenda.” Nao wamwambukuya wamwamba, “Swiswi ntahukwaa wana wa usi. Muungu mwenye ndiye huyu Baba jwehu.”

⁴²Ela Yesu kawamba, “T̯ambere Muungu andeewa ni Baba jwenu ḍugha, nywinywi mundeewa munitsaka, koro mimi nidza hapfa kuyawa kwa Muungu. Sikudziyeha mimi, jeje ndiye anihumiye.

⁴³Nywinywi ntamuimuke hivi nivyokumwambiani, maanaye ntamut̯aki kusikia hivi vyuuwo nivyokumwambiani.

⁴⁴Nywinywi mwa dza huyu baba jwenu Shaat̯ani. Mutsaka kuhenda haya mazuka ya huyu baba jwenu eyonahenda. Jeje Shaat̯ani, ni muyaji hangu ḍabvu na kaikeva hi hachi, koro jeje katsaka nsuwe meshi. Na epfonanena nsuwe anawa kakuyangani hivi aivyo, koro jeje ni munsuwe na ni baba jwa wansuwe.

⁴⁵Ela kwa kwamba mimi nanena hi ya hachi, nywinywi ntamuhikize hivi nivyonanena.

⁴⁶Ni ga kahi yenu eyenaweza kuyanga kwamba mimi nihenda nabvise iḍeyonse? Haya, ninkimaawa kumwambiani hi ya hachi, kut̯i ntamut̯aki kuhikiza hivi nivyokumwambiani?

⁴⁷Yuḍejwonse eye jwa Muungu anasikia vyuuwo vya Muungu. Ela nywinywi ntamukwaa wa Muungu, ndiyo maana mwiyonadziza kusikia hivi vya Muungu evyonanena.”

⁴⁸Hawa wantu wamwambukuya Yesu wamwamba, “Swiswi ntahukutsowea hat̯a hukyamba wewe nkukwaa Muyahud̯i u Musamaria. Wewe una mashaat̯ani.”

⁴⁹Ela Yesu kawamba, “Mimi si mashaat̯ani yaḍeyonse! Mimi nyakumukuzyani Baba, ela nywinywi mwakunitsezeani.

⁵⁰Mimi sikwakudzilachiani kushad̯wa hat̯a, ela kuna eyenatsaka kwamba mimi nishad̯we. Jeje ndiye jwa kuhuna kwamba muhachi ni ga.

⁵¹Hachi nyakumwambiani, kula eyenagija haya mayongweezo yangu nkawezi kufwa meshi!”

⁵²Hawa wantu kudzasikia hivi, wamwamba, “Sasa huhakikisha kaḅisa kwamba una mashaat̯ani. Hat̯a Iburahimu na hawa manabii t̯u wafwa. Awe ndiwe jwa kudzawambe kwamba kula eyenagija haya mayongweezoyo nkawezi kufwa?

⁵³Wewe u mukuu kumuchia bibi jwehu Iburahimu na hawa manabii wafwiyeo? Ambu wewe, unadzihwaa kwamba u ga?”

⁵⁴Yesu kawambukuya kawamba, “T̯ambere nindeewa nyakudzishad̯ani mimi mwenye, huko kudzishad̯a kwangu kundeewa ntaku maana yaḍeyonse. Eyenanishad̯a mimi ni Baba, mwiyenakwamba ni Muungu jwenu

⁵⁵na hali hat̯a ntamumudzi. Ela mimi nimumanya, na nikyamba simudzi nawa kwamba nyakunenani nsuwe dzanywi. Mimi nimumanya ḍugha na namut̯ii.

⁵⁶Bibi jwenu Iburahimu ewa katsekea kwamba njwakuiona nsiku ya kudza kwangu. Nae kaiona na katsekea muno.”

⁵⁷Hawa wantu wamwamba, “Wewe hat̯a myaka miyongo mitsano nkudzafikisa. Unakwambadze kwamba kumuona Iburahimu?”

⁵⁸Nae Yesu kawambukuya kawamba, “Hachi nyakumwambiani, hangu Iburahimu nkadzavyajwa mimi niiwapfo!”[17]

⁵⁹Ipfofika hapfo, waḍabva kuhwaa mawe wamubige wamuyage. Ela Yesu kadzifitsa kisa kayawa humuḍe Hekaluni kagonzowa.