Read pokomo Mahendo 11 Bible Online

Mahendo 11 - pokomo bible

Mahendo 11

¹Hawa *ntumi na wandugu weokuwa ḍyimbo ḍya Yud̯aya, wonse wasikia kwamba wangine wa hawa wantu wa vyeet̯i vingine nao wakipfokea chuuwo cha Muungu.

²Pet̯ero epfokwenda Yerusalemi, hawaḍe wahikiza wa Kiyahud̯i wamualat̯a, wamwamba,

³“Wewe kwenda kukaa na wantu wasiohinywa na hat̯a kunjia kuḍyani nao!”

⁴D̯ubva Pet̯ero kawasumwiiya hangu ḍabvu, hayaḍe yonse yahendekeeyo, kawamba,

⁵“Nsiku modza niwa kuyombani mudzini Yopa, nipfoona nzozi. Niona kintu dza nguo nkuu igijijweyo na mitse mine, ikiwa kususwani kuyawa mbinguni, hat̯a idza hafufi nami.

⁶Niichimiza urembo humuḍe kuzimu na niona waḍondo wa maguu mane, waḍondo weonahambaa na nyuni weonaguuka.

⁷Makisa nisikia idzwi ḍikwakunyambani, ‘Pet̯ero, nuka wima, tsinza hawa waḍondo uḍye.’

⁸Ela mimi nyamba, ‘Hat̯a, Ḅwana! Sidzat̯at̯a meshi kiḍechonse chicho kichafu ambu kisichomala kuḍigwa.’

⁹Hiḍi idzwi ḍinena kawii kuyawa mbinguni ḍyamba, ‘Kiḍechonse cha Muungu adhereseecho, nkudzokihwae dza kintu kisichomala kuḍigwa.’

¹⁰Hivi vihendeka myeedha mihahu. Kisa hichi kintu kihwajwa yuwinguni dzuu.

¹¹Na iyo saa, hapfa nyumbani nipfonikikaa, kwojeka wantu wahahu wahumijweo kwangu kuyawa Kaisaria.

¹²Ruhu Mudheru kanyamba nigijane nao pfasipfo kuḍaḍamaa. Hawa wandugu wohandahu hawa, kuyawa Yopa, nao pia wagijana nami hwenda Kaisaria, na hwonse hwenda hunjia nyumbani mwa Koronelio.

¹³Nae kahusumwiiya namuna aoneyevyo malaika akisumama nyumbani mwakwe na akimwamba, ‘Huma muntu Yopa, ende akamuhane muntu eyenahanwa Simioni Pet̯ero.

¹⁴Kadzanena nawe vyuuwo vidzevyokupfonya wewe na nyumbayo.’

¹⁵Nami nipfoḍabva kunena t̯u, Ruhu Mudheru kawasukia dza viviḍe evyohusukia swiswi nsiku ya d̯ura.

¹⁶Ndipfo nidzepfonikikumbuka hivi vya Ḅwana evyonena, ‘Yohana kat̯opya wantu na madzi, kenge nywinywi munat̯opyegwa na Ruhu Mudheru.’

¹⁷Ikiwa kwamba Muungu kawapfa wantu wa vyeet̯i iiḍe t̯ola ahupfiyeyo swiswi hwipfomuserefat̯a Ḅwana Yesu *Kirist̯o, d̯ubva ami ni ga hat̯a nimukaiye Muungu machingama?”

¹⁸Wepfosikia hivi, wayatsa hizi alano zao na wamushad̯a Muungu wakyamba, “D̯ubva Muungu kawapfa kupfyehuza mama hat̯a na wantu wa vyeet̯i vingine wapate kukaa mojo!”

¹⁹Hawa wahikiza wat̯amisaa kwa dzambo ḍya d̯ina wakuntiyezo ngera ya Sit̯efano epfoyagwa. Wangine wao wenda hat̯a Foinike, kilulu cha Kupuro na Antiokia, wakisumwiiya haya maagu kwa Wayahud̯i t̯u.

²⁰Ela wangine wa hawa wahikiza, wayawiyeo Kupuro na Ukirene, wenda Antiokia na wawasumwiiya na hawa wantu wa vyeet̯i vingine[9] dzuu ya Ḅwana Yesu.

²¹Ḅwana ewa nao, na kit̯aro chikuu cha wantu wahikiza na wamuperukia Ḅwana Yesu.

²²Haya maagu ya hiḍi dzambo yaḍifikia tsanganiko ḍya Yerusalemi. Ndookomu wamuhuma Baranaba ende Antiokia.

²³Epfokwenda akiona hiviḍe vya Muungu awahendeeyevyo mema hawa wantu, katsekea na kawafunda wonse wagije kumuserefat̯a Ḅwana na mojo mumodza.

²⁴Baranaba ewa muntu mwema, adzaiye faro na Ruhu Mudheru. D̯ubva wantu wenji wamuhikiza Ḅwana.

²⁵Makisa Baranaba kenda T̯ariso kumulacha Sauli.

²⁶Epfomuona, kenda nae Antiokia. Nao wowii wakaa na hiḍiḍe tsanganiko kwa mwaka muzima. Na wayongweeza kit̯aro kikuu cha wantu. Hukuḍe Antiokia ndiko kwa d̯ura kwa hawa wamuhikiziyeo Yesu wahanijweko Wakirist̯o.

²⁷Hiziḍe ngera manabii wangine wanuka na Yerusalemi wenda Antiokia.

²⁸Ndookomu, mumodza jwao eyeakihanwa Agabo kasumama, na kwa nguvu za Ruhu Mudheru kayavya unabii kwamba lumwengu yuzima njwakunjia nzaa nkuu si hat̯a kae. (Hii nzaa injia ngera ya uhaju wa Kilaudio.)

²⁹Hawa wahikiza wahuna kwamba kula mumodza jwao ayavye chima awezeecho wawasaiḍie hawa wandugu weowakiishi Yud̯aya.

³⁰D̯ubva wakimaahenda dzavyo, Baranaba na Sauli wapfiika hu ugijo kwa hawa wazee wa tsanganiko ḍya Yerusalemi.