Read pokomo Mahendo 14 Bible Online

Mahendo 14 - pokomo bible

Mahendo 14

¹Paulo na Baranaba wepfokwenda Ikonio, wahenda dza viviḍe wahendeyevyo Antiokia. Wenda wanjia *sunagogini mwa Wayahud̯i. Wasumwiiya urembo, hat̯a kit̯aro chikuu cha Wayahud̯i na wantu wa vyeet̯i vingine nao wahikiza.

²Kenge hawa Wayahud̯i wasiotsaka kuhikiza, wawangiza nsunziirya hawa wantu wa vyeet̯i vingine na wawahendeza wawarejeye hawa wahikiza.

³Hawa *ntumi wakaa hukuḍe kwa muḍa muyeya wakisumwiiya dzuu ya Ḅwana pfasipfo oga. Nae Ḅwana kayanga ya kwamba haya weyowakinena dzuu ya t̯eiye nza ḍugha. Kaviyanga kwa kuwapfa nguvu za kuhenda mambo ya kumakisa na vihambwiizo.

⁴Hawa wantu wa humu mudzini waḅaikana vit̯aro viwii. Wangine wewa ḍanda ya hawa Wayahud̯i na hawa wangine wewa ḍanda ya hawa ntumi.

⁵Makisa wangine wa hawa wantu wa vyeet̯i na Wayahud̯i, pfamodza na wakuu wao, wahuna kuwahendea mambo mazuka hawa ntumi na kuwabiga na mawe.

⁶Hawa ntumi wepfoyamanya haya, wad̯arama wenda Lusitira makisa wenda Dabe, midzi iyokuwa Lukonia. Wenda na nsi iizingiyeyo hi midzi.

⁷Nako wenda wasumwiiya haya *Maagu Mema.

⁸Kwiwa muntu kihewi eyeakikaa Lusitira. Maguuye yemuhinamfa hangu kuvyajwani kwakwe na nkeweza kwenenda.

⁹Huyu muntu ekimupfindiiya Paulo akwakusumwiiyani. Paulo kamuona ya kwamba kahikiza na andeweza kupfonywa. Ndookomu kamud̯eḍea gu humu usoni

¹⁰na kanena nae na idzwi kuu kamwamba, “Sumama wima!” Huyu kihewi katsumpiiya dzuu na kaḍabva kudzyenendea.

¹¹Hi t̯ut̯a ya hawa wantu wepfoona haya ya Paulo ahendeyeyo waḍabva kuḅaa madzwi kwa lugha ya Kilukonia wakyamba, “Hi miungu ihudzia na yuumbo jwa kibenaad̯amu!”

¹²Baranaba wamumpa sari ḍya Ziusi na Paulo wamumpa sari ḍya Hame,[12] kwa kwamba ndiye eyeakinena muno.

¹³Huyu mukohani jwa hekalu ya muungu Ziusi, iyokuwa nze ya hu mudzi, kadza na masanga ya ngombe na malele hat̯a hapfa muḍyangoni. Jeje na hi t̯ut̯a ya hawa wantu wekitsaka kuwayavia mvuugiya hawa ntumi.

¹⁴Baranaba na Paulo wepfoona haya ya hawa wantu weyowakitsaka kuhenda, waziḅaa[13] hizi nguo zao na wad̯aramia humu mwa hi t̯ut̯a wakiḅaa madzwi wakyamba,

¹⁵“Nywinywi wantu, kut̯i mwakuhendani hivi? Naswi hu wanaad̯amu dzanywi! Hudzia kumusumwiiya Maagu Mema, muiyatse hi miungu yenu isiyo maana, mumuperukiye Muungu eye mojo, aumbiye yuwingu na nsi, rukanga na vyonse vivyo kuzimuye.

¹⁶Kae eyatsa kula kyeet̯i kihende dza hiviḍe kitsakievyo.

¹⁷Hat̯a vivyo Muungu nkakuyatsa kudziyanganya na haya mambo mema eyonamuhendea. Anamunyesea mvuya na yuwinguni na kumumpa mavuno ngera za mavuno. Anamumpa chakuḍya na kumungiza tsekea myojoni mwenu.”

¹⁸Hat̯a hawa ntumi wepfonena hivi vyuuwo, ntaviiwa vivodho kuivingira hi t̯ut̯a ya hawa wantu itsewayaviza mvuugiya.

¹⁹Makisa kudza Wayahud̯i wangine kuyawa Antiokia ya ḍyimbo ḍya Pisidia na wangine kuyawa Ikonio. Wawahendeza hawa wantu wawapfyehukie hawa ntumi wowii. D̯ubva wamubiga Paulo na mawe na wamukururya wamuyavya nze ya hu mudzi, wakit̯ara kwamba ewa kamaafwa.

²⁰Ela hawa wahikiza wepfot̯ut̯aa wakimuringa, kanuka wima na kauja humuḍe mudzini. Chamukoche ae na Baranaba wenda Dabe.

²¹Paulo na Baranaba wasumwiiya haya Maagu Mema hukuḍe Dabe, na wantu wenji wahikiza. Wauja Lusitira, makisa wenda Ikonio na Antiokia ya ḍyimbo ḍya Pisidia.

²²Wawangiza mojo hawa wahikiziyeo na kuwafunda waigije muno hi faro yao. Wawamba, “Husidzanjia uhajuni mwa Muungu, ni had̯i hukunte d̯ina nyinji.”

²³Kula tsanganiko waḍitsania wazee wa tsanganiko. Na kwa mayombo na kufunga, wawaweka mikononi mwa Ḅwana wamuhikiziyee.

²⁴Wepfoyawa nsi ya Pisidia, wenda nsi ya Pamufilia,

²⁵wendeekowakisumwiiya haya maagu hukuḍe Paga, na Atalia.

²⁶Wepfonuka na hapfo wanjia chomboni wauja hat̯a Antiokia ya ḍyimbo ḍya Siria, hapfa wepfowekwa mikononi mwa Muungu ni tsanganiko, kwa dzambo ḍya hi kazi wesiyeo kuihenda.

²⁷Wepfofika Antiokia, waḍit̯ut̯aisa tsanganiko ḍyonse pfamodza, na wawasumwiiya hawa wantu hayaḍe yonse ya Muungu ahendeyeyo pfamodza nao, na namuna awapfiyevyo namfasi wantu wa vyeet̯i vingine kuwa wahikiza.

²⁸Hawa ntumi wakaa hapfaḍe pfamodza na hawa wahikiza kwa kit̯emo kiyeya.