Read pokomo Mahendo 15 Bible Online

Mahendo 15 - pokomo bible

Mahendo 15

¹Kenge wantu wangine wayawiyeo Yud̯aya wadza Antiokia waḍabva kuwayongweeza hawa wandugu wamba, “Mukitsahinywa dza vya *Sharia ya Musa imumalievyo, ntamut̯oweza kupfonywa.”

²Paulo na Baranaba waḍaat̯iana nao vyumuni dzuu ya hiḍi dzambo. Ndookomu ihunikana kwamba Paulo na Baranaba pfamodza na wantu wangine wa hiḍi tsanganiko ḍya Antiokia, wende Yerusalemi wakaḍikaiye chihako hiḍi dzambo na hawa *ntumi na wazee.

³D̯ubva tsanganiko ḍiwagonzoza. Na wepfowakichia na Foinike na Samaria wawapfa maagu hawa wantu dzuu ya namuna ya hawa wantu wa vyeet̯i vingine wamuhikiziyevyo Muungu. Haya maagu yawapfa tsekea nkuu hawa wandugu wonse.

⁴Wepfofika Yerusalemi, wapfokejwa ni hiḍi tsanganiko, hawa ntumi na hawa wazee. Nao wawasumwiiya hayaḍe yonse ya Muungu ahendeyeyo pfamodza nao.

⁵Ela wangine wa hawa wahikiza weokuwa wa kit̯aro cha *Mafarisayo wasumama, wamba, “Ni had̯i hawa wantu wasiokuwa Wayahud̯i wahinywe na wayongweezwe kuiuḅa Sharia ya Musa.”

⁶Ndookomu hawa ntumi na hawa wazee wadziana pfamodza kuḍikaiya chihako hiḍi dzambo.

⁷Ḅaad̯a ya yuḍaat̯o yuyeya, Pet̯ero kasumama kamba, “Ndugu zangu, mumanya ya kwamba Muungu kanitsana kae kuyawa kahi yenu niwasumwiiye hawa wantu wa vyeet̯i vingine haya *Maagu Mema wapate kuyasikia na kuyahikiza.

⁸Na Muungu, amanyiye myojo ya wantu kayanga matsakoye kwa hawa wantu wa vyeet̯i vingine kwa kuwapfa Ruhu Mudheru dzaswi.

⁹Nkakuyanga ugaragara kahi yehu Wayahud̯i na wantu wa vyeet̯i vingine. Kaidheresa myojo yao kwa dzambo wahikiza.

¹⁰D̯ubva, kut̯i anywi mwakutsakani kumuḍema Muungu kwa kuwapfaza hawa wanafund̯i mizigo ambayo swiswi nolawe wabibi zehu ntawakuiweza?

¹¹Sivyo hat̯a! Huhikiza ya kwamba hunapfonywa dzao ni t̯ei ya Ḅwana Yesu.”

¹²Kit̯aro chonse kiḍunda mya. Wamupfindiiya Baranaba na Paulo wakwakusumwiiyani hivi vihambwiizo na mafara makuu ya Muungu awapfiyeyo kuhenda kahi ya hawa wantu wa vyeet̯i.

¹³Wepfokwisa kunena, Yakobo kaḅaa kanwa kamba, “T̯anisikiiyani wandugu zangu!

¹⁴Simioni kasumwiiya hivi vya Muungu evyowamuud̯amia wantu wa vyeet̯i kwa kutsana wangine wao wawe wantuwe.

¹⁵Hivi vyuuwo vya hawa Manabii viingana ḍa na haya. Dza vya matsoro yaneneyevyo yakyamba,

¹⁶‘Ḅwana kamba, ḅaad̯a ya haya mambo nidzauja, na nausumamisa uhaju wa D̯aud̯i kawii. Nauelekanya na kuumbaka uhajuwe kawii.

¹⁷Ndookomu wantu wangine wonse, wa vyeet̯i vingine vyonse niwahaniyeo kuwa wangu, wadzamulacha Ḅwana.

¹⁸Hivi ndivyo vya Ḅwana aneneyevyo. Jeje aihendeye hi ahad̯i ikimanyikana hangu kae.’ ”

¹⁹Yakobo kongeza kunena kamba, “D̯ubva, ami mat̯aro yangu ni kwamba, nahutsewasumbuwa hawa wantu wa vyeet̯i vingine wamuhikiziyeo Muungu.

²⁰Ishinu, nahuworeye ḅaruwa ya kuwamba wakwiye chakuḍya kiḍechonse kisichomala kuḍigwa kwa dzambo kiyavigwa mvuugiya kwa miungu; watseevunza ukwe, watseeḍya muḍondo ayagijwe kwa kuhuḍwa, na wala kunwa mwazi.

²¹Koro Sharia ya Musa iḍabva kusomwa masunagogini hangu kae kula *Sabato, na hivi aneneyevyo vinakaa vikisumwiijwa kula mudzi.”

²²D̯ubva, hawa ntumi na wazee, pfamodza na tsanganiko ḍyonse, wahuna kutsana wantu kahi yao wa kuwahuma Antiokia pfamodza na Paulo na Baranaba. Ndookomu wamutsana Sila na Yud̯a ahanijwe Barisaba. Hawa wantu wowii wewa wayongozi kahi ya hawa wandugu.

²³Wawahuma na hii ḅaruwa: “Swiswi ndugu zenu ntumi na wazee, humukedhya nto nywinywi wandugu nyonse musiokuwa Wayahud̯i, mwiwokukaani Antiokia, Siria na Kilikia.

²⁴Husikia kwamba mudzijwa ni wantu wangine wa hichi kit̯aro chehu, wadziyeo wakimwambia vyuuwo vimungizievyo chengeo na kuḍanganika. Ela swiswi ntahukuwaḍama kudzahenda dzavyo.

²⁵Ndookomu hudziana pfamodza na hwonse huhuna kutsana wantu wa kuhuma kwenu, wagijane na waḅamu wehu watsakwa, Baranaba na Paulo,

²⁶wadzingiziyeo hat̯arini ya kufwa kwa dzambo ḍya Ḅwana jwehu Yesu *Kirist̯o.

²⁷D̯ubva, hwakumuhumiani Yud̯a na Sila, wadzeomwambia na kanwa haya mambo hwiyokworani.

²⁸Huyu Ruhu Mudheru naswi hwaa chuuwo kimodza cha kutsamupfaza muzigo uḍewonse zaid̯i ya haya mambo muhimu ya kwamba:

²⁹Mutseeḍya chakuḍya kiyavijwecho mvuugiya kwa miungu, mutseeḍya muḍondo ayagijwe kwa kulikidhwa ot̯i, wala namutseenwa mwazi. Na manyani mutsenjia rangani. Munawa muhenda dzambo dzema mukidzikanya na haya mambo. Ikaani naghea.”

³⁰Hawa wantu woone wahumijweo wagonzozwa na Yerusalemi wenda Antiokia, wendeepfowakikit̯ut̯aisa hichi kit̯aro chonse cha wahikiza, wakiwapfa hi ḅaruwa.

³¹Hawa wantu wepfoisoma hi ḅaruwa watsekea, kwa dzambo ḍya hivi vyuuwovye vya kungiza mojo.

³²Yud̯a na Sila, weokuwa manabii, wanena na hawa wandugu kwa muḍa muyeya, wakiwafunda na kuwangiza mojo.

³³Wepfokaa hukuḍe kwa nsiku kachuchu, wagonzozwa ni hawa wandugu wakiwayombeya naghea. Nao wauja hukuḍe kwa hawa wawahumiyeo. [

³⁴Ae Sila kahuna kuhangat̯a pfapfaḍe.][14]

³⁵Paulo na Baranaba wakaa Antiokia kwa muḍa. Wao pfamodza na wantu wangine wenji, wayongweeza na kusumwiiya chuuwo cha Ḅwana.

³⁶Zipfochia nsiku kadha, Paulo kamwamba Baranaba, “Nahuuje hwende hukawad̯oye wandugu zehu kula mudzi hwendeewohukisumwiiya chuuwo cha Ḅwana, huwamanye waivyo.”

³⁷Baranaba etsaka wamuhwae na Yohana ahanijwe Marko.

³⁸Ela Paulo nkakuona urembo wamuhwae, koro hapfaḍe kad̯ura nkakukaa nao hat̯a wese hi kazi yao, ishinu kauja na Pamufilia.

³⁹Ndookomu waḍaat̯iana vyumuni, makisa wat̯ana. Baranaba kamuhwaa Marko, wanjia chomboni wenda Kupuro.

⁴⁰Nae Paulo kamutsana Sila. Na wakimayombejwa t̯ei ya Ḅwana ni hawa wandugu, wagonzowa.

⁴¹Wachia na Siria na Kilikia, wakyenda na kuyangiza nguvu haya matsanganiko.