Read pokomo Mahendo 18 Bible Online

Mahendo 18 - pokomo bible

Mahendo 18

¹Makisa Paulo kanuka na Atene kenda Korint̯o.

²Hukuḍe kenda kat̯ongana na Muyahud̯i avyaijwe Ponto eyenahanwa Akwila. Jeje na mukaziwe Pirisila wewa ndiko kudza kuyawa Ut̯aliano, kwa dzambo ḍya kwamba Kaisari Kilaudio ewa kaamuru kwamba Wayahud̯i wonse wauyawe mudzi wa Rumi.[18] Paulo kendea kuwad̯oya,

³na kakaa na kuhenda kazi nao, koro njiaye ya kupatia kantu iwa ni kuelekanya mahema. Nao pia wewa neyo hiyo kazi.

⁴Kula *Sabato kaḍaat̯iana na hawa wantu humuḍe *sunagogini, akiḍema kuwahendeza hangu Wayahud̯i hat̯a Wayunani waserefat̯e hivi evyoakinena.

⁵Sila na Timoteo wepfokudza kuyawa Makedonia, d̯ubva Paulo kagija kazi ya kusumwiiya chuuwo t̯u, akiwayanga hawa Wayahud̯i ya kwamba Yesu ndiye huyu *Masiya.

⁶Wepfomupfinga na kumwambia vyuuwo vizuka vizuka, Paulo kawambukuya kwa kukukunta ḍukuu ḍya nguoze na kuwamba, “Mukidzamukihukumigwa, ni dzuu yenu! Ami le sialat̯ike. Hangu hi saasambi nawendea wantu wa vyeet̯i vingine.”

⁷Ndookomu kanuka na hapfo kenda kanjia kukaani nyumbani kwa muntu asikwaa Muyahud̯i eyeakihanwa Tito Yust̯o. Huyu ewa ni muntu eyeakimuyomba Muungu. Nyumbaye iwa it̯ura neḍi sunagogi.

⁸Huyu mukuu jwa sunagogi ahanijwe Kirisipo na nyumbaye yonse wamuhikiza Ḅwana. Na wantu wangine wenji wa Korint̯o wakisikia hichi chuuwo, wahikiza na wat̯opyegwa.

⁹Nsiku modza nasiku, Ḅwana kanena na Paulo nzozini kamwamba, “Nkudzoshooge! Gija kusumwiiya pfasipfo kufwa mojo,

¹⁰koro nya pfamodza nawe. Ntaku yuḍejwonse jwa kukuhenda mazuka, koro wantu wenji wa humu mudzini ni wantu wangu.”

¹¹Ndookomu Paulo kakaa Korint̯o kwa mwaka na nusu, akiwayongweeza hawa wantu chuuwo cha Muungu.

¹²Ngera za Galio epfowekwa haju jwa ḍyimbo ḍya Akaya, Wayahud̯i wangine wadziana pfamodza, wamugija Paulo na wamupfiika hukumuni usoni ya huyu haju.

¹³Wamwamba Galio, “Huyu muntu kakuḍemani kuwahendeza hawa wantu wamuyombe Muungu na njia isiyonjiiyana na hi *Sharia yehu!”

¹⁴Paulo epfotsaka kuḅaa kanwa, Galio kawamba hawa Wayahud̯i, “T̯ambere hiḍi ḍindeewa tsowa zuka ambu hendo ḍya uyaji, indeewa hachi kwangu kumusikiiya.

¹⁵Kenge kwa dzambo ḍya kwamba ni yuḍaat̯o jwa vyuuwo na masari na maadha yenu wenye, yaelekanyeni nywinywi. Mimi sit̯oweza kuwa muhukumu jwa mambo dza hayo!”

¹⁶Ndookomu kawamba wanuke na hapfa pfantu pfa hukumu.

¹⁷Wonse wamugija Sositene, mukuu mupfya jwa sunagogi na wamubiga pfapfaḍe pfantu pfa hukumu. Naloo ntavikumumud̯a Galio hat̯a kachuchu.

¹⁸Paulo kakaa Korint̯o na hawa wandugu kwa nsiku nyinji. Makisa kanuka kunjia chomboni ende Siria. Pirisila na Akwila nao wagijana nae. Asidzanjia chomboni agonzowe ewa kapfeejwa hizi nywiize hukuḍe Kenkerea kuyanga ya kwamba ewa kaweka ahad̯i kwa Muungu.

¹⁹Wepfokwojeka Efeso, Paulo kamuyatsa Pirisila na Akwila. Kenda kanjia sunagogini na kaḍabva kunena na hawa Wayahud̯i.

²⁰Wamuyomba akae nao kwa nsiku zingine ela kadziza.

²¹Ishinu akwakunukani kawamba, “Muungu akitsaka, namuujia kawii.” Makisa kanjia chomboni kanuka Efeso.

²²Epfofika Kaisaria kenda Yerusalemi kuḍikedhya hiḍi tsanganiko, makisa kenda Antiokia.

²³Epfokaa hukuḍe kwa nsiku kachuchu kagonzowa kawii. Kachia ḍanda za Galatia na Furugia akiwangiza mojo hawa wahikiza.

²⁴Zizo ngera, Muyahud̯i mumodza eyeakihanwa Apolo, avyaijwe Alekizandaria, kadza Efeso. Ewa d̯ubat̯a jwa kunena na muntu ayamanyiye haya matsoro urembo muno.

²⁵Ewa kayongweezwa Njia ya Ḅwana na kanena na muvuku na kuyongweeza hachi dzuu ya Yesu na huku ewa kamanya mayongweezo na mat̯opyo ya Yohana t̯u.

²⁶Kaḍabva kunena humuḍe sunagogini pfasipfo oga. Pirisila na Akwila wepfomusikia, wamuhwaa wenda nae nyumbani kwao na wamuimusya Njia ya Ḅwana urembo zaid̯i.

²⁷Apolo epfohuna kwenda Akaya,[19] hawa wandugu wa Efeso wamungiza mojo kwa kwora ḅaruwa ya kuwambia hawa wandugu wa Akaya wamupfokeye. Epfokwenda hukuḍe, kawagija muno hawaḍe wantu wahikiziyeo kwa dzambo ḍya t̯ei ya Muungu.

²⁸Koro kwa dzambo ḍya yuḍaat̯o jwakwe yukali, kawashinda hawa Wayahud̯i kula wakinjia kuḍaat̯ianani wekeani, akiwayanga kuyawana na matsoro madheru kwamba Yesu ndiye huyu Masiya.