Read pokomo Mahendo 6 Bible Online

Mahendo 6 - pokomo bible

Mahendo 6

¹Hichi kit̯aro cha wahikiza chipfogija kukuya, nyumae kujumuka matsowano kahi ya hawaḍe weowakinena Kiyunani na hawaḍe weowakinena Kieburania. Hawa Wayahud̯i weowakinena Kiyunani wamba kwamba wake wachiwa wao ntawekimuud̯amijwa kwa haḍya zao za kula nansiku.

²Ndookomu hawa *ntumi kumi na wawii wakihana pfamodza kit̯aro chonse cha wahikiza na wawamba, “Si hachi kwehu kuyatsa kusumwiiya chuuwo cha Muungu hukaiye kuyowa haḍya za wantu.

³D̯ubva wandugu zehu, tsanani wantu wafungahe weonahikizika kahi yenu, wadzazijweo Ruhu Mudheru na karo. Naswi hunawapfa hi hii kazi.

⁴D̯ubva aswi, hunamuud̯amiya mayombo na kazi ya kusumwiiya.”

⁵Kit̯aro chonse cha wahikiza kitsakizwa ni hiḍi t̯aro. Ndookomu wamutsana Sit̯efano, muntu eyekuwa na faro nkuu na adzaiye Ruhu Mudheru. Wamutsana na Filipo, Porokoro, Nikanora, Timona, Paramena na Nikolao jwa kuyawa Antiokia eyenjia ḍini ya Kiyahud̯i.

⁶Wawaweka hawa wantu usoni kwa hawa ntumi, nao wawayombea na kuwapfaza mikono.

⁷Ndookomu chuuwo cha Muungu kigija kud̯achaa kula pfantu. Chima cha wahikiza huko Yerusalemi chongezeka muno, na wakohani wenji wayahikiza haya *Maagu Mema.

⁸Sit̯efano, muntu eyekuwa na winji wa t̯ei ya Muungu na adzaiye nguvu, kahenda mafara makuu ya kumakisa na vihambwiizo kahi ya hawa wantu.

⁹Ela wantu wangine washindana nae. Wewa wantu wa *sunagogi ḍihanijweḍyo “Sunagogi ḍya wantu huru,” ḍiḍyokuwa na Wayahud̯i wa Ukirene na Alekizandaria. Wao na Wayahud̯i wangine kuyawa Kilikia na Asia waḍabva kuḍaat̯iana na Sit̯efano.

¹⁰Ela ntawakumuweza kwa yuḍaat̯o, koro Ruhu Mudheru kamumpa karo wa kunenea.

¹¹Ndookomu wawangiza wantu nsunziirya wambe, “Humusikia Sit̯efano akiwa kunenani mambo mazuka dzuu ya Musa na dzuu ya Muungu!”

¹²Kwa hi hii njia wawatsunziirya hawa wantu, wazee na waalimu wa *Sharia. D̯ubva wadza wamugija Sit̯efano, wamupfiika usoni ye gasa.

¹³Makisa wahwaa wantu wendeyeo wakiyavya ushaahiḍi wa nsuwe wakyamba, “Huyu muntu huyu, meshi kakuneneani mazuka dzuu ya *Hekalu yehu nd̯eru na dzuu ya Sharia ya Musa.

¹⁴Humusikia akyamba huyu Yesu jwa Nazareti anainanga hi Hekalu na kuperuya maad̯a yonse huyongweezejweyo ni Musa!”

¹⁵Hawa wonse wakaiyeo hapfaḍe gasani wamud̯eḍea Sit̯efano gu, na wauona hu usowe ugala dza wa malaika.