Read pokomo Mahendo 7 Bible Online

Mahendo 7 - pokomo bible

Mahendo 7

¹Huyu *Mukohani Mukuu kamuuza Sit̯efano kamwamba, “Ndivyo, avi vya hawa wantu wevyokukuḍiani navyo?”

²Sit̯efano kambukuya kamwamba, “Wababa zangu na wandugu zangu, nipfindiiyani! Huyu Muungu mwenye nguvu kamut̯upukia bibi jwehu Iburahimu epfokuwa Mesopotamia, asidzakwenda kuishini Harani.

³Kamwamba, ‘Nuka nsini mwenu, uwayatse wantu wa sindoni mwenu, na balabala ya babajo, wende hat̯a nsi nidzeyokuyanga.’

⁴Ndookomu Iburahimu kanuka nsi ya Wakalidayo, kenda kanjia kuishini Harani. Babajwe epfofwa, Muungu kamunuya Iburahimu na Harani, kamuyeha hi hii nsi mwiyokukaani hi hii saasambi.

⁵Muungu nkakumumpa Iburahimu hat̯a kaḍinku ka hi nsi kawe kakwe mwenye. Ela kamuahid̯i kwamba anaimumpa, iwe yakwe na vit̯ukut̯ukuvye, hat̯a ingawa Iburahimu ewa nkadzawa na mwana.

⁶Muungu emwamba, ‘Yuvyeejo judzaishi nsi ya genini, wadzekowa wahumwa. Wanahendegwa mambo ya kinyaya kwa myaka magana mane.

⁷Ela nachihukumu hichi kyeet̯i kiwahendezeyecho wahumwa. Kisa nidzawayavya na humo nsini nao wadzaniyomba hapfa hapfa.’

⁸Makisa Muungu kaweka ntinye iwe kihambwiizo cha hiḍi ḍamano. Ndookomu Iburahimu kamuhinya mwanawe Isaka, nsiku ya nane ḅaad̯a ya kuvyajwa. Nae Isaka kadza kamuhinya Yakobo. Yakobo nae kadza kawahinya hawaḍe wabibi zehu kumi na wawii.

⁹Hawaḍe wabibi wamufwiya ḍea ndugu yao Yusufu, na wamuguza akawe muhumwa Misiri. Ela Muungu ewa nae.

¹⁰Kamuyavyanya na d̯inaze zonse. Usoni kwa Farao, haju jwa Misiri, Muungu kamumpa Yusufu kutsakwa na kamumpa na karo. Hat̯a Farao kamuweka kuwa mukuu jwa nsi na jwa nyumba ya kihaju.

¹¹Makisa kunjia nzaa nsi yonse ya Misiri na Kanaani, iyeheyeo d̯ina nkuu. Wabibi zehu ntawakuweza kudhumburya chakuḍya kiḍechonse.

¹²Ndookomu Yakobo epfosikia kwamba Misiri kwiwa chakuḍya, kawahuma hawa wanawe, yani wabibi zehu, wende mweedha wa d̯ura.

¹³Wepfokwenda charo cha pfii, Yusufu kadzimanyisa kwa hawa wanduguzwe, na ndipfo pfa Farao adzepfoakiumanya sindo wa Yusufu.

¹⁴D̯ubva Yusufu kamupfiikia ḍaamisa babajwe, na sindowe wonse, wantu miyongo mifungahe na watsano, kawamba wende Misiri.

¹⁵Makisa Yakobo kenda Misiri, endeekoakifwa jeje na wabibi zehu wangine.

¹⁶Mii yao itsukujwa hat̯a Shekemu, ipfozikwa mbeera ya Iburahimu agwiiyeyo kwa chima cha fwedha kuyawa kwa kyeet̯i cha Hamori.

¹⁷Ngera ya Muungu ya kut̯imiza hiḍi ḍamano ḍyakwe na Iburahimu ipfofika hafufi, wantu wehu weokuwa Misiri wenjipfa.

¹⁸Hat̯a mwisowe, Misiri iḍabva kut̯awaligwa ni haju yungine asiyemumanya Yusufu wala kumufwanya kwamba ewa ga.

¹⁹Kawakulakula wantu wehu na kuwahendea uyaji wabibi zehu kwa kuwasharut̯isa wawayatse wana wao nze ya madzumba yao ili wafwe.

²⁰Ndiyo ngera ya Musa, mwana ḅora muno usoni kwa Muungu, avyaijweyo. Kayejwa nyumbani mwa ise kwa myezi mihahu.

²¹Wepfodhimwa kumufitsa amaale, wamuyatsa nze ye nyumba yao. Ela mwanamuke jwa Farao kamuhwaa na kamuyeya dza mwanawe.

²²Musa kayongweezwa mambo yonse ya ukaro wa Wamisiri, hat̯a kahenda d̯ubat̯a jwa vyuuwo na mahendo.”

²³Sit̯efano kongeza kunena kamba, “Musa epfokuwa na myaka miyongo mine, kahuna kwendawad̯oya Waisiraeli wenziwe.

²⁴Kenda kamuona Muisiraeli akwakubigwani ni Mumisiri. D̯ubva katsumpa kumuvonea na kamuyaviza halo kwa kumuyaga huyu Mumisiri.

²⁵Echamba wantuwe wenye mbwakuimuka kwamba Muungu njwakumutumia jeje kuwayavya uhumwani. Kenge ntawakuimuka.

²⁶Chamukoche kaona Waisiraeli wawii wakiwa kujwanani, na kaḍema kuwakanya, kawamba, ‘T̯asikiani, ntamukwaa wantu wamodza? Munajwana nywinywi na nywinywi muna?’

²⁷Ela huyuḍe eyeakimubiga huyu mwenziwe kamud̯araba Musa geri, kamwamba, ‘Ni ga akuwekeye mukuu na t̯oibi jwehu?

²⁸Unatsaka kuniyaga nami, dzeviḍe umuyagiyevyo huyuḍe Mumisiri dzana?’

²⁹Musa epfosikia hivi, kad̯arama, kenda kanjia kuishini nsi ya Wamidiani, adzeekoakivyaa wanawayume wawii.

³⁰Musa epfoishi hukuḍe kwa myaka miyongo mine, kat̯upukijwa ni malaika. Huyu malaika kamut̯upukia kitsoryani chichochikiguuka maḅiliḅili hukuḍe yuwandani, hafufi na Murima wa Sinai.

³¹Musa kamakiswa ni haya aoneyeyo, hat̯a kadzikuntia hafufi na hiki kitsorya kukichimiza urembo. Ela kasikia idzwi ḍya Ḅwana

³²ḍikimwamba, ‘Mimi ndimi Muungu jwa wabibizo, aḍe Iburahimu, Isaka na Yakobo.’ Musa kahehema na oga hat̯a nkakuḍema kuchimiza kawii.

³³Makisa Ḅwana kamwamba, ‘Vuya viyahuvyo, koro hapfa usumamiyepfo ni pfantu pfadheru.

³⁴Niyaona mazuka ya wantu wangu weyokuhendejwani hukuḍe Misiri. Nisikia chiiyo chao, nami nidzia kuwapfonya. D̯ubva nzoo nikuhume Misiri.’ ”

³⁵Sit̯efano kongeza kunena amaale kamba, “Huyu Musa, ni yuyuḍe jwa wantu wa Isiraeli wadziziyee, wepfokwamba, ‘Ni ga akuwekeye mukuu na t̯oibi jwehu?’ Huyu ndiye jwa Muungu ahumie dza mukuu na mupfonya, kwa ugijo wa huyuḍe malaika amut̯upukiiye humuḍe mwa hiki kitsorya chichochikipfya.

³⁶Kawayongowa wantu kuyawa Misiri, akihenda mafara ya kumakisa na vihambwiizo. Hivi kavihenda Misiri, ḅahari ya Shamu na hukuḍe yuwandani kwa myaka miyongo mine.

³⁷Musa ndiye awambiiye wantu wa Isiraeli, ‘Muungu kadzamuhumia *nabii dzami, jwa kyeet̯i chenu wenye.’

³⁸Musa ndiye eyekuwa pfamodza na wantu wa Isiraeli, wepfot̯ut̯aa pfamodza hukuḍe yuwandani. Ewapfo hukuḍe pfamodza na wabibi zehu na pfamodza na huyuḍe malaika aneneye nae murima wa Sinai. Ndiye apfegejwe vyuuwo vya Muungu vya mojo, ahuyeheye.

³⁹Kenge ndiye jwa wabibi zehu wadziziyee kumut̯ii. Ishinu wamud̯araba geri na wat̯amani kuuja Misiri.

⁴⁰D̯ubva wamwambia Haroni, ‘Hwelekanyize miungu, idzeyohuyongowa usoni kwehu. Koro huyu Musa ahuyavyie na Misiri, ntahudzi kwamba kapatwa ni ya.’

⁴¹Ndiyo ngera wadzihendeeyeo yuumbo jwa mwana ngombe. Wajuvugiiya huju yuumbo, na wahenda jila, kutsekea kwa kazi wahendeeyo wenye.

⁴²Ela Muungu kanuka kahi yao, na kawayatsa wavunzie nkuhi nyoha za yuwinguni, dza vyorejwevyo chuoni mwa Manabii kwamba, ‘Wantu wa Isiraeli, simi hat̯a mwiyemukinitsinzia waḍondo na kuniyavia mvuugiya, kwa myaka miyongo mine hukuḍe yuwandani!

⁴³Ela mwiitsukuya hema ḍya muungu jwenu Moloki, na yuumbo jwa nyoha ya muungu jwenu Refani. Yewa maumbo mwelekanyiyeyo ili muyavunzie nkuhi. Na kwa dzambo hiḍyo namuhendeza munad̯aramiswa mumpaka usoni ya Babeli.’

⁴⁴Hukuḍe yuwandani, wabibi zehu wewa na hiḍi hema ḍiyangiyeḍyo kuwapfo kwa Muungu. Ḍielekanywa dzeviḍe vya Muungu amuḍamiyevyo Musa, kwamba aḍielekanye na yuumbo ayangijwejo.

⁴⁵Nyumae, wabibi zehu wapfegejweo hiḍi hema ni wababa zao, weḍihwaa, wepfokwenda pfamodza na Yoswa na kuheka nsi ya vyeet̯i vya Muungu ad̯aramisiyevyo wasidzaifika. Ḍikaa hapfo hat̯a ngera za D̯aud̯i.

⁴⁶D̯aud̯i ewa kamutsakiza Muungu. D̯ubva kamuyomba amuruhusu kumumbakia kao Muungu jwa Yakobo.

⁴⁷Kenge Sulemani ndiye adzeyeakimumbakia nyumba.

⁴⁸Ela Muungu awee dzuu nkanaishi nyumba zimbakijwezo ni wantu. Dza vya nabii aneneyevyo akyamba,

⁴⁹‘Ḅwana kamba, yuwingu ndijo kiti changu cha kihaju, na lumwengu ndijo kibago cha maguu yangu. D̯ubva ni nyumba ya namuna ga, mudzeyonimbakia mimi? Ni pfantu ga, pfangu nidzepfoyavya hara?

⁵⁰Dzaambia haya haya yonse, si kazi ya mikono yangu?’

⁵¹Nywinywi mwiwo na kimenudzi! Myojo yenu na masikio yenu ya dza ya hawa walumwengu. Mwa dza wabibi zenu; meshi munamudziza Ruhu Mudheru.

⁵²Ni nabii ga, asiyekuntiswa d̯ina ni wabibi zehu? Wawayaga hawa manabii wa Muungu weolalabva kae kudza kwa muhumisijwe muhachi. Kadza, na hi saasambi mumuḍawanya na mumuyaga.

⁵³Ndinywi mupfegejweo *Sharia ya Muungu, muiyeheejweyo ni malaika, ela ntamukuigija!”

⁵⁴Hawa wazee we gasa wepfosikia hivi, wareja na wamurhighia magego na ngoro.

⁵⁵Ela Sit̯efano, akiwa kadzaa Ruhu Mudheru, kayowa yuwinguni dzuu na kaona marembo ya Muungu yakiwa kuyangaani. Kamuona na Yesu akiwa kwamba kasumama mukono kuyume wa Muungu.

⁵⁶Kawamba, “T̯ayowani! Nyakuonani mbingu zipfenuka na *Mwana jwa Ad̯amu kasumama mukono kuyume wa Muungu.”

⁵⁷Gasa yonse ipfosikia haya, wayad̯ucha haya masikio yao na maganza huku wakibiga vilele. Makisa dza muntu mumodza wamuguukia iyo saa,

⁵⁸wamugija, wayawa nae nze ya mudzi na wamubiga na mawe. Hawa mashaahiḍi[5] waziyatsa nkanzu zao na muurani ahanijwe Sauli.

⁵⁹Wagija kumubiga na mawe huku akiwa kuyombani, akyamba, “Ḅwana Yesu, ipfokeye ruhu yangu.”

⁶⁰Makisa kavunza nkuhi na kaḅaa idzwi kuu kamba, “Ḅwana, nkudzoiwat̯alie nabvise yao hi!” Epfokwisa kunena haya kahuna nsoho.