Read pokomo Warumi 10 Bible Online

Warumi 10 - pokomo bible

Warumi 10

¹Wandugu zanguni, nyakut̯amanini muno mojoni mwangu kwamba hawa Waisiraeli wenzangu wapate kupfonywa. Nyakuwayombeani kwa Muungu muno kwamba wonse wapate kupfonywa.

²Koro naweza kuyavya ushaahiḍi kwamba wanatsaka muno kumutsakiza Muungu, ela ntawadzi hi njia ya kumutsakiza nayo.

³Ntawaimuke namuna ya Muungu evyonawahendeza wantu kuwa wahachi usoni kwakwe. Ishinu wanakaa na kudzilachia njia zao wao wenye za kudzihendeza wahachi usoni kwakwe, ndookomu wadziza kuihikiza hi njia ya Muungu ayaviyeyo ya kuwahendeza wahachi.

⁴Koro *Kirist̯o kaikamilisha hi *Sharia, ili kwamba kula amuhikiziye awe muhachi usoni kwa Muungu.

⁵*Nabii Musa kora kwamba, muntu eyenalacha kuwa muhachi kwa kuuḅa hi Sharia, anaishi kwa kuiuḅa hi Sharia.

⁶Ela dzuu ya kuwa muhachi kwa kuwa na faro, haya matsoro yamba, “Nkudzot̯are mojoni mwako wambe, ‘Ni ga adzeeweza kupfaa mbinguni?’ ” Yani, akamuyehe Kirist̯o lumwenguni.

⁷Na kawii yamba, “Nkudzot̯are mojoni mwako wambe, ‘Ni ga adzeeweza kwenda lumwengu jwa wafu?’ ” Yani akamufufuye Kirist̯o.

⁸Ishinu ni had̯i hukit̯ara dza hiviḍe vya haya matsoro yambiyevyo, “Hichi chuuwo cha Muungu chaa hafufi nanywi. Chaa myojoni mwenu na munakaa na kukinena na manwa yenu wenye.” Na hicho hicho ndicho hichi chuuwo hwichonasumwiiya, yani kupfonyegwa kuchiiya na kwa kumuhikiza Kirist̯o.

⁹Koro ukit̯amuka na kanwa kako wewe mwenye kwamba Yesu ni Ḅwana, na ukihikiza mojoni mwako kwamba Muungu kamufufuya kuyawa kwa wafu, unapfonywa.

¹⁰Koro muntu anahwajwa kuwa muhachi usoni kwa Muungu kwa kuhikiza mojoni mwakwe, na anapfonyegwa kwa kut̯ima na kanwake mwenye.

¹¹Haya matsoro yamba, “Yuḍejwonse amuhikiziye nkanagizwa yutswa meshi.”

¹²Ndookomu ntaku ugaragara kahi ya Muyahud̯i na muntu jwa kyeet̯i chingine. Muungu ndiye Ḅwana jwa wantu wonse, na anawavodhya kwa winji hawaḍe wonse weonamuyomba.

¹³Koro haya matsoro yamba, “Kula eyenaḍihana sari ḍya Ḅwana anapfonywa.”

¹⁴Ela wantu wanawezadze kuḍihana sari ḍya Ḅwana ikiwa kwamba ntawadzamuhikiza? Na wanawezadze kumuhikiza ikiwa kwamba ntawadzamupata maagu? Na wanawezadze kumupata maagu pfasipfo kusumwiijwa?

¹⁵Ae nguzi aya maagu yanasumwiijwadze ikiwa kwamba ntakukuhumwa wantu wakayasumwiiye? Dza vya matsoro yambiiyevyo, “Kudza kwa hawaḍe weonayeha *Maagu Mema ni dzambo dzema muno.”

¹⁶Ela si kula muntu kwamba kayahikiza haya Maagu Mema. Koro nabii Isaya kamba, “Ḅwana, ae ni ga ayahikiziye aya maagu husumwiiyeyo?”

¹⁷D̯ubva muntu anahikiza kwa kusikiiya haya Maagu Mema dzuu ya Kirist̯o.

¹⁸Ehe awa Wayahud̯i, munamba ntawadzayasikia hat̯a aya maagu? Gula kuyasikia wayasikia kaḅisa. Dza vya matsoro yambiyevyo: “Madzwi ya hawa wahumijweo kwendasumwiiya haya maagu, yasikijwa lumwengu yuzima. Na hivi vyuuwo vyao waneneyevyo, visikijwa hat̯a mwiso wa lumwengu.”

¹⁹Ela awa Wayahud̯i waimuka kintu? Gula ikiwa kwamba ni kuimuka waimuka kaḅisa! Koro cha d̯ura ni kwamba, Muungu kanena kuchiiya na kwa nabii Musa kamba, “Namuhendeza munawafwia ḍea wantu wa kyeet̯i chingine. Wantu wa kyeet̯i musichokihwaa dza kyeet̯i cha ḍugha. Namuhendeza munakirejea kyeet̯i cha wantu wangine mwichonakihana kyeet̯i cha maḍyura.”

²⁰Na kuchiiya na kwa nabii Isaya Muungu kanena wazi tswee kamba, “Nionegwa ni wantu ambao hat̯a ntawekinilacha. Nidziyanganya kwa wantu ambao hat̯a ntawekiuza dzuu yangu.”

²¹Ela Muungu kanena dzuu ya Waisiraeli kamba, “Musikahi muzima niigonzowa mikono yangu nipate kuwapfa ugijo, ela wakaiya ut̯iriri na kutsanit̯ii t̯u.”