Read pokomo Warumi 12 Bible Online

Warumi 12 - pokomo bible

Warumi 12

¹D̯ubva wandugu zanguni, kwa dzambo ḍya hivi vya Muungu ahufwiiyevyo t̯ei, nyakumuyombani muno kwamba mudziyavye kwakwe kaḅisa kaḅisa. Dziyavyeni kwa Muungu dza mvuugiya nd̯eru iyo mojo na iyonatsakiza usoni kwakwe. Hendani hivi kwa kwamba hi ndiyo njia halisi ya kiruhu ya kumuyomba Muungu.

²Na manyani amaale mutsekaiya kuuḅa myenendo mizuka mizuka ya huju lumwengu. Ishinu muyatseni Muungu agije kuziperuya mama zenu, na ndipfo mudzepfoihambuya miroye. Yani mudzahambuya kwamba Muungu anatsaka meshi mukikaa na kuhenda mambo mema yeyonamutsakiza na yeyo sawa usoni kwakwe.

³Kwa kwamba Muungu kanifwiya t̯ei na kanihendeza niwe *ntumi jwakwe, nyakumwambiani nyonse kwamba mutsedzihwaa kuchia chima. Ela ni mukidzihwaa dza viviḍe muivyo, kula mumodza akidzipima jeje mwenye kuuḅana na hi faro ya Muungu amumpiyeyo.

⁴Hiḍi tsanganiko ḍya *Kirist̯o ḍyaa dza hi mii yehu. Hi mii yehu ina viiriiri vinji, na kula kiiriiri kina kaziye. Ḅasi hwonse humuhikiziyeo Kirist̯o hu viiriiri vya mwii mumodza, na kula mumodza jwehu ana kaziye ya kuhenda, kwa dzambo ḍya hawa wenziwe.

⁶Ndookomu kwa kwamba Muungu kahupfa t̯ola garagara, ni had̯i huzitumiye kuuḅana na namuna ahuvodhyeyevyo. Muntu eye na t̯ola ya kuyavya maagu ya Muungu, ni akikaa na kuyayavya haya maagu akiwa na faro yonse kwamba kayapfegwa ni Muungu ḍugha.

⁷Huyuḍe eye na t̯ola ya kuhumikia wangine, nawahumikie. Huyuḍe eye na t̯ola ya kuyongweeza wangine, nawayongweeze.

⁸Eye na t̯ola ya kuwangiza mojo wangine, nakae na kuwangiza mojo. Eye na t̯ola ya kuwagijiija wangine weonawa na t̯uri, nakae na kuwagijiija na mojo mumodza. Eye na t̯ola ya uyongozi, nayongoze na hiḍu. Apfegejwe mojo wa kuwafwiya t̯ei wangine weo mad̯inani nawafwiye t̯ei akiwa na tsekea yonse.

⁹Hiḍi tsako ḍyenu naḍiwe tsako ḍya ḍugha. Ni had̯i muwe wantu wa kukeva kuhenda mazuka, na meshi mujwanie kuhenda mambo mema.

¹⁰Ni had̯i mutsakane nywinywi na nywinywi dza ndugu, na kula mumodza amuhile mwenziwe dza evyonaweza.

¹¹Namutsekaiya lafa mukwakuihendani kazi ya Ḅwana. Ishinu huyu Ruhu namugijiije mukwakumuhumikiani Ḅwana na muvuku wonse.

¹²Tsekeani muno kwa dzambo ḍya haya madzikwat̯yo ya Muungu amumpiyeyo. Mwipfonapatwa ni mad̯ina, nywinywi it̯isani, na saa zonse mukae mukiyomba.

¹³Hivi mwivyonawa navyo, wageyeni na wantu wa Muungu wangine weo na t̯uri. Na pia ikaani na kuwakaraḅisha wageni madzumbani mwenu.

¹⁴Wantu wakimukuntisa d̯ina, nywinywi namutsewayombea mazuka. Ishinu wayombeyeni kwamba Muungu awavodhye.

¹⁵Wantu wakiwa na tsekea, nanywi pia ikaani mukitsekea pfamodza nao. Na wakiwa na ngiru, nanywi pia sikit̯ikani pfamodza nao.

¹⁶Ikaiyanani urembo. Manyani mutseewa na kudziona, ela kuḅalini hat̯a kuhenda kazi zizonahendegwa ni mae,[7] na wala namutsedziona wamanyi.

¹⁷Wantu wakimuhendea mazuka, nywinywi namutsewaipfa halo kwa kuwahendea mazuka. Ela meshi ikaani mukit̯aria kuhenda yeyo sawa usoni kwa wantu wonse.

¹⁸Kwa yupfande jwenu, ḍemani kula mwivyonaweza ili muishi na naghea na kula muntu.

¹⁹Watsakwa, manyani mutseipfa halo kwa yuḍejwonse. Halo imuyatsiyeni Muungu, koro vyoregwa matsoroni kwamba, “Ḅwana Muungu kamba, ‘Halo nzangu. Mimi naipfa halo kwa kula muntu ahendeye mazuka.’ ”

²⁰Ishinu hendani hivi vya haya matsoro yambiyevyo kwamba, “Nyabva wenu wakiwa na nzaa, nywinywi wapfeni chakuḍya. Wakiwa na nchiu, nywinywi wapfeni madzi ya kunwa. Koro mukiwahendea hivi, ni sawa na kwamba muwapfaza makaa ya moho vitswani mwao.”

²¹Manyani mutset̯awaligwa ni mazuka. Ela gijani kuhenda mema ili mupate kuyashinda mazuka.