Read pokomo Warumi 13 Bible Online

Warumi 13 - pokomo bible

Warumi 13

¹Kula mumodza jwenu ni had̯i at̯ii mamulaka ya sirikali, koro mamulaka zonse ziyawa kwa Muungu, na hawaḍe weokut̯awalani wawekwa ni Muungu jeje mwenye.

²Ndookomu yuḍejwonse eyenawapfinga hawaḍe weo na mamulaka ya kut̯awala, anawa kwamba kakupfingani mamulaka yawekejweyo ni Muungu. Na muntu dzae anadziyeheya hukumu.

³Wantu weonahenda mazuka ndiwo weonawashooga wat̯awala, ela hawaḍe weonahenda mema ntawa saḅaḅu iḍeyonse ya kuwashooga. Mukitsaka kutsawashooga wat̯awala wenu, ḅasi hendani mema. Na mukihenda hivi, hawa wat̯awala wenu wanamushad̯a.

⁴Koro mut̯awala ni muhumisi awekejwee ni Muungu kumusaiḍia nywinywi. Ela ikiwa kwamba munahenda matsowa, ḅasi muna hachi ya kuwashooga hawa wat̯awala wenu. Hakika wao wana mamulaka ya kuwahukumu hawaḍe weonahenda mazuka, maanaye wao ni wahumisi wawekejweo ni Muungu ili wakiwahukumu hawaḍe weonahenda matsowa.

⁵Ndookomu ni had̯i mut̯ii mamulaka. Na si kut̯ii kwa dzambo ḍya kushooga ngoro ya Muungu t̯u, ela pia ni had̯i mut̯ii kwa dzambo mumanya kwamba ni hachi kuhenda dzavyo.

⁶Hat̯a hii ndiyo saḅaḅu mwiyonaipfa kuwa. Ni had̯i muipfe kuwa kwa kwamba hawa wat̯awala wepfonatumia wakati wao wonse kut̯awala, wanawa kwamba wakumuhumikiani Muungu.

⁷Ndookomu nichokunenani ni kwamba, ni had̯i muwapfe wat̯awala wenu wonse hikiḍe mwichonamala kuwapfa. Ikiwa kwamba munatsakikana kuipfa kuwa, ḅasi ipfani. Ikiwa kwamba munatsakikana kuipfa aina zingine ziḍezonse za koḍi, pia ipfani. Na ni had̯i mukiwashooga na kuwahila wonse.

⁸Namutseewa na rando kwa yuḍejwonse lamud̯a rando ḍya kutsakana nywinywi na nywinywi. Koro matsako ni dza rando ḍisiḍyosia kuipfigwa. Nyakunenani hivi kwa kwamba yuḍejwonse amutsakiye mwenziwe, anawa kakut̯imizani hivi vye *Sharia ivyonatsaka.

⁹Hizi amuri zyambiyezo, “Nkudzonjie rangani. Nkudzoyage. Nkudzokwiwe. Nkudzomiiye mahe cha mwenziwo,” na hiziḍe zingine zonse, zaa kuzimuni mwa amuri modza. Nayo ni hi amuri yambiyeyo, “Mutsake mwenziwo dza udzitsakiyevyo mwenye.”

¹⁰Kula amutsakiye mwenziwe nkanamuhendea mazuka yaḍeyonse. Ndookomu muntu eye na matsako, anawa kwamba kakut̯imizani hi Sharia yonse.

¹¹Hendani hivi mukimanya kwamba sasa hwaa ngera ga. Hizi ni ngera za kwamba muyamuke na sinzizini, kwa kwamba hi nsiku ya Muungu ya kuhupfonya, sasa imaawa hafufi kuchia hiviḍe ivyokuwa, hwipfomuhikiza *Kirist̯o.

¹²Hu siku umakuchiani na hi nsi imakuchani. Dza vivyo, hi hii ngera ya mambo mazuka mazuka imakuchiani, na Kirist̯o kamaawa hafufi kuuja. D̯ubva nahuyatseni kuhenda mambo ya kiza na hutsukuye vyeera vya kuhuwezesa kujwania muyangani.

¹³Ni had̯i hukae urembo dza wantu wa Muungu weo muyangani wevyonamala kukaa. Nahutsedzingiza kwa jila nzuka nzuka za kuruma ambu kuhenda uḅari, na wala nahutsedzingiza kuhendani mambo yangine yaḍeyonse machafu. Na pia ni had̯i huyatse mambo ya nkondo na kufwiyana ḍea.

¹⁴Ishinu ni had̯i mumuyatse Ḅwana jwehu Yesu Kirist̯o amuyongowe kwa kula dzambo, na muyatse kut̯aria kuuḅa t̯amaa nzuka nzuka za kibenaad̯amu.