Read pokomo Warumi 14 Bible Online

Warumi 14 - pokomo bible

Warumi 14

¹Hawaḍe wahikiza wenzenu weo na faro isiyodzangora nao pia wakaraḅisheni humu vit̯aroni mwenu. Na wala namutsejumuya yuḍaat̯o nao dzuu ya mambo yao weyonayaona kwamba ni sawa ambu si sawa.

²Kwa mufaano, muntu anaweza kuhikiza kwamba kudziḍia chakuḍya kiḍechonse ni sawa. Ela yungine asiyedzangora faroni anaweza kuona kwamba sawa ni kuḍya mboga t̯u.

³Hawaḍe weonaona kwamba ni vyema kuḍya chakuḍya kiḍechonse ntawa ruhusa ya kuwanyira hawaḍe wasiodziḍia ḅasi kula kintu. Na hawaḍe weonakwiya vyakuḍya vingine, nawatseona kwamba hawaḍe weonaḍya kula kintu wakuhendani matsowa. Koro Muungu mwenye ndiye akiwakuḅali kuwa wantuwe.

⁴Koro awe u ga, hat̯a uwaone hawa wahumisi wa Muungu kwamba wana matsowa? Ni dzuu ya huyu Ḅwana jwao kuhuna kwamba wakuhendani matsowa ambu hat̯a. Na wanawa sawa kwa kwamba Ḅwana ndiye jwa kuwawezesa kuhenda yeyo ya sawa.

⁵Dza vivyo, wangine wanahwaiya kwamba nsiku zingine ni nd̯eru kuchia zingine. Na wangine wakahwaiya kwamba nsiku zonse zaa sawa. Kula mumodza nawe na musumamo wakwe kaamili kwamba jeje mwenye kahikiza vi!

⁶Huyuḍe eyenahwaiya kwamba nsiku zingine ni nd̯eru kuchia zingine, kakuhendani dzavyo kwa dzambo ḍya kumuhila Ḅwana. Na huyuḍe eyenaona kwamba ni sawa kuḍya chakuḍya kiḍechonse, nae pia kakuhendani dzavyo kwa dzambo ḍya kumuhila Ḅwana, koro anamuyaviza Muungu ḍuḍa kwa dzambo ḍya hichi chakuḍya. Na hat̯a huyuḍe eyenakwiya vyakuḍya visiku, nae pia anahenda dzavyo kwa dzambo ḍya kumuhila Ḅwana, koro nae anamuyaviza ḍuḍa Muungu.

⁷Koro ntaku hat̯a mumodza jwehu eyenaweza kuishi kwa faiḍa yakwe jeje mwenye, na ntaku eyenaweza kufwa kwa faiḍa yakwe.

⁸Hukwakuishini, hwakuishini kwa dzambo ḍya Ḅwana. Na hat̯a hukifwa, hunafwa kwa dzambo ḍya Ḅwana. Ndookomu hukifwa ambu hukiishi, swiswi hu wantu wa Ḅwana.

⁹Koro *Kirist̯o kafwa na kafufuka kuyawa kwa wafu ili apate kuwa Ḅwana jwa hawaḍe wafwiyeo na hat̯a weo mojo.

¹⁰D̯ubva kut̯i wewe unamuhukumu ndugu mwenziwo? Ambu kut̯i wewe unamunyira ndugu mwenziwo? Kumbukani kwamba kula mumodza jwehu ni had̯i adzeasumame usoni ya kiti cha hukumu cha Muungu ili ahukumigwe.

¹¹Koro humu matsoroni Ḅwana kamba, “Hakika kula muntu kadzanivunzia nkuhi, na kadzanena na kanwa kakwe jeje mwenye, kwamba mimi ndimi Muungu.”

¹²Ndookomu kula mumodza jwehu kadzayavya hesaḅu ya mahendoye jeje mwenye usoni kwa Muungu.

¹³D̯ubva nyakumwambiani, manyani mutsehukumiana nywinywi na nywinywi kawii. Ishinu sasa hunani kutsahenda dzambo ḍiḍeḍyonse ḍya kwamba ḍinamuhendeza ndugu mwenziwo akolasike agwe nabviseni.

¹⁴Kuuḅana na hivi vya Ḅwana Yesu aneneyevyo, nimanya na nina uhakika kwamba, ntaku kiḍechonse kisichomala kuḍigwa. Ela muntu akihikiza kwamba kuna vyakuḍya visivyokuwa vidheru na visivyomala kuḍigwa, ḅasi kwakwe jeje ntavinamala kuḍigwa ḍugha.

¹⁵Ikiwa kwamba ndugu mwenziwo anakereka kwa dzambo ḍya hivi vyakuḍya wivyonaḍya, kisa nawe unaviḍya nangere usoni yakwe, ḅasi nkukwakuyangani matsako. Manyani hivi vyakuḍya mwivyonaḍya vitsekudzananga faro za wantu wangine ambao Kirist̯o kafwa kwa dzambo ḍyao pia.

¹⁶Ndookomu hikiḍe mwichonaona kwamba ni sawa kuhenda, manyani kitsewahendeza wangine wamuneneye mazuka.

¹⁷Koro Uhaju wa Muungu ntau cha kwamba hwakuḍyani vyakuḍya gani ambu hwakunwani kintu ga. Cha maana ni kwamba hunamala kuwa wahachi na kukaiyana na naghea na tsekea. Haya haya ni mambo hwiyonayapfegwa ni Ruhu Mudheru.

¹⁸Na yuḍejwonse eyenamuhumikia Kirist̯o nehii njia anamutsakiza Muungu, na wanaad̯amu pia wanamuona kwamba kakuhendani sawa.

¹⁹Ndookomu meshi nahuḍemeni kula hwivyonaweza ili huhende hayaḍe mambo yeyonayeha naghea na yeyonahuwezesa kumbakana swiswi na swiswi.

²⁰Hivi vyakuḍya mwivyonaḍya navitsemuhendeza muinange-nange hi kazi ya Muungu. Kumbukani kwamba vyakuḍya vyonse ni sawa kuviḍya. Ela ni matsowa kuḍya chakuḍya chichonaweza kumuhendeza yungine agwe nabviseni.[8]

²¹Ni heri kutsaaḍya nyama, wala kunwa mvinyo ambu kuhenda kintu kiḍechonse chichonaweza kumugisa nabviseni ndugu mwenziwo.

²²Ndookomu, hikiḍe uhikiziyecho wewe mwenye kwamba ni sawa, nakiwe siri yako na Muungujo. Kadzawa na tsekea iyodze huyuḍe ahikiziye kwamba hivi evyokuhendani ni sawa, na nkakwaa kuhukumikani mojoni mwakwe!

²³Ela huyuḍe eye na kajela dzuu ya vyakuḍya visiku na akiviḍya, ḅasi muntu dzae anawa kesakuhenda tsowa usoni kwa Muungu. Anawa na matsowa kwa kwamba nkakuhikiza kwamba hivi evyokuḍyani ni sawa kaviḍya. Na muntu akihenda kiḍechonse ahikiziyecho kwamba si sawa, ḅasi muntu dzae kahenda nabvise.