Read pokomo Warumi 2 Bible Online

Warumi 2 - pokomo bible

Warumi 2

¹D̯ubva wewe mwenzangu, ikiwa kwamba unawanena wangine kwamba wanahenda mazuka, ḅasi umanye kwamba hat̯a nawe nkuwezi kudzihehea hat̯a kachuchu. Koro ukwakuwahukumuni wangine, kwakudziyeheani hukumu wewe mwenye, kwa dzambo hat̯a nawe kwakuyahendani yayaḍe mambo wiyokuwanenani nayo wenziwo kwamba wakuyahendani.

²Humanya ya kwamba Muungu anawahukumu na hachi hawaḍe weonahenda mambo dzayo.

³Wewe ukwakuwanenani kwamba hawaḍe weonahenda mambo dzayo wanamala kuhukumigwa, na hali nawe pia kwakuyahendani, unat̯ara kwamba e hukumu ya Muungu inakusaza?

⁴Ambu kwakumubalifani Muungu kwa dzambo ḍya kwamba jeje ni munanso muno kwako? Yani kwakuonani kwamba jeje si muharaka jwa kukuadhiḅu na kakukuit̯isiani! Munamba nkwaona hat̯a kwamba hu huu wemawe wonse eokukuhendeani, kakukupfani namfasi nangere ili upate kupfyehuza mama?

⁵Ela kwa dzambo ḍya kitswacho chumu na kutsaatsaka kupfyehuza mama kwako, kwakudzifundikiani adhaḅu nkuu idzeyokudza hiyo hiyo nsiku ya Muungu adzeyowarejea wanabvise, na kuwahukumu na hachi.

⁶Hiyo hiyo nsiku, Muungu kadzamuipfa kula mumodza kuuḅana na mahendoye.

⁷Hawaḍe weonagija kuhenda mema na kulacha kwamba Muungu awakuzye na kuwahendeza wapfegwe hila na kuwa na maisha yasiyosia; wantu dzao, Muungu anawapfa maisha ya kuunga na yuungo.

⁸Ela hawaḍe weo na umimi, weonayatsa haya mambo ya hachi wakauḅa mazuka, ngoro ya Muungu idzawasukia.

⁹Kudzawa na d̯ina na tsungu mukuu muno kwa kula mwanaad̯amu eyenahenda mazuka. Na haya haya mambo yadzawapata hangu Wayahud̯i mumpaka wantu wa vyeet̯i vingine.

¹⁰Kenge kwa hawaḍe wonse weonahenda mema, Muungu kadzawakuzya na kuwapfa hila nkuu na naghea. Na haya haya mambo kadzayawahendea hangu Wayahud̯i mumpaka wantu wa vyeet̯i vingine.

¹¹Koro Muungu nka upend̯eleo kwa yuḍejwonse.

¹²Wayahud̯i weonahenda nabvise na hali huku waimanya hi *Sharia ya Musa, wadzahukumigwa kuuḅana na hi Sharia. Wantu wa vyeet̯i vingine ntawa Sharia ya Musa. Ela hawaḍe weonahenda nabvise na hali wamanya kwamba wakuhendani nabvise, nao pia wadzanangwa, hat̯a ingawa ntawaidzi hi Sharia ya Musa.

¹³Koro Muungu nkamuhwae muntu kuwa muhachi kwa dzambo ḍya kuisikiiya hi Sharia hat̯a, ela anamuhwaa muntu kuwa muhachi ikiwa kwamba kahenda hivi vya hi Sharia ivyonamumala kuhenda.

¹⁴Gula wantu wa vyeet̯i vingine hi Sharia ya Musa ntawanayo. Ela kula pfa akili zao zipfonawahuma kuhenda hivi vye Sharia ivyonatsaka, ḅasi wao wenye wanawa dza kwamba hi Sharia yoregwa myojoni mwao.

¹⁵Hii inayanga kwamba hivi vye Sharia ivyonatsaka, wavimanya myojoni mwao. Hat̯a hizi mama zao zinayanga tswee kwamba hiḍi hiḍi dzambo ni ḍugha. Koro akili zao zinawapfa kumanya kwamba dzambo siku ni dzema ambu ni zuka.

¹⁶Ndookomu hivi hivi ndivyo vidzevyowahendekea hiyo hiyo nsiku ya Muungu adzeyowahukumu wanaad̯amu kwa dzambo ḍya haya mambo weyonafitsa myojoni mwao. Kuuḅana na hi Injili niyonasumwiiya, Muungu kadzawahukumu wanaad̯amu wonse kuchiiya na kwa *Kirist̯o Yesu.

¹⁷Wewe unadziona kwamba u Muyahud̯i na ukadzihwaiya kwamba at̯i nku untu kwa dzambo kuimanya hi Sharia ya Musa. Unadziona kwamba u jwa Muungu

¹⁸na ukadzihwaiya kwamba kuimanya miro ya Muungu. Unadziona kwamba hi Sharia ikuyongweeza namuna ya kuhambuya mambo yeyo mema ya mwiso.

¹⁹Unadziona ya kwamba unaweza kuwagija yuroi ntumbu matso, na unadzihwaa dza muyanga wa kuwayangaiya hawaḍe weo kizani.

²⁰Unadziona dza kwamba u mwaalimu mukuu jwa kuyongweeza mad̯ud̯alesa na wantu wasiodzangora. Una hakika ya kwamba hi Sharia ikuyongweeza hi hachi pfamodza na umanyi wonse.

²¹D̯ubva, wewe wiyenawayongweeza wangine, nkwadziyongweeza wewe mwenye nguzi? Unawambadze wantu watseekwiwa, na hali katsi wewe mwenye kwakukwiwani?

²²Unawamba wantu, “Namutsevunza ukwe,” na hali wewe mwenye kwakuvunzani ukwe. Unakwamba kukeva mambo ya miungu na hali wewe mwenye unakaa na kukwiwa vija vivyonawekwa mahekaluni mwa miungu ya nsuwe.

²³At̯i unakaa na kudziona kwamba kuimanya hi Sharia ya Muungu. Munamba nkukwakuonani hat̯a kwamba avi wivyokuvunzani Sharia kwakuḍihendezani hiḍi sari ḍya Muungu ḍinjie kubalifigwani?

²⁴Koro vyoregwa matsoroni kwamba, “Wantu wa vyeet̯i vingine wakuḍikufuruni sari ḍya Muungu kwa dzambo ḍyenu nywinywi Wayahud̯i!”

²⁵Huko kuhinywa kwako kunawa na maana ikiwa kwamba kuit̯ii hi Sharia. Ela ikiwa kwamba kwakuivunzani, ḅasi nku ugaragara uḍewonse na muntu asiyengizwa ntinyeni!

²⁶Muntu jwa kyeet̯i kingine asiyedzahinywa, akiit̯ii hi Sharia, Muungu nkamuhwaa dza muntu ahinyijwe?

²⁷Ndookomu nywinywi Wayahud̯i mudzahukumigwa ni wantu wa vyeet̯i vingine weokuiuḅani hi Sharia ingawa ntawadzahinywa. Wadzamuhukumu kwa dzambo ḍya kwamba, ingawa mwakuhinywani na hi Sharia muyorejwa, ela munakaa na kuivunza.

²⁸Hivi ni kunena kwamba, si kula avyaijwe Muyahud̯i kwamba ni Muyahud̯i jwa ḍugha hat̯a. Na wala kuhinywa ḅasi kimwii ntakumuhendeze muntu kuwa Muyahud̯i jwa ḍugha.

²⁹Ela Muyahud̯i jwa ḍugha ni huyuḍe eyenamut̯ii Muungu na mojo. Yani ni huyuḍe ahinyijwe mojoni mwakwe. Hiḍi hiḍi ni dzambo ḍya kiruhu na wala si dzambo ḍya kuuḅa matsoro ya Sharia yorejweyo pfantu. Muntu dzae nkapate shad̯u kuyawa kwa wanaad̯amu, ela anapata shad̯u kuyawa kwa Muungu.