Read pokomo Warumi 5 Bible Online

Warumi 5 - pokomo bible

Warumi 5

¹Na kwa kwamba Muungu anahuhwaa kuwa wahachi usoni kwakwe kwa dzambo ḍya faro zehu, ḅasi huna naghea[1] na Muungu kuchiiya na kwa Ḅwana jwehu Yesu *Kirist̯o.

²Kirist̯o kahupfa njia ya kuifikia hi hii t̯ei ya Muungu huipatiyeyo hi hii saasambi kwa dzambo ḍya faro zehu. Ndookomu naswi hunatsekea kwa haya madzikwat̯yo hwiyonayo, ya kwamba Muungu kadzahungiza maremboni mwakwe.

³Na zaid̯i ya hayo, hat̯a hukiwa mad̯inani pia hunatsekea, koro humanya kwamba mad̯ina yanahuyongweeza kuit̯isa.

⁴Kuit̯isa kunahupfa nguvu za kugija kuwa na myenendo myema, na myenendo myema inahwongezea madzikwat̯yo yehu ya kupata mupfonyo.

⁵Na haya haya madzikwat̯yo hwiyonayo ntayanahungiza yutswani, koro Muungu kahuyanga matsakoye makuu kuchiiya na kwa Ruhu Mudheru jwakwe. Muungu kamuhukakanyia huyu huyu Ruhu myojoni mwehu dza t̯ola yakwe ahupfiyeyo.

⁶Koro hwipfokuwa amaale ntahudziwezi hat̯a kachuchu, Kirist̯o kadza na wakati mwema ḍa, na kafwa kwa dzambo ḍyehu hwonse hwiwo wanabvise.

⁷Si rahisi kuona muntu adzibigie koḅela kuyagwa kwa dzambo ḍya muntu muhachi yuḍejwonse. Pfangine muntu anaweza kudzit̯olea kuyagwa kwa dzambo ḍya muntu mwema.

⁸Ela t̯ayowani namuna ya Muungu ahuyangiyevyo kwamba kahutsaka. Koro ingawa hwikiishi nabviseni, Kirist̯o kadza kafwa kwa dzambo ḍyehu!

⁹Kwa kwamba Kirist̯o kamahuhendeza kuwa wahachi usoni kwa Muungu kuchiiya na kwa kifoche, ḅasi pia huna uhakika kwamba anahupfonya kuyawana ne hukumu ya Muungu idzeyokudza.

¹⁰Hivi hivi huna uhakika navyo kwa dzambo ḍya kwamba hwipfokuwa nyabva na Muungu, hupatanishwa nae kawii kuchiiya na kwa hichi kifo cha huyu Mwanawe. Na sasa hukimapatanishwa na Muungu, ḅasi huna uhakika kwamba hunapfonywa, koro huyu Mwanawe ka mojo.

¹¹Na si hivyo t̯u, ela sasa huna tsekea nkuu muno kwa Muungu kwa dzambo ḍya kwamba kuchiiya na kwa Ḅwana jwehu Yesu Kirist̯o swiswi hupatanishwa na Muungu.

¹²Kae nabvise injia lumwenguni kwa dzambo ḍya muntu mumodza. Na hiyo hiyo nabvise ahendeeyo iyeha kufwa. Ndookomu kufwa kunamufikia kula mwanaad̯amu kwa kwamba wonse wahenda nabvise.

¹³Gula wanaad̯amu wekihenda nabvise hangu kae na kae kaḅila Muungu nkadzawayehea hi *Sharia. Ela nabvise zao ntazit̯aligwe koro ntakwiwa sharia iḍeyonse.

¹⁴Ingawa hangu ngera ya Ad̯amu hat̯a ngera ya Musa apfegejweyo hi Sharia wantu wekifwa, ntawekifwa kwa dzambo ḍya kuvunza amuri ya Muungu dza hiviḍe vya Ad̯amu ahendeevyo. Ad̯amu ewa ni dza kivwii cha huyuḍe adzeekudza, yani Kirist̯o.

¹⁵Ela kuna ugaragara kahi ya hi nabvise ya Ad̯amu ayeheeyo, na hi t̯ola ya kuyatsijwa nabvise iyehejweyo ni Yesu Kirist̯o. Koro kuchiiya na kwa nabvise ihendejweyo ni muntu mumodza, yani Ad̯amu, wantu wenji wanjia kufwani. Ela huyu yungine, yani Yesu Kirist̯o, kahendeza wenji wapate kuyatsijwa nabvise zao kuchiiya na kwa t̯ei ya Muungu aikakanyiyeyo kwa wenji.

¹⁶Hi namuna ya Muungu evyonayavya t̯ola yakwe kwa wanaad̯amu, ni garagara na hivi vya nabvise injiiyevyo kuchiiya na kwa muntu mumodza. Nabvise modza ihendejweyo, iyeha hukumu kwa wantu, koro iwahendeza watsovi. Ela ḅaad̯a ya wantu kuhenda nabvise nyinji na nyinji, Muungu kaiwayehea hi t̯olaye ili aweze kuwahendeza wahachi usoni kwakwe.

¹⁷Nabvise ya muntu mumodza iyeha kufwa kwa lumwengu yuzima. Ela kuchiiya na kwa muntu mumodza yungine, yani Yesu Kirist̯o, hawaḍe waipfokeeyeo hi t̯ei nkuu ya Muungu ne t̯olaye ya kuwahendeza wahachi, hao wadzaishi maisha ya kuunga na yuungo.

¹⁸Ḅasi na dza vya nabvise ya muntu mumodza iyeheyevyo hukumu kwa wantu wonse, ndivyo vya hendo modza ḍya hachi ḍihendejweḍyo ni Yesu Kirist̯o ḍivyokuwahendezani wantu wonse kuwa wahachi usoni kwa Muungu na kuwapfa maisha.

¹⁹Koro dza vya wantu wonse wagaliyevyo wanabvise usoni kwa Muungu kwa dzambo ḍya muntu mumodza kutsamut̯ii Muungu, ḅasi ndivyo vya Muungu adzevyowahendeza wantu wonse kuwa wahachi usoni kwakwe, kwa dzambo ḍya ut̯iifu wa muntu mumodza.

²⁰Hi Sharia ipfoyehegwa, injipfisa mazuka, ela kula pfa wantu wagijiyepfo kuhenda nabvise, Muungu kagija kuwafwiya t̯ei zaid̯i na zaid̯i.

²¹Cha mwiso ni kwamba kae nabvise iwa ijut̯awala lumwengu kwa kuwangiza wantu kufwani. Ela sasa hi t̯ei ya Muungu ndiyo iyokuhut̯awalani kwa kuhuhendeza kuwa wahachi usoni kwa Muungu na kuhupfa maisha ya kuunga na yuungo. Na hivi hunavipata kuchiiya na kwa kumuhikiza Ḅwana jwehu Yesu Kirist̯o.