Read pokomo 1 Wakorint̯o 11 Bible Online

1 Wakorint̯o 11 - pokomo bible

1 Wakorint̯o 11

¹D̯ubva nit̯aḅani mimi, dza hivi vyangu nivyokumut̯aḅani *Kirist̯o.

²Nyakumushad̯ani, kwa dzambo ḍya kwamba mwakunikumbukani kut̯wa na mwakuuḅani haya mayongweezo nimuyongweezeyeyo.

³Ela natsaka mumanye ya kwamba, Kirist̯o ndiye kitswa[3] cha muyume. Huyu muyume ndiye kitswa cha mukaziwe, na Muungu ndiye kitswa cha Kirist̯o.

⁴D̯ubva, muyume eyenayomba na kusumwiiya Maagu ya Muungu akiwa kadzifinikiza hiki kitswa, huyo kakumugizani yutswa Kirist̯o.

⁵Na muke yuḍejwonse eyenayomba na kusumwiiya Maagu ya Muungu pfasipfo kudzifunga kiḍechonse humu kitswani, huyo kakumugizani yutswa muumewe; ni sawa na kwamba kapfeejwa hiki kitswa.

⁶Muke adziziye kudzifunga kit̯ambaa cha kitswa, nazichire hizi nywiize. Ela ikiwa kwamba vyaa yutswa kwa muke kuchira ambu kupfeeya hizi nywii, d̯ubva nadzifunge kit̯ambaa.

⁷Muyume nkanamala kudzifinikiza hichi kitswache, kwa dzambo jeje ni dza kiyoo cha umbo ḍya Muungu na ni mufaano wa marembo ya Muungu. Ela muke ni dza kiyoo cha marembo ya muumewe.

⁸Koro muyume nkakuumbwa kuyawa kwa muke, ela muke ndiye aumbijwe kuyawa kwa muyume.

⁹Na wala muyume nkakuumbwa kwa dzambo ḍya muke, ela muke kaumbwa kwa dzambo ḍya muyume.

¹⁰Ndiyo maana muke anamala kudzifunga kit̯ambaa, kuyanga kwamba ka nsii ya mamulaka. Na ni ahende hivyo hivyo pia kwa dzambo ḍya hawa malaika.

¹¹Hat̯a vivyo, hukwaa hariani mwa Ḅwana, muke ni muhimu kwa muyume, na muyume ni muhimu kwa muke.

¹²Koro dza vya muke evyoumbwa kuyawa kwa muyume, muyume nae kavyajwa ni muke; ela kula kintu kiumbwa ni Muungu.

¹³Viyoweni nywinywi: Ni sawa kwa muke kumuyomba Muungu wekeani akiwa nkakudzifunga kit̯ambaa cha kitswa?

¹⁴Dza viivyo, mudziyongweeza kwamba nywii ndeya za kumugwa mongoni muyume, zinamuajaisa,

¹⁵ela kwa muke ni rembo. Kazipfegwa zipate kumufinikiza hichi kitswache.

¹⁶Ela muntu akiwa na yuḍaat̯o dzuu ya haya, swiswi na haya matsanganiko ya Muungu ntahudzi ad̯a ingine ya mayombo.

¹⁷Hivi nivyokumwambiani sasa, si vyuuwo vya kumufaarisa hat̯a; koro kutsanganika kwenu kwa mayombo kwakumunangani zaid̯i kuliko kumuelekanya.

¹⁸Cha d̯ura nisikia kwamba, mwipfonakudziana pfamodza dza tsanganiko, munakaa mukigawikana vit̯aro vit̯aro. Nami nina hakika kwamba haya yangine nisikiiyeyo nza ḍugha.

¹⁹Hangu d̯ura, ni had̯i kuwe migawikano kahi yenu, ili hawaḍe wahikiza weo na hachi wapate kuonekana.

²⁰Mwipfonatsanganika pfamodza, hichi mwichonaḍya si hichi chakuḍya cha Ḅwana hat̯a.

²¹Koro mukwakuḍyani ntamuindane. Ndookomu wangine wanawa kufwani nzaa huku wangine wakiwa waruma waa go!

²²Munamba ntamu makwenu kwa kwamba munaḍya na kunwa hat̯a? Ambu munatsaka kuḍibalifa hiḍi tsanganiko ḍya Muungu na muwagize yutswa hawa wasio kintu? Kisa nami nimwambedze, nimufaarise? Hat̯a, siwezi kumufaarisa kaḅisa!

²³Koro haya ya Ḅwana anyambiiyeyo, ndiyo yangu nimuyongweezeyeyo: Ya kwamba, huḍe sikuwe wa kuḍawanywa, Ḅwana Yesu kahwaa mukahe,

²⁴kamuyaviza ḍuḍa Muungu, kisa kauvunza na kamba, “Hu ni mwii wangu uyavijweo kwa dzambo ḍyenu. Uḍyeni mupate kunikumbuka.”

²⁵Wakimaaḍya wakisa, kahwaa hichi chikombe dza viviḍe evyohenda d̯ura, na kamba, “Hichi chikombe cha mvinyo ni ḍamano ipfya ḍya Muungu, ḍiwekejweḍyo na mwazi wangu. Kula mwipfonainwa, inweni kunikumbuka mimi.”

²⁶Yani, kula mwipfonaḍya hu mukahe na kunwa hichi chikombe cha mvinyo, mwakulalabvani kufwa kwa Ḅwana hat̯a adzepfokudza.

²⁷D̯ubva, yuḍejwonse eyenaḍya chakuḍya cha Ḅwana kwa njia ya kumuajaisa Ḅwana, kakuhendani nabvise ya kuutsowea mwii na mwazi wa Ḅwana.

²⁸Kwa hivyo, muntu asidzaḍya chakuḍya cha Ḅwana ni had̯i adzipime nguzi tswee.

²⁹Koro yuḍejwonse eyenaḍya chakuḍya cha Ḅwana pfasipfo kuona maana ya mwii wa Ḅwana, kakudziyeheyani hukumu jeje mwenye.

³⁰Ndiyo maana wenji wenu mii yenu ntai matsea na mwakujwaani na hat̯a wangine wafwa.

³¹Ela t̯ambere hundekaa hukidzipima nguzi, Muungu nkandehuhukumu dza hivi.

³²Ḅwana kakuhuhukumuni na kuhubiga ili hutsekudzahukumigwa pfamodza na hawa walumwengu.

³³D̯ubva wandugu, mwipfonatsanganika pfamodza kuḍya chakuḍya cha Ḅwana, ikaani mukiindana.

³⁴Na ikiwa kwamba muntu yuḍejwonse ana nzaa, naḍye nyumbani kwakwe, ili mwipfonatsanganika mutsekudzahukumigwa. Na dzuu ya haya mambo yangine, nanena nanywi nidzepfokudza.