Read pokomo 1 Wakorint̯o 16 Bible Online

1 Wakorint̯o 16 - pokomo bible

1 Wakorint̯o 16

¹Na dzuu ya hizi mvuugiya za kuyavigwa kwa dzambo ḍya ugijo wa wahikiza weo Yerusalemi, hendani dza hivi niyaḍamiyevyo haya matsanganiko ya Galatia yahende.

²Kula nsiku ya ḍyuma, kula mumodza jwenu ni kut̯enga chima cha fwedha mala ya haya mapatoye, muziweke, ili kutseewa na haḍya ya kuhwaa mvuugiya nidzepfokudza.

³Nikidza, nawapfa ḅaruwa za kuwamanyisa hawa wantu mutsaniyeo, kisa nawahuma wazipfiike hizi nt̯unu zenu Yerusalemi.

⁴Na ikiwa kwamba ni sawa kwangu nami nyende, ḅasi hunagijana pfamodza hunakwenda.

⁵Ninkisa kuchia na Makedonia, nakudza kwenu, kwa kwamba Makedonia nawa nyakuchiani t̯u.

⁶Pfangine huku kwenu nidzakaa kit̯emo, pfangine nikae huyu sika jwonse, ili mupate kunimpa ugijo wa kugija kwenda na charo changu, kuḍekwonse nidzekokwenda.

⁷Sikitsaka kuonana nanywi dzuu dzuu nikwakuchiani. Nyakuyoweeyani kukaa nanywi kwa kit̯emo Ḅwana akitsaka.

⁸Ela nakaa nguzi Efeso mumpaka nsiku ya jila ya Pentekost̯e.[4]

⁹Hapfa nina namfasi nyema muno ya kuhenda kazi ya maana, hat̯a ingawa wapinzani wangu nao ni wenji.

¹⁰Timoteo akidza kwenu, mupfokeeni urembo, koro nae kakuhendani kazi ya Ḅwana dzami.

¹¹Kwa hivyo nakutseewa muntu jwa kumubalifa. Mumpeni ugijo agije kwenda na charoche salama, apate kuuja huku niiko. Nyakumuyoweeyani auje jeje na hawa wandugu.

¹²Na dzuu ya ndugu Apolo, ni hivi: Mala nineneyeo nae agijane na hawa wandugu wadze kwenu, jeje nkakutsaka kudza hi hii saasambi. Ela akipata namfasi anakudza.

¹³Nywinywi wani matso. Faro yenu igijeni muno na namutseewa woga. Wani wantu mwiwo na nguvu.

¹⁴Yonse mwiyonahenda, yahendeni na matsako.

¹⁵Mumanya ya kwamba wantu wa nyumba ya Sit̯efanosi ndiwo wantu wa d̯ura wa ḍyimbo ḍya Akaya waperukiyeo wakiwa Wakirist̯o. Na wadziyavya kuwahumikia wantu wa Muungu. D̯ubva wandugu zangu, nyakumuyombani

¹⁶muwat̯ii wantu dza hawa hawa na yungine yuḍejwonse eyenahenda kazi na kuhumika pfamodza nao.

¹⁷Nitsekea kwamba Sit̯efano, Fotunato na Akaiko wadza huku niiko. Waniyavya hu udhuma wa kumutsowa nywinywi.

¹⁸Wao waniingamaza mojo muno dza hiviḍe wevyomuingamaza nanywi. Wantu dza hawa wanamala kuhilwa.

¹⁹Matsanganiko ya ḍyimbo ḍya Asia yamukedhya. Akwila na Pirisila, na hiḍi tsanganiko ḍiḍyonayomba humu nyumbani mwao, wamukedhya nto hariani mwa Ḅwana.

²⁰Hawa wandugu weo hapfa wonse nao wamukedhya. Mukwakukedhyanani, noneanani, kuyangana matsako ya kindugu.

²¹Mimi Paulo, hi kedhya hi nyakuyorani na mukono wangu mwenye.

²²Yuḍejwonse asiyemutsaka Ḅwana, huyo kaḍujwa. Ḅwana jwehu, nzoo!

²³T̯ei ya Ḅwana jwehu Yesu naiwe pfamodza nanywi.

²⁴Matsako yangu nayawe nanywi nyonse hariani mwa *Kirist̯o Yesu. Ikaani naghea.