Read pokomo 2 Wakorint̯o 10 Bible Online

2 Wakorint̯o 10 - pokomo bible

2 Wakorint̯o 10

¹Wangine wenu wanakwamba, mimi nipfonawa pfamodza nanywi ni mupfoozi mupfoozi, ela nipfonawa kuye nanywi nahenda mukali. Ela mimi Paulo, nyakunenani nanywi na umpowe na wema dza huḍe wa *Kirist̯o eokuwa nao.

²Nyakumuyombani mutsenisharut̯isa kuwa mukali kwenu nidzepfokudza. Nimanya naweza kuwa mukali kwa hawaḍe weonat̯ara kwamba swiswi mambo yehu hwakuyahendani kilumwengu.

³Gula hwakuishini humu lumwenguni ḍugha, ela viha vyehu hwivyokujwanani si viha vya kilumwengu.

⁴Na hivi vyeera hwivyokujwaniani hivi viha vyehu si vyeera vya kilumwengu, ni vyeera vivyo na nguvu za Muungu, hwizonavunzia-vunzia nkambi za muzuka. Hunananga-nanga kula yuḍaat̯o jwa nsuwe

⁵na kunuya kula d̯angara ya kuwavingira wantu kutsamumanya Muungu, iyonawekwa ni wantu weonadziona. Na mama za wantu hunaziheka na kuzihendeza zimut̯ii Kirist̯o.

⁶Na hudzepfoona kwamba mwakumut̯iini Kirist̯o na kula njia, hunawa hwaa t̯ayari kumuadhiḅu yuḍejwonse asiyet̯ii.

⁷Nywinywi munayahwaa mambo kidzuu-dzuu. Ikiwa kwamba muntu kadziona kwamba jeje njwa Kirist̯o, navit̯arie urembo, na anaona kwamba naswi hu wantu wa Kirist̯o dzae.

⁸Ḅwana kahupfa mamulaka dzuu yenu; si mamulaka ya kumutsaratsara, ela ni mamulaka ya kumumbaka nywinywi. Na hat̯a ingawa nimadziona kuchia chima dzuu ya haya mamulaka hwiyonayo, si yutswa na muntu.

⁹Sit̯aki munione dza kwamba nyakutsakani kumungiza oga na hizi ḅaruwa zangu.

¹⁰Koro wangine wanakwamba, “Ḅaruwa za Paulo ni nkali nkali na zina vyuuwo viziho viziho, ela jeje mwenye nka mwii wa maana na wala nka ud̯ubat̯a eo nao!”

¹¹Wantu dzao ni wamanye kwamba, hayaḍe hwiyonamworea humu mwa hizi ḅaruwa zehu, ndiyo hudzeyohenda hukiwa pfamodza nanywi.

¹²Hangu d̯ura aswi, hunaweza kudzipima na kudziinganya na hawaḍe weonadzishad̯a wao wenye? Wantu dzao, weonadziwekea vipimo vyao wao wenye kisa wakadzipima navyo ni maḍyura!

¹³Swiswi ntahuwezi kudzishad̯a na kintu husichokuwa na hachi ya kukidzishad̯ia. Chehu t̯u cha kudzishad̯ia, ni hi kazi ya Muungu ahupfiyeyo huihende, na ikihuyeha hat̯a kwenu.

¹⁴Nywinywi mwaa kuzimuni mwa hi mimpaka ya Muungu ahuwekeeyo, ndookomu ntahwichia mumpaka hwipfokudza mumpaka Korint̯o kusumwiiya *Maagu Mema dzuu ya Kirist̯o.

¹⁵D̯ubva, swiswi ntahudzishad̯iye kazi ya wantu wangine wahendeyeyo nze ya hi mimpaka ya Muungu ahuwekeeyo. Ela hwakudzikwat̯yani kwamba faro yenu inakuya, na kuzimuni mwa hi mimpaka yehu huwekeejweyo, kazi yehu kwenu inakuya muno.

¹⁶Ndookomu naswi, hunakwenda nsi zingine ziizo usoni ya Korint̯o hwende hukasumwiiye hi injili. Ntahuwezi kukaiya kudzishad̯a kwa kazi ya muntu yungine ahendeyeyo kuntukwe.

¹⁷Ni viwe dza hivi vya haya matsoro yaneneyevyo yakyamba, “Muntu jwa kudzishad̯a, nadzishad̯e kwa dzambo ḍya haya ya Ḅwana amuhendeeyo.”

¹⁸Koro muntu jwa Ḅwana atsakiye si huyuḍe eyenadzishad̯a jeje, ela ni huyuḍe jwakwe jeje mwenye eyenamushad̯a.