Read pokomo 2 Wakorint̯o 12 Bible Online

2 Wakorint̯o 12 - pokomo bible

2 Wakorint̯o 12

¹Gula kudziona kwangu ntaku maana yaḍeyonse, ela mimi nagija kudziona t̯u. Na sasa nanenea mambo ya Ḅwana aniyangiyeyo na akiyanipfenwiiya.

²Nimanya muntu amuhikiziye *Kirist̯o ahwaijwe kwenda mbingu za dzuu myaka kumi na mine ichiiyeyo. Ela sidzi kwamba niwa nyenda kimwii ambu ni hi ruhu ḅasi. Muungu t̯u ndiye amanyiye.

³Nyakuviujiani kawii: Nimanya ya kwamba huyu muntu kahwajwa kenda hat̯a *Paradiso. Na hukuḍe kenda kasikia mambo yasiyo na ruhusa ya kunenegwa na wala yasiyoweza kuneneka. Ela kawii, sidzi ya kwamba niwa nyenda kimwii ambu ni hi ruhu ḅasi. Muungu t̯u ndiye amanyiye.

⁵D̯ubva mimi nadziona kwa dzambo ḍya muntu dzae. Nihuna kutsadziona na ḍingine ḍiḍeḍyonse, lamud̯a nidzione dzuu ya haya mambo yeyonayanga namuna nisivyokuwa na nguvu.

⁶Nitsakiye kudziona nindedziona, kwa kwamba sindeewa kuhendekani dza ḍyura, nindeewa kunenani hi ya hachi. Ela si haḍya ya kudziona dzuu ya hizi nzozi, wantu watsekudzanihwaa kuwa muntu jwa maana kwa dzambo ḍya hizi nzozi zangu kuliko kunihwaa muntu jwa maana kwa haya weyonaniona nikihenda na kunena.

⁷Ela kwa kutsaka kunivingira nitsedziona muno kwa dzambo ḍya haya mambo menji makuu makuu aniyangiyeyo, Muungu kaningiza nd̯wari[2] ya tsungu humu mwiini. Hi nd̯wari ikaa dza ntumi jwa Shaat̯ani jwa kunigisa chisa, kunivingira kutsadziona muno.

⁸Nimuyomba Ḅwana myeedha mihahu aininwiiye hi hii nd̯wari.

⁹Ela kula mweedha jeje kanyamba, “T̯ei yangu kwako it̯osa. Koro wewe mwenye wipfonawa mudhaifu, ndipfo pfa nguvu zangu zipfonahenda kazi urembo zaid̯i.” D̯ubva mimi natsekea kudziona kwa dzambo ḍya udhaifu wangu, nipate kuona nguvu za Kirist̯o zikihenda kazi kuzimuni mwangu.

¹⁰Ndookomu natsekea kukunta d̯ina kwa dzambo ḍya Kirist̯o. Sione viwi nikiwa mudhaifu ambu nikihendejwa mazuka, ninkiwa na t̯uri ambu nikiteswa na kukuntiswa d̯ina. Koro nipfonasiijwa ni nguvu zangu ndipfo nipfonapata nguvu za Kirist̯o.

¹¹Mimi nyakuhendekani dza ḍyura, ela ndinywi munihendezeyeo nihendeke dza ḍyura. Nywinywi ndinywi wa kwamba mundenishad̯a. Koro hat̯a mukinyamba mimi si maana, si ya kwamba mimi si maana kuchia hawa ntumi wenu mwiwonahwaa kuwa na maana.

¹²Mimi nihenda vihambwiizo, mambo ya kumakisa na mambo ya mafara kahi yenu, huku nikiit̯isa kuhenda hi kazi yangu. Na hayo yonse nihendeyeyo, yayanga wantu kwamba mimi ni *ntumi.

¹³Ni kintu ga niyahendeeyecho matsanganiko yangine nisichomuhendea nanywi? Ni avi nidziziyevyo kuwa muzigo kwenu? Haya, ikiwa kwamba nivyohivyo, d̯ubva nitsowa niyatsiani!

¹⁴Sasa nimaawa t̯ayari kudza kwenu mweedha wa hahu. Nami si haḍya ya kudza kisa niwe muzigo kwenu. Koro mimi namutsaka nywinywi, si haḍya ya hivi mwivyonavyo. Hangu d̯ura, wana siwo wa kuyeya wavyazi wao hat̯a, ela wavyazi ndiwo wa kuyeya wana wao.

¹⁵Mimi natumia na mojo mumodza kula nichonacho na kudzit̯ut̯uma kwa dzambo ḍya ruhu zenu. Ami nikimamutsaka muno dzevihivi, anywi munanitsaka kachuchu ḅasi?

¹⁶Hat̯a mukikuḅali kwamba siwa muzigo kwenu, wangine wenu wanakwamba niiwa na makulekule na nimuḍyuurisa na nsuwe.

¹⁷Kuna ga kahi ya hawa wantu nihumiyeo kwenu adziyee akimukulakula?

¹⁸Mimi nimuyomba Tito adze kwenu, na nimuhuma ae na huyu ndugu yungine. Munatsaka kwamba Tito ndiye adziye akimukulakula? Dzaambia ami na Tito ntahukwaa na malengo mamodza na mwenendo mumodza?

¹⁹Waḅamu zangu watsakwa, namutset̯ara kwamba hangu iiḍe hwakuḍemani kudzihehea usoni yenu hat̯a! Muungu ndiye shaahiḍi, kwamba, hwakunenani hi ya hachi dza wantu wamuhikiziyeo Kirist̯o. Yonse hwiyokuhendani, hwakuyahendani kwa dzambo ḍya kumumbaka nywinywi.

²⁰Nyakushoogeani kwamba nidzepfokudza kwenu, sikudzatsakizwa na hi hali nidzeyomut̯onga nayo, nami idzanimala kuhenda mambo yasiyomutsakiza nywinywi. Nyakushoogeani kwamba nidzamut̯onga mwakuhehani, mwakufwiyanani ḍea, mwakuwekeanani ngoro, na kuwa na umimi, pfamodza na kuwa na nyano, kamba na ambigwa, kudziona, na kuwa na kutsasikiana.

²¹Nyakushoogeani kwamba, nidzepfokudza kwenu, Muungu jwangu ananihendeza nagijwa ni yutswa kawii kwa dzambo ḍyenu. Nami nidzasikit̯ika kwa dzambo ḍya hawaḍe wagijiyeo kuhenda nabvise pfasipfo kupfyehuza mama, wasiotsaka kuyatsa uḅari, ranga na ubabad̯uma wao.