Read pokomo 2 Wakorint̯o 3 Bible Online

2 Wakorint̯o 3 - pokomo bible

2 Wakorint̯o 3

¹Hukwakunenani hivi, si ya kwamba humakudzionani kawii hat̯a! Swiswi ntahukwaa dza hawa wantu wangine. Ntahu haḍya ya kwamba huwe na ḅaruwa za kuhumanyisa kwenu ambu muhupfe ḅaruwa za kuhumanyisa kwa wangine.

²Nywinywi wenye ndinywi hi ḅaruwa hwiyonayo, yorejweyo myojoni mwehu ili kwamba imanyikane na kusomwa ni kula muntu.

³Nywinywi muyanga kwamba mwaa dza ḅaruwa yorejweyo ni *Kirist̯o ahupfiyeyo swiswi huiyavye. Na ntaikworegwa viḍyaeni na wino, ela yoregwa ni Kirist̯o myojoni mwa wantu kwa njia ya huyu Ruhu jwa Muungu eye mojo.

⁴Hwakunenani hivi kwa dzambo ḍya serefano hwiyonayo kwa Muungu kuchiiya na kwa Kirist̯o.

⁵Swiswi ntahu kiḍechonse cha kuhuhendeza hwambe huna uwezo wa kuihenda hi hii kazi. Uwezo wehu unayawa kwa Muungu.

⁶Jeje ndiye ahuwezesee kuwa wahumisi wa hiḍi ḍamano ipfya. Humu mwa hiḍi ḍamano ipfya wantu ntawat̯ii *Sharia yorejweyo, ela wanamut̯ii huyu Ruhu jwa Muungu. Hi Sharia yorejweyo inangiza wantu kufwani, ela huyu Ruhu anangiza wantu maisha ya kiruhu.

⁷Hi Sharia, vitsorovye vikokoraḍwa dzuu ya viḍyae vya mawe. Na ipfoyavigwa kwa hawa wantu, marembo ya Muungu yaonekana na yauhendeza uso wa Musa uyangae. Na hat̯a ingawa yewa yakwaarani, yewa na nguvu za kuwahendeza hawa Waisiraeli watseweza kumud̯eḍea Musa humu usoni. Ikiwa kwamba marembo ya Muungu yaonekana kwipfoyavigwa hi Sharia iyonayeha kufwa,

⁸ehe fat̯i kuyavigwa kwa ayu Ruhu ntakukwaa na marembo makuu zaid̯i?

⁹Koro ikiwa kwamba hi Sharia iyonangiza wantu hukumuni t̯u ina marembo, ḅasi hi injili iyonapfa wantu mupfonyo ina marembo makuu zaid̯i!

¹⁰Hukiyainganya haya marembo makuu yeyopfo hi saasambi na hayaḍe yeyokuwapfo d̯ura, hunaona ya kwamba hayaḍe marembo ya d̯ura ni dza kwamba ntayapfo kawii.

¹¹Koro hichiḍe chichokuwa cha muḍa kiiwa na marembo ḍugha, ela hichiḍe cha kukaa maishi kina marembo makuu zaid̯i!

¹²Kwa dzambo ḍya kwamba huna haya haya madzikwat̯yo, hunanena pfasipfo oga.

¹³Swiswi ntahukwaa wa kudzibiga yuhadzi dza Musa ili hawa Waisiraeli watseyaona haya marembo yakwakwaarani.

¹⁴Akili zao zifinikizika. Na mumpaka yeo akili zao zifinikizwa na jujuḍe yuhadzi wakwakusomejwani vyuo vya ḍamano ḍya kae. Huju yuhadzi junavuka t̯u hapfaḍe pfa muntu epfonamuhikiza Kirist̯o.

¹⁵Na hat̯a yeo, kula wakwakusomani Sharia ya Musa, huju yuhadzi junawafinikiza hizi akili zao.

¹⁶Ela muntu epfonamuperukia Ḅwana, huju yuhadzi junavuka.

¹⁷Ḅwana ndiye huyu Ruhu. Na pfa Ruhu jwa Ḅwana epfonawa, hapfo kuna uhuru.

¹⁸D̯ubva, swiswi huvuijweo hizi ntadzi, hunayanga marembo ya Ḅwana. Na haya haya marembo, yeyonayawa kwa Ḅwana, eye huyu Ruhu, yakuhuperuzani shufa hwakuwani dzae. Na hwakuwani na maremboye makuu zaid̯i na zaid̯i.