Read pokomo 2 Wakorint̯o 6 Bible Online

2 Wakorint̯o 6 - pokomo bible

2 Wakorint̯o 6

¹Swiswi hu wahenda kazi pfamodza na Muungu, ndookomu hwakumuyombani mutseyayatsa haya matsako ya Muungu amuyangiyeyo, yende ḅasi.

²Koro Muungu kamba, “Chiiyocho nikisikia na wakati mwema, na nsiku ya kukupfonya nikupfa ugijo.” D̯ubva, hu huu ndiwo wakati mwema. Yeo ndiyo nsiku ya Muungu ya kukupfonya.

³Ntahut̯aki kazi yehu ionekane na tsowa ḍiḍeḍyonse, ndookomu hwakuḍemani hutseewa mpingamizi kwa yuḍejwonse.

⁴Ishinu, hunayanga kwamba hu wahumisi wa Muungu kwa kula kintu hwichonahenda. Hunait̯isa muno hukwakukuntiswani d̯ina, hunait̯isa kwa maisha momu momu na kwa kula aina ya d̯ina.

⁵Hubigwa na kungizwa gerenzani na kujumwiijwa fuḍyo. Huhendeswa kazi nyumu nyumu, hutsovyegwa sinzizi na kuyagwa nzaa.

⁶Swiswi hudziyanga kuwa wahumisi wa Muungu kwa udheru wehu, kwa namuna huimanyiyevyo hi hachi, kwa kuit̯isa kwehu na kwa wema wehu. Na pia hudziyanga kuwa wahumisi wa Muungu kwa kupfegwa huyu Ruhu Mudheru, kwa tsako ḍyehu ḍya ḍugha kwa wangine,

⁷kwa kusumwiiya haya maagu ya hachi, na kwa nguvu za Muungu ezonahupfa. Maisha yehu ya kuhenda yeyo ya hachi ndicho cheera chehu cha kujwania na cha kudzichingia nacho.

⁸Wantu wangine wanahunenea mema na wangine wakahunenea mazuka; wangine wanahuḍya na wangine wakahushad̯a. Hunakwambigwa hu wansuwe na huku hwakunenani hi ya hachi.

⁹Hunahwajwa dza wantu husiwomanyikana na huku wantu wonse wahumanya. Hunanjia hat̯ari ya kufwa kut̯wa, ela dza mwivyokuhuonani, amaale hwa mojo. Kubigwa hubigwa, ela ntahukufwa.

¹⁰Hat̯a hukingizwa ngiru, tsekea yehu ntaihuyawe kut̯wa. Hunahwajwa dza wantu masikini, ela hunahendeza wantu wenji kuwa majabva wa kiruhu. Hunahwajwa dza wantu husiwo na kiḍechonse na huku huna kula kintu cha kiruhu.

¹¹Watsakwa, swiswi hunena nanywi pfasipfo kumufitsa kintu na myojo yehu huiweka wazi kwenu.

¹²Swiswi amaale humutsaka muno, ela nywinywi ndinywi mwiwokudzigijani-gijani na tsako ḍyenu.

¹³Na sasa nyakunenani nanywi dza wanangu: huyangeni matsako dza hivi vyehu humutsakiyevyo. Hi myojo yenu iwekeni wazi.

¹⁴Namutsedzigijanisa pfamodza na wantu wasiohikiza. Koro ni hangu ari mema na mazuka yakanjiiyana? Ambu, muyanga na kiza vinawezadze kukaa pfamodza?

¹⁵*Kirist̯o na Shaat̯ani ntawawezi kusikiana kwa kiḍechonse! D̯ubva muntu ahikiziye na asiyedzahikiza wananjiiyanadze?

¹⁶*Hekalu ya Muungu inakajwadze ni masanamu? Koro swiswi hu Hekalu ya Muungu eye mojo. Dza vya Muungu aneneyevyo akyamba, “Makao yangu nayambaka kwa wantu wangu, kisa nami naishi kahi yao. Nawa Muungu jwao, nao wanawa wantu wangu.”

¹⁷D̯ubva Ḅwana kakunenani na wantuwe akiwamba, “Hawa wasiohikiza yawanani nao na mudzit̯anye nao. Dziwekeni udheruni, d̯ubva nami namukuḅali.”

¹⁸Kawii, Ḅwana mwenye nguvu zonse kamba, “Mimi nawa baba jwenu, nanywi munawa wanangu wa kike na wa kiyume.”