Read pokomo 2 Wakorint̯o 7 Bible Online

2 Wakorint̯o 7 - pokomo bible

2 Wakorint̯o 7

¹Watsakwa, hizi hizi ahad̯i Muungu kazihuwekea swiswi. D̯ubva nahudzidherese kwa kuyatsa kula kintu chichonaihendeza mii yehu na ruhu zehu kutsaawa nd̯eru. Nahuishi maisha ya udheru muhupfu kwa dzambo ḍya kushooga kumutsowea Muungu.

²Huyangeni haya matsako yenu. Swiswi ntahukumutsowea muntu yuḍejwonse, wala ntahukunanga faro ya muntu, ambu huhwae cha yuḍejwonse na makulekule.

³Sikwakunenani hivi kwa dzambo ḍya kutsaka kumuyavya wansuwe; koro dza nivyonena d̯ura, ni kwamba, humutsaka muno chima cha kwamba, mukifwa ambu mukikaa mojo hunawa pfamodza nanywi.

⁴Nina uhakika nanywi muno, na nyakudzivunani nanywi muno. Hizi d̯ina zonse hukuntiyezo ntazidzaniyaga mojo; ishinu ninjijwa ni tsekea isiyo chima.

⁵Hat̯a hwipfofika Makedonia ntahukupata nsoho. Hukunta d̯ina za kula namuna na kutsowana na wantu wangine, na myojo yehu ihunjia yuhangaiko.

⁶Ela Muungu eyenangiza mojo wantu wafwiyeo mojo, kahuingamaza myojo muno kwa kumuyeha Tito.

⁷Kihungiziyecho mojo si huku kudzakwe t̯u, ela hat̯a haya maagu ahupfiyeyo, ya namuna mumungiziyevyo mojo. Kahusumwiiya namuna mwivyokut̯amanini kuniona, namuna mwivyokudziut̯ini kwa hayaḍe munihendeeyo, na namuna mwivyo t̯ayari kunihehea. Ndookomu sasa tsekea yangu ni nkuu muno.

⁸Hat̯a ingawa hi ḅaruwa nimworeeyo imungiza tsungu, mimi sikwakudziut̯ini kwamba niimworea. Nihambuya kwamba hi ḅaruwa iwa imungiza tsungu, hat̯a ingawa wiwa ni tsungu wa mweedha t̯u, ndookomu nami mwenye niidziut̯i.

⁹Ela sasa nitsekea. Sikutsekea kwa kwamba niimungiza tsungu, ela nitsekea kwamba hu tsungu nimungiziyeo umuhendeza muperuye hizi njia zenu. Iwa ni miro ya Muungu kwamba munjijwe ni hu huu tsungu. Hivi huhendeyevyo ntahukumukukamisa kiruhu.

¹⁰Koro tsungu wa Muungu eonangiza muntu unamumpa kupfyehuza mama, na huku kupfyehuza mama kunamuyehea mupfonyo. Na ntaku jwa kudziut̯i dzuu ya haya haya. Ela tsungu wa kibenaad̯amu unayeha kufwa kiruhu.

¹¹Hu tsungu wenu wiwa ni miro ya Muungu kwenu. T̯ayowani namuna umuhendezeyevyo mukiperuka! Ntamukugala wantu wahiḍu t̯u, ela mugala hat̯a na hamu ya kuniyanga kwamba ntamu tsowa ḍiḍeḍyonse. Haya yahendekeeyo ntayakumutsakiza hat̯a kachuchu, ishinu yamungiza oga kwa haya yadzeyohendeka. Nywinywi ntamukutsaka kuniona t̯u, ela mwiiwa hat̯a na hamu ya kunihehea na kumuadhiḅu huyu mutsovi. Mudziyanga na kula njia kwamba nywinywi ntamu tsowa dzuu ya hiḍi dzambo.

¹²Hiḍe ḅaruwa niyomworea, sikuyora kwa dzambo ḍya huyu muntu ahendeye tsowa wala huyu atsoweejwe. Ela niimworea nipate kumuyanga tswee kwamba Muungu kamanya namuna mudziyaviyevyo kwehu na mojo.

¹³Ndiyo maana hunjiiyeo mojo. Na ntahukunjia mojo t̯u, ela tsekea ya Tito mwenye nayo ihuhendeza huwe na tsekea nkuu zaid̯i. Kahusumwiiya namuna mumuingamaziyevyo mojo.

¹⁴Niimushad̯a nywinywi usoni yakwe, nanywi urembo wenu ntamukunigiza yutswa. Swiswi, hwikimwambia hi ya hachi kut̯wa, na hi shad̯umea huyaviyeo kwa Tito dzuu yenu, ionekana kuwa ya hachi.

¹⁵Tito kakukumbukani namuna mumupfokeeyevyo na hila na kwa umpowe, na namuna yenu nyonse mwivyokuwa t̯ayari kut̯ii chuuwoche. Ndookomu tsako ḍyakwe kwenu ḍyakugijani kukuya.

¹⁶Nina tsekea nkuu muno kwamba naweza kuwa na uhakika nanywi kaḅisa!