Read pokomo 2 Wakorint̯o 9 Bible Online

2 Wakorint̯o 9 - pokomo bible

2 Wakorint̯o 9

¹Ntaku haḍya hat̯a ya kumuhadzia dzuu ya hi mvuugiya ya kupfiikijwa wantu wa Muungu weo Yud̯aya.

²Nimanya ya kwamba nywinywi muna mojo wa kuyavya, na hat̯a nimushad̯a kwa wantu wa Makedonia. Niwamba, “Hawa wandugu wa Akaya, ut̯ayari wao wa kuyavya wanao hangu mwaka dzana.” Hu moho wenu nywinywi uwangiza mojo wangine wenji waḍabve kuyavya.

³D̯ubva nyakuwahumani kwenu hawa wandugu wohahu, mupate kuwayanga kwamba kumushad̯a kwehu dzuu ya hiḍi hiḍi dzambo, si kumushad̯a kwa ḅasi. Ni muwe t̯ayari dza nivyonena kwamba munawa mwaa t̯ayari.

⁴Koro sit̯aki kwamba nidze na wantu wa Makedonia, na wadze waone kwamba mvuugiya yenu ntaidzawa t̯ayari. Maanaye vikiwa hivi, munanigiza yutswa kwa kumuhwaa dza wantu niwo na uhakika nanywi muno! Na simi t̯u, ela hat̯a nanywi munaajaa.

⁵Ndookomu niona ni heri niwayombe hawa wandugu wayongowe wadze kwenu, wadze waiweke t̯ayari hi nt̯unu muahid̯iyeyo kuyavya. Na, chima changu cha kudza inawa yaa t̯ayari. Namutseyavya dza wantu mwiwokusharut̯iswani, ela yavyani kwa dzambo muna mojo wa kuyavya.

⁶Nivyokunenani ni hivi: Huyuḍe aimiye kapand̯ulo anavuna hakahako kapand̯ulo, na huyuḍe aimiye kwa winji anavuna kwa winji.

⁷D̯ubva kula mumodza nayavye dza ahuniyevyo mojoni mwakwe kuyavya. Nakutseewa muntu jwa kuyavya na kudzigija-gija ambu dza kwamba kakusharut̯iswani, koro Muungu katsaka muntu eyenayavya na mojo mumodza.

⁸Muungu ana uwezo wa kumut̯oseza haḍya zenu zonse na hat̯a zaid̯i, ili kwamba akimamut̯oseza na kula njia, munawa na mojo wa ubalicha wa kuyavya kwa kula kazi iyo nyema.

⁹Vinawa dza hivi vya haya matsoro yambiyevyo, “Muntu mwema anawa na mojo wa ubalicha kwa masikini, na wemawe ntausiye meshi.”

¹⁰Muungu ndiye eyenapfa muntu jwa kuima hizi mbeju na akamumpa na chakuḍya. D̯ubva jeje anamumpa hizi mbeju zenu zonse za kuhodza, na anazimeza. Na anauhendeza hu ubalicha wenu unamuvyaiya mavuno makuu.

¹¹Anamuhendeza majabva wa kula namuna, wa kwamba munawa wabalicha kut̯wa. Ndookomu wantu wenji wanamuyaviza Muungu ḍuḍa kwa dzambo ḍya hizi nt̯unu zenu wadzezopfokea kuchiiya na kwehu.

¹²Koro hu uhumisi mwiwokuhendani unat̯oseza haḍya za hawa wantu wa Muungu na unawahendeza wamuyavize Muungu ḍuḍa nyinji na nyinji.

¹³Kuyavya kwenu kunayanga mojo mwiwo nao, na wantu wenji wanamushad̯a Muungu kwa hivi muyahikiziyevyo haya *Maagu Mema dzuu ya *Kirist̯o na kwa namuna mwivyonayat̯ii. Wanamushad̯a Muungu pia, kwa myojo yenu ya ubalicha kwao na kwa wangine.

¹⁴Ndookomu nao wanamuyombea na myojo ya ḍuḍa, kwa dzambo ḍya haya matsako makuu ya Muungu amumpiyeyo.

¹⁵Hunamuyaviza Muungu ḍuḍa kwa hi nt̯unu yakwe ahupfiyeyo, husiyoweza kuipara na vyuuwo.