Read pokomo Wagalatia 1 Bible Online

Wagalatia 1 - pokomo bible

Wagalatia 1

¹Mimi Paulo, niiye *ntumi, pfamodza na hawa wandugu wonse weo pfamodza nami hapfa, hwakumworeani nywinywi wahikiza wa matsanganiko ya ḍyimbo ḍya Galatia. Humukedhya nto! Muungu Baba na Ḅwana jwehu Yesu Kirist̯o nawamuvodhye na kumumpa naghea nto. Ntaku benaad̯amu wala muntu yuḍejwonse anitsaniye mimi kuwa ntumi. Ela Yesu Kirist̯o na Muungu Baba, huyu amufufwiiye Yesu kuyawa kwa wafu, ndiye anitsaniye mimi kuwa ntumi.

⁴Kirist̯o kadziyavya maishaye kahufwiya, apate kuhunwiiya nabvise zehu ili ahupfonye na mazuka ya wantu wa huju huju lumwengu. Hivi kavihenda kuuḅana na miro ya Muungu, eye Baba jwehu.

⁵Muungu ashad̯we maishi na maishi! Amina.

⁶Mwakunimakisani t̯i! Hi hii mala mumakumud̯aramani Muungu amuhaniye muishi t̯eini mwakwe,[1] na mumakuuḅani mayongweezo yangine?

⁷Hayo hayo mayongweezo siyo hi injili ya hachi hat̯a. Kuna wantu weokutsakani kuinanga hi Injili ya Kirist̯o na wakumungizani kuḍanganika.

⁸Ela nichokumwambiani ni hichi: Ikiwa kwamba mumodza jwehu ambu hat̯a malaika jwa kuyawa mbinguni kadza kamusumwiiya injili ingine iyo garagara na hiḍe hwiyomusumwiiya, Muungu namufat̯ule kwa moho usiwozimika!

⁹Hukuḍe nyuma hwiivinena, na sasa nyakuviujiani kawii: Yuḍejwonse eyekumusumwiiyani injili iyo garagara na hiḍe mupfokeeyeyo, Muungu namufat̯ule kwa moho usiwozimika!

¹⁰Avi nivyokunenani, mwakut̯arani ya kwamba nyakulachani kudzitsakiza kwa wanaad̯amu? Sivyo hat̯a! Nichokulachani ni kumutsakiza Muungu. T̯ambere nindeewa nyakulachani kudzitsakiza kwa wanaad̯amu, sindeewa muhumisi jwa Kirist̯o.

¹¹Wandugu zangu, ntamukumanya hivihivi kwamba hi Injili nimusumwiiyeyo ntaikuyawana na mwanaad̯amu?

¹²Mimi sikuipfegwa ni mwanaad̯amu yuḍejwonse wala kuiyongweezwa ni muntu. Huyu ainipfenwiiye ni Yesu Kirist̯o mwenye.[2]

¹³Musikia namuna niishiyevyo nipfokuwa muntu jwa ḍini ya Kiyahud̯i. Niiwakuntisa d̯ina muno wantu wa Muungu na kuḍema kuḍinanga hiḍi tsanganikoḍye.

¹⁴Kahi ya maharia zangu wenji wa Kiyahud̯i, ntaku anifikie kwa kuuḅa hi ḍini ya Kiyahud̯i. Niidziyavya muno kuyauḅa haya maad̯a ya wabibi zehu.

¹⁵Ela Muungu kwa t̯ei yakwe, kanitsana hangu mahumboni mwa mama na kanihana nimuhumikiye. Kahuna

¹⁶kumunipfenwiiya huyu Mwanawe ili nipate kusumwiiya haya *Maagu Mema dzuuye, kwa wantu wa vyeet̯i. Akimamunipfenwiiya Mwanawe akisa, sikulacha maghaghisa ya mwanaad̯amu yuḍejwonse,

¹⁷na wala sikwenda Yerusalemi kwa hawaḍe weokuwa ntumi usoni yangu. Ishinu, iyo saa nyenda nsi ya Araḅuni makisa nidzaniuja Damasiko.

¹⁸Kwipfochia myaka mihahu ḅaad̯a ya Muungu kumunipfenwiiya huyu Mwanawe, ndipfo nidzepfonikyenda Yerusalemi nipate kumanyana na Pet̯ero.[3] Na hukaa pfamodza kwa nsiku kumi na nsano.

¹⁹Nimuona na Yakobo ndugujwe Yesu. Jeje na Pet̯ero ndiwo ntumi wowii t̯u nit̯ongananiyeo nao.

²⁰Nyakumuyapfiyani usoni kwa Muungu kwamba, haya niyokworani si ya nsuwe, nza ḍugha!

²¹Nyumae, nyenda hat̯a ḍanda za ḍyimbo ḍya Siria na ḍyimbo ḍya Kilikia.

²²Haya matsanganiko ya Kirist̯o yeyokuwa ḍyimbo ḍya Yud̯aya, yewa ntayadzaniona yanimanye.

²³Yekinisikia ḅasi maagu ya kwamba, “Huyu muntu eyeakihukuntisa d̯ina, sasa kakuisumwiiyani iiḍe faro eyoakitsaka kuinanga!”

²⁴Ndookomu wamushad̯a Muungu kwa haya anihendeeyeyo.