Read pokomo Wagalatia 6 Bible Online

Wagalatia 6 - pokomo bible

Wagalatia 6

¹Wandugu, muntu akigwa nabviseni, nywinywi mwiwo wangoru kiruhu ni had̯i mumuudzye njiani na umpowe. Ela manyani nanywi pia mutseegwa maḍemoni.

²Tsukwiiyanani mizigo yenu nywinywi na nywinywi, na kwa hi hii namuna munawa kuiuḅani sharia ya *Kirist̯o.

³Koro muntu akidziona kwamba ni muntu jwa maana na huku katsi nkakwaa kintu, huyo kakudzikulani-kulani mwenye.

⁴Kula muntu nadzipime haya mahendoye jeje mwenye, kisa ndipfo adzione kuuḅana na hivi vyakwe mwenye ahendeyevyo, si kwa kudziinganya na vya wangine wahendeyevyo.

⁵Koro kula muntu ni atsukuye muzigo wakwe mwenye.

⁶Hawaḍe weokuyongweezwani chuuwo cha Muungu, ni kuwageya wayongweeza wao hayaḍe mambo mema yao yonse weyonayo.

⁷Namutsedzikulakula mwambe Muungu anaweza kuḍyuuriswa ni muntu! Muntu anavuna echonaima.

⁸Akiima kuuḅana na t̯amaa zakwe nzuka nzuka za kiwanaad̯amu, anavuna mananzi kuyawana na hizi t̯amaa zakwe. Ela eyenaima kuuḅana na huyu Ruhu, anavuna maisha ya kuunga na yuungo kuyawana na huyu Ruhu.

⁹Nahutsetsoka kuhenda mema, koro hukitsaafwa mojo, nsiku idzakudza hudzepfovuna mema.

¹⁰D̯ubva, nahuhende mambo mema kwa wantu wonse kula hwipfonapata namfasi. Na haswa nahuwahendeye mema hawaḍe weo wahikiza wenzehu.

¹¹T̯ayowani hivi vitsoro vikuu vikuu nivyokumworeani navyo na mukono wangu mwenye!

¹²Hawaḍe weonatsaka kudzitsakiza kwa wantu ndiwo weokuḍemani kumusharut̯isa muhinywe. Wanahenda hivi ili t̯u watsekuntiswa d̯ina kwa dzambo ḍya kusumwiiya kwamba, Kirist̯o kafwa muhini mwa mpatsa ahupfonye.

¹³Hat̯a nao, wao wahinyijweo, ntawakwakuziuḅani hizi *Sharia zonse. Ela wanatsaka muhinywe wapate kudzishad̯a dzuu ya kuhinywa kwenu.

¹⁴Ami le, heri nitsedziona kwa dzambo ḍiḍeḍyonse, lamud̯a hiḍi ḍya kufwa muhini mwa mpatsa kwa Ḅwana jwehu Yesu Kirist̯o. Koro, kwa dzambo ḍya huko huko kufwakwe, mambo ya huju lumwengu sasa ntaya maana kwangu, nami si maana kwa huju lumwengu.

¹⁵Kuhinywa ambu kutsahinywa kwa muntu ntaku maana yaḍeyonse. Cha mud̯a ni kwamba muntu awe kiumbe kipfya.

¹⁶Na naghea na mvoni za Muungu naziwe kwa hawaḍe wonse wadzeovigija hivi vyuuwo, koro wao ni wantu wa Muungu ḍugha.

¹⁷Hangu hi hii saasambi, si haḍya ya muntu jwa kuningiza d̯inani kawii. Koro hizi mad̯a zizo humu mwiini mwangu zakuyangani hachi kwamba mimi ni jwa Yesu.

¹⁸Wandugu, t̯ei ya Ḅwana jwehu Yesu Kirist̯o naiwe pfamodza nanywi nyonse. Amina.