Read pokomo Waefeso 2 Bible Online

Waefeso 2 - pokomo bible

Waefeso 2

¹Nywinywi, d̯ura mwiiwa dza wantu mufwiyeo kwa dzambo ḍya kutsamut̯ii Muungu kwenu na kwa dzambo ḍya mahendo yenu yangine ya nabvise mwiyomukihenda.

²Mwikiuḅa mazuka ya wantu wa huju lumwengu na kumut̯ii mut̯awala jwa hizi mpepfo nzuka zizonaishi humu angani. Hii ndiyo ruhu ya mazuka iyokuwat̯awalini hawaḍe wonse wasiotsaka kumut̯ii Muungu.

³Naswi swiswi, hwonse d̯ura hwiiwa dzao. Hwikidzitsekeza myojo yehu na kula zuka, hukiuḅa t̯amaa zehu nzuka nzuka na mat̯aro yehu ya kiwanaad̯amu. Swiswi, dza wanaad̯amu wangine wonse, hwiiwa wantu wa kwamba Muungu andehuadhiḅu kwa dzambo ḍya kumurejesa na nabvise zehu.

⁴Ela hat̯a vivyo, kwa dzambo ḍya matsakoye makuu kwehu, Muungu kahufwiya t̯ei muno.

⁵Ingawa hwiwa dza wantu hufwiyeo kwa dzambo ḍya mazuka hwiyohukihenda, Muungu kahufufuya dza viviḍe amufufwiiyevyo *Kirist̯o na kahupfa maisha mapfya pfamodza nae. Mupfonywa kwa t̯ei ya Muungu t̯u.

⁶Jeje kahufufuya dza hiviḍe vya Kirist̯o na kahupfa kukaa pfamodza nae mbinguni kwa kwamba hwaa hariani mwa Kirist̯o.

⁷Muungu kahenda hivi ili kwamba, ngera zonse zidzezokudza, wantu waone namuna aivyo mut̯ei kuchia chima kuchiiya na kwa Kirist̯o Yesu.

⁸Mupfonywa kwa t̯ei ya Muungu t̯u kwa kwamba mumuhikiza Kirist̯o. Ela ntamukupfonywa kwa dzambo ḍya mema yaḍeyonse muhendeyeyo. Hu mupfonyo mupatiyeo ni t̯ola ya Muungu amumpiyeyo. Ndookomu nakutseewa jwa kudziona.

¹⁰Muungu ndiye ahuhendezeye kuwa kintu kimodza na Kirist̯o Yesu, ili hupate kukaa na kuhenda haya mema ahutsaniiyeyo kwamba huyahende.

¹¹Nywinywi musiokuwa Wayahud̯i hangu kuvyajwani kwenu, kumbukani mwivyokuwa hapfaḍe d̯ura. Hawa Wayahud̯i, weonadzihana wantu wa Muungu kwa kwamba wahinywa, nywinywi wekimuhana wantu musiwodzahinywa. Ela muntu akihinywa, anaperuka na hapfa dzuu t̯u, maanaye hiḍyo ni hendo ḍya kiwanaad̯amu.

¹²Kumbukani kwamba mwiiwa ntamumudzi Kirist̯o kwamba ni ga. Na ntamwiiwa wantu wa kyeet̯i cha Muungu atsaniyecho, mwiiwa dza wageni. Ntamwiiwapfo kwa haya maḍamano ya Muungu ahendeyeyo na wantuwe akiwapfa ahad̯i ya kuwapfonya. Muishi humu lumwenguni pfasipfo madzikwat̯yo yaḍeyonse, na wala ntamwimumanya Muungu.

¹³D̯ura mwiiwa wantu mwiwokuwa kuye na Muungu. Ela sasa mwaa hariani mwa Kirist̯o Yesu. Muungu kamunuha hafufi nae kuchiiya na kwa hu mwazi wa Kirist̯o ehiyeo muhini mwa mpatsa kwa dzambo ḍyenu.

¹⁴Kirist̯o mwenye kangiza naghea kahi yehu swiswi Wayahud̯i na wantu wasikwaa Wayahud̯i. D̯ura hu uad̯ui wiwokuwapfo kahi yehu, wiwa ukaa dza kiwambaa kihugawiyecho. Ela sasa, hichi hichi kiwambaa Kirist̯o kachivunza, na kahuhendeza huwe wantu wamodza.

¹⁵Kwa kufwakwe, Kirist̯o kainuya hi *Sharia ya Kiyahud̯i yonse. Kahenda hivi ili kwamba awahendeze hawa wantu wowii, yani Wayahud̯i na wantu wasiokuwa Wayahud̯i, wawe wantu wamodza waungananiyeo nae. Na kwa kuhenda hivi, kangiza naghea kahi yao wao na wao.

¹⁶Kwa kufwakwe muhini mwa mpatsa, Kirist̯o kanuya uad̯ui kahi yao na kangiza mapatano yao wao na Muungu.

¹⁷Kirist̯o kadza lumwenguni, na kasumwiiya *Maagu Mema ya naghea kwenu nywinywi mwiwokuwa kuye na Muungu na kwehu swiswi Wayahud̯i hwiwokuwa hafufi na Muungu.

¹⁸Na kwa dzambo ḍya hivi vya Kirist̯o ahendeyevyo, hwonse hupata njia ya kumwendea Muungu Baba jwehu, hukigijiijwa ni yuyo Ruhu mumodza.

¹⁹D̯ubva, nywinywi musiokuwa Wayahud̯i, sasa ntamukwaa wageni ambu wantu wa nze kawii. Mugala wantu wa nyumba modza ya wantu wonse wa Muungu.

²⁰Nywinywi mwaa dza mawe yambakijweyo dzuu ya hu musinji uwekejweo ni hawa *ntumi na manabii. Na Yesu Kirist̯o mwenye ndiye hiḍi iwe muhimu ḍya mwiso.

²¹Na kwa dzambo ḍyakwe, hiḍi mbako ḍyonse ḍigijana gu. Kakuḍihendezani ḍikuye na ḍiwe Hekalu nd̯eru ya Ḅwana.

²²Ndookomu kuchiiya na kwa Kirist̯o, nywinywi musiokuwa Wayahud̯i nanywi mwakuunganywani na hawa wantu wonse wa Muungu, muwe Hekalu ya Muungu ya kukaa kuchiiya na kwa huyu Ruhu jwakwe.