Read pokomo Wafilipi 1 Bible Online

Wafilipi 1 - pokomo bible

Wafilipi 1

¹Mimi Paulo na Timoteo, hwiwo wahumisi wa *Kirist̯o Yesu, hwakumworeani nywinywi wantu wa Muungu nyonse mwiwo Filipi na mwiwokuishini hariani mwa Kirist̯o Yesu. Hwakumworeani nanywi nywinywi wahumisi na wayongozi wa matsanganiko.

²Muungu Baba na Ḅwana jwehu Yesu Kirist̯o nawamuvodhye na kumumpa naghea nto.

³Kula mweedha nipfonamut̯ara nywinywi, namuyaviza ḍuḍa huyu Muungu jwangu.

⁴Na kula nikwakumuyombeani nyonse, nakaa nikamuyombea na tsekea

⁵kwa dzambo ḍya ḍuḍa niyonayo kwa namuna mugijananiyevyo nami kwa hi kazi ya kusumwiiya haya *Maagu Mema, hangu nsiku ya d̯ura muhikiziyeyo hat̯a hi hii saasambi.

⁶Ndookomu nina uhakika kwamba, huyu Muungu aḍabvisiye kazi nyema myojoni mwenu, anagija kuihenda hat̯a idzepfosia Nsiku ya Kirist̯o Yesu adzepfokudza.

⁷Gula nina hachi ya kumuhwaiya dzevihivi, koro nimutsaka muno. Na hangu nipfokuwa huru kuyahehea na kuyangizia nguvu haya Maagu Mema, na hat̯a hivi hivi niivyo mufungwa, nywinywi nyonse mushirikiana pfamodza nami hizi mvoni za Muungu animpiyezo.

⁸Hat̯a Muungu mwenye kamanya kwamba nyakunenani hachi, nikyamba nimutsaka na tsako dza hiḍiḍe ḍya Kirist̯o Yesu mwenye.

⁹Na nyakumuyombeani kwamba, tsako ḍyenu kwa wangine ḍikuye zaid̯i na zaid̯i na muweze kumanya na kuimuka mambo ya kiruhu,

¹⁰ili kwamba muweze kutsana hayaḍe yeyo mema ya mwiso. Ndookomu nanywi ntamuwe na kat̯amba kaḍekonse wala alano hat̯a nsiku ya Kirist̯o adzepfokudza.

¹¹Maisha yenu yadzadzaa mahendo mema ya ḍugha yeyonayehegwa ni Yesu Kirist̯o mwenye. Na kwa hi hii njia, Muungu anashad̯wa na kuhilwa.

¹²D̯ubva wandugu zangu, natsaka mumanye kwamba hivi vinihendekeeyevyo, visaiḍia muno kud̯achaa kwa haya Maagu Mema.

¹³Falaulaye, hawa asikari wonse wa hapfa nyumbani pfa haju, pfamodza na hawa wantu wangine wonse, wamanya kwamba ningizwa gerenzani kwa dzambo ḍya kumuuḅa Kirist̯o.

¹⁴Na kwa dzambo ḍya kufungwa kwangu, wenji wa hawa wandugu wagija kumuserefat̯a Ḅwana na wanjia mojo wa kuchisumwiiya hichi chuuwo cha Muungu pfasipfo oga.

¹⁵Gula ni ḍugha kwamba wangine wanasumwiiya dzuu ya Kirist̯o kwa dzambo ḍya ḍea na kuhendeza wantu wayawane mama, ela wangine wakuyasumwiiyani kwa nia nyema.

¹⁶Hawa hawa wakuvihendani wakiwa na matsako, koro wamanya kwamba Muungu kainimpa hi hii kazi ya kuyahehea haya Maagu Mema.

¹⁷Ela hao wangine ntawakae na kusumwiiya dzuu ya Kirist̯o na myojo myema hat̯a. Wanakaa na kusumwiiya kwa kudzilachia makuu, wakit̯ara kwamba wananyongezea tsungu wiwokunipatani humu gerenzani niimo.

¹⁸Ae muntu akisumwiiya kwa nia nyema ambu akidzihendeza ḅasi, ami nina d̯ina ga? Ḅora t̯u haya maagu dzuu ya Kirist̯o yasumwiijwe. Na kwa dzambo ḍyevihivi mimi nina tsekea muno! Kisa amaale nagija kutsekea,

¹⁹koro nimanya kwamba kwa dzambo ḍya haya mayombo yenu na hu ugijo wa huyu Ruhu jwa Kirist̯o Yesu, nayatsigwa huru.

²⁰Hamu yangu nkuu na madzikwat̯yo yangu ni kwamba nitsehenda kiḍechonse cha kunigiza yutswa. Ela meshi natsaka kumuhumikia Kirist̯o pfasipfo oga uḍewonse dza nivyonikihenda iiḍe. Na natsaka kwamba nikikaa mojo ambu nikifwa, mimi nimukuzye Kirist̯o na haya mahendo yangu.

²¹Koro ami kivyangu, ninkiishi nagija kumukuzya Kirist̯o na nikifwa pia ni faiḍa kwangu.

²²Ela ikiwa kwamba nikwakuishini naweza kuhenda kazi iyo na faiḍa zaid̯i, d̯ubva sidzi kwamba nyambe natsaka vi!

²³Ndookomu nyakuḍanganikani kwamba, kahi ya haya haya mambo mowii nyambe natsaka ḍi. Nyakut̯amanini kufwa ili ninkakae pfamodza na Kirist̯o, dzambo ḍiḍyo dzema muno kwangu.

²⁴Ela kawii kwa dzambo ḍyenu, ni urembo zaid̯i ninkikaa mojo.

²⁵Nina uhakika weḍihiḍi dzambo, ndookomu nimanya kwamba nagija kuishi pfamodza nanywi nyonse ili mupate kukuya kiruhu na kutsekea zaid̯i kwa dzambo ḍya kuhikiza kwenu.

²⁶Ḅasi nidzepfowa pfamodza nanywi kawii, munapata saḅaḅu nkuu zaid̯i ya kumushad̯a Kirist̯o Yesu kwa dzambo ḍyangu.

²⁷Cha mud̯a t̯u ni kwamba, maisha yenu ni yaingane ḍa na hivi vya hi injili ya Yesu Kirist̯o ivyonatsaka. Ni yawe hivi ili kwamba, ninkiweza kudza kwenu ambu ninkitsaweza kudza, nangaa nisikiye kwamba musumama urembo mukiwa na kusuḍi modza, na mukiwa kuiheheani kwa umodza hi faro yenu mwiyonayo kwa haya Maagu Mema.

²⁸Hawa weokumupfingani namutsewashooga hat̯a kachuchu. Na hivi vinawahendeza wanahambuya tswee kwamba wao wanashindwa ela nywinywi munashinda, koro eyenamumpa kushinda ni Muungu.

²⁹Koro hi hii namfasi maalumu mupfegejweyo, ntamukuipfegwa kwa kumuhikiza Kirist̯o t̯u, ela hat̯a na kwa kukuntiswa d̯ina kwa dzambo ḍyakwe.

³⁰Mimi nanywi hwakujwanani viha vimodza! Ni viviḍe viha mwivyoniona ninkijwana hangu iiḍe. Na dza mwivyokusikiani, ndivyo nivyokuvijwanani hat̯a hi hii saasambi.