Read pokomo Wafilipi 2 Bible Online

Wafilipi 2 - pokomo bible

Wafilipi 2

¹D̯ubva ikiwa kwamba kumuhikiza kwenu *Kirist̯o kunakaa na kumungiza mojo, na tsakoḍye ḍinamuingamaza, na ikiwa kwamba munakaa na kuwa na haria na huyu Ruhu Mudheru, na munatsakana na kufwiyana t̯ei nywinywi na nywinywi,

²namuyomba munitsekeze kaḅisa kaḅisa. Nitsekezani kwa kuwa na mat̯aro mamodza, na kwa kutsakana nywinywi na nywinywi na muwe na mojo mumodza na kuhenda kumodza.

³Namutsehenda dzambo ḍiḍeḍyonse na umimi ambu kwa kulacha kudziona. Ela wani na myojo ya umpowe, mukiwahwaa wangine kuwa ḅora zaid̯i kumuchia nywinywi wenye.

⁴Kula mumodza jwenu natsemuud̯amia haya mamboye jeje heket̯u ḅasi, ela wamuud̯amiyeni na wenzenu pia.

⁵Wani na mojo dza uuḍe wa Kirist̯o Yesu eokuwa nao.

⁶Ingawa ewa na asili ya Umuungu, ela jeje hukuḍe kuwa sawa na Muungu, nkakukuhwaiya kuwa dzambo ḍya kuḍihabvaka gu.

⁷Kwa kutsaka kwakwe jeje mwenye, hayo hayo yonse kayajibat̯a. Kadziweka dza muhumisi, na kawa dza mwanaad̯amu.

⁸Na akimaawa dza mwanaad̯amu, kadzisusya nsii, na kat̯ii hat̯a adzepfoakifwa, kifo cha kinyaya muhini mwa mpatsa.

⁹Na kwa dzambo hiḍyo, Muungu kamukuzya, na kamuhendeza akae pfantu pfa hila nkuu pfa mwiso. Kamumpa sari ḍiiḍyo kuu kuchia masari yonse.

¹⁰Ndookomu kwa kuḍihila sari ḍya Yesu, kula ḍikihadzwa viumbe vyonse, viivyo mbinguni dzuu, nsii lumwenguni, na hat̯a viivyo lumwengu jwa wafu, ni had̯i vimuvunziye nkuhi.

¹¹Na kula mumodza anene kwamba Yesu Kirist̯o ni Ḅwana kwa dzambo ḍya kumumpa shad̯u Muungu Baba.

¹²D̯ubva watsakwa, dza mwiivyomukinit̯ii kut̯wa nipfokuwa pfamodza nanywi, ḅasi hat̯a hivi hivi niivyo kuye nanywi gijani kunit̯ii. Gijani kuhenda mema, mukimushooga Muungu muno kuzimuni mwa maisha yenu ya mupfonyo.

¹³Koro Muungu ndiye eyekuhendani kazi kuzimuni mwenu, apate kumumpa mojo na nguvu za kuhendea hayaḍe yeyonamutsakiza jeje.

¹⁴Hendani kula kintu pfasipfo kuḅuguma wala kushindana

¹⁵ili kwamba muweze kuwa wantu wasio t̯amba ambu alano iḍeyonse. Ni muwe dza wana wema wa Muungu weokuishini lumwengu jwa wantu wazuka na wanangikiyeo. Yangaani dza muyanga kahi yao,

¹⁶huku mukikigija gu hichi chuuwo chichonawapfa wantu maisha. Mukihenda dza hivi, ndipfo nami nsiku ya Kirist̯o adzeyokudza nawa na saḅaḅu ya kudzivunia, koro idzayanga tswee kwamba hi kazi nihendeyeyo sikufwa ḅasi.

¹⁷Hat̯a ikiwa kwamba mimi ni kuyavigwa dza sehemu ya hi mvuugiya mwiyokumuyavizani Muungu kwa dzambo ḍya serefano yenu kwakwe, mimi nya t̯ayari na natsaika pfamodza nanywi nyonse.

¹⁸Dza vivyo nanywi ni had̯i mutsekeye pfamodza nami.

¹⁹Nyakuyoweeyani kwamba, Ḅwana akitsaka, namuhuma Timoteo kwenu si hat̯a kae ili kwamba niweze kunjia mojo nidzepfopata maagu dzuu yenu.

²⁰Hapfa si muntu yungine eyenamumuud̯amia nywinywi na mojo dza Timoteo.

²¹Hawa wangine wonse wakumuud̯amiani mambo yao wao wenye ḅad̯ala ya kumuud̯amia haya mambo ya Yesu Kirist̯o.

²²Ela nywinywi wenye mumanya namuna ya Timoteo aivyo muntu mwema. Mimi nae hwiiwa dza muntu na mwanawe. Kanigijiija kuhenda kazi ya kuyasumwiiya haya *Maagu Mema.

²³Nina madzikwat̯yo kwamba nidzepfomanya namuna ya haya mambo yadzevyonyendea t̯u, namuhuma kwenu.

²⁴Nina hakika kwamba, Ḅwana akitsaka, nakudza huko huko kwenu si hat̯a kae.

²⁵Niona urembo kwamba nguzi nimugaliche ndugu Epafurodito kwenu. Jeje ni muhenda kazi mwenzangu hwiyekuijwaniani pfamodza hi injili. Na ndiye muhumiyee kudzanigija ninkiwa na t̯uri.

²⁶Nyakumuhumani kwenu, kwa dzambo ana hamu muno ya kudzamuona nyonse. Jeje kakuhangaikani kwamba mumupata maagu kwamba ni mujwazi.

²⁷Gula ndivyo ḍugha. Ewa mujwazi muno hat̯a echamba afwe. Ela Muungu kamufwiya t̯ei, na hat̯a nami pia kanifwiya t̯ei nitsekudzapatwa ni tsungu zaid̯i ya hu nionao.

²⁸Ndookomu nyakutsakani muno kumuhuma kwenu haraka ili kwamba mudzepfomuona, munjie tsekea kawii na hi ngiru yangu iniyawe.

²⁹D̯ubva mupfokeyeni na tsekea yonse dza muntu jwa Ḅwana. Wahileni na wangine wonse weo dzae,

³⁰koro ewa kayangiza hat̯arini haya maishaye hat̯a echamba afwe kwa dzambo ḍye kazi ya Kirist̯o, ili aweze kuunimpa hu ugijo musioweza kuuniyeheya nywinywi wenye na mukono.