Read pokomo Wafilipi 4 Bible Online

Wafilipi 4 - pokomo bible

Wafilipi 4

¹D̯ubva wandugu zangu watsakwa, gijani kumuserefat̯a Ḅwana dzevyo. Mimi nina kaja ya kumuona muno! Munakaa na kunitsekeza muno na nakaa na kudzihonga nanywi muno!

²Eyodia na Suntike, nyakumuyombani muvinene hivi vyuuwo vyenu na mupatane kawii dza wake wamuhikiziyeo Ḅwana.

³Nawe pia ndugu muhikizika, wiye muhenda kazi mwenzangu, natsaka uwasaiḍie hawa wake hawa waimukane. Koro wahenda kazi na hiḍu kunigijiija nikwakuyasumwiiyani haya Maagu Mema. Wanigijiija wao na Kilementi, na hawa wahenda kazi wenzangu wangine wonse, ambao masari yao yoregwa kuzimuni mwa Chuo cha Maisha.

⁴Meshi tsekeani muno kwa kwamba mwaa hariani mwa Ḅwana. Makisa nyakuvimwambiani kawii, tsekeani!

⁵Wani wampowe kwa wantu wonse. Ḅwana ka hafufi kudza.

⁶Namutsemuud̯ama dzuu ya dzambo ḍiḍeḍyonse, ela kwa kula hali, ikaani na kumuyomba Muungu mukimwambia haḍya zenu. Na ikaani mukimuyaviza ḍuḍa kut̯wa.

⁷Ndookomu hi naghea ya Muungu husiyoiimuka na mama za kiwanaad̯amu, inamuingamaza. Kwa njia ya hi hii naghea, *Kirist̯o Yesu anagija kumut̯awala myojo yenu na akili zenu.

⁸Mwiso wandugu zanguni, ikaani mukit̯aria mambo mema, mambo ya hachi na mambo yasiyohwajwa kuwa mazuka. T̯ariani mambo yeyo ya ḍugha, kuwa na t̯aḅia nyema, mambo ya udheru, mambo ya kutsakiza na mambo yeyo ya hila.

⁹Meshi ikaani mukiyahenda haya mudziyongweezeyeyo kuyawa kwangu. Hangu mambo munisikiiyeyo ninkinena, na hat̯a munioneyeyo ninkiyahenda. Na Muungu, huyu eyenahupfa naghea anawa nanywi.

¹⁰Nina tsekea nkuu muno kwa Ḅwana, kwa dzambo nangaa sasa mupata namfasi ya kuyanga muud̯ama mwiyonayo kwangu. Nimanya kwamba hangu iiḍe mwikinimuud̯amia, ela ntamwikipata hi namfasi t̯u ya kudziyanga.

¹¹Sikwakunenani hivi at̯i kwa dzambo nina t̯uri hat̯a. Mimi nidziyongweeza kufuruma na kula hali niyonawa nayo.

¹²T̯uri niumanya na hali ya kuwa na vinji pia niimanya. Nidziyongweeza hi hii siri ya kwamba ngera zonse na pfaḍepfonse nipfonawa, ninkiwa na kufa ambu ninkiwa na nzaa, ninkiwa na vya kut̯osa ambu ninkiwa na t̯uri, mimi nafuruma na kula hali.

¹³Naweza kuit̯isa kwa hali zonse kuchiiya na kwa Kirist̯o eyenanimpa nguvu.

¹⁴Gula muhenda urembo muno kuyanga ushirikiano wenu nami kwa kunimpa ugijo ninkiwa mad̯inani.

¹⁵Nywinywi Wafilipi wenye muvimanya urembo kwamba, nipfonuka na ḍyimbo ḍya Makedonia hiziḍe ngera nidziyezo ninkimusumwiiya haya Maagu Mema mweedha wa d̯ura, hiḍi tsanganiko ḍyenu ndiḍyo ḍiḍyo heket̯u ḍinimpiyeḍyo ugijo.

¹⁶Koro hat̯a nipfokuwa Tesalonike, nipfonikitsaka ugijo, nywinywi muniyehea ugijo[1] hat̯a zaid̯i ya mweedha mumodza.

¹⁷Si ya kwamba nyakutsakani munit̯oleye vyenu ḅasi, ela nichokutsakani ni kwamba Muungu amuvodhye muno, kwa dzambo ḍya kunimpa ugijo.

¹⁸Nisakupfokea ugijo mwema muno kuyawa kwenu, ndookomu sasa nina vinji kuchia hivi nivyonatsaka. Si t̯uri kawii kwa dzambo hizi nt̯unu mumumpiyezo Epafurodito aniyeheye nisakuzipfokea. Hachi zinatsakiza dza harufu nyema ya mvuugiya ya kutsomwa iyonayavigwa kwa Muungu, ikamutsakiza nae akaikuḅali.

¹⁹Na huyu Muungu jwangu niyenamuhumikia namut̯imiziye haḍya zenu zonse kuyawana na jabvawe mwinji eo nao, eonamumpa kuchiiya kwa Kirist̯o Yesu.

²⁰Muungu Baba jwehu ashad̯we maishi na maishi, Amina.

²¹Nikedhyeani hawa wantu wonse weo wa Kirist̯o Yesu. Hawa wandugu nionao huku wamukedhya nto.

²²Na hawa wantu wa Muungu wonse wa huku nao pia wamuyehea kedhya zao, haswa hawa weonahenda kazi nyumbani mwa huyu haju.

²³T̯ei ya Ḅwana jwehu Yesu Kirist̯o naiwe pfamodza nanywi nyonse.