Read pokomo Wakolosai 4 Bible Online

Wakolosai 4 - pokomo bible

Wakolosai 4

¹Nywinywi mwiwo na wahumwa, wahendeyeni wahumwa wenu yeyo hachi usoni kwa Muungu, namutsewakaiya chihako. Kumbukani kwamba hat̯a nanywi mu wahumwa wa huyu Ḅwana eye mbinguni.

²Gijani kuyomba kut̯wa. Na mukwakuyombani, chimizani na mukae mukimuyaviza ḍuḍa Muungu.

³Ikaani mukihuyombeya naswi, ili Muungu apate kuhufungwiiya njia ya kuisumwiiya wantu hi ngadzi dzuu ya *Kirist̯o. Koro mimi nya gerenzani kwa dzambo ḍya kusumwiiya haya haya maagu dzuu ya Kirist̯o.

⁴Niyombeani kwamba niweze kuyasumwiiya haya maagu na njia ya kwamba yanaimukika, dza ivyonanimala kuhenda.

⁵Hawa wantu wasiokuwa wahikiza ikaani nao na ukaruma, mukiwambia dzuu ya Kirist̯o kula mwipfonapata namfasi.

⁶Mukwakunenani nao, nenani nao na umpowe, wapate kunuhika na hivi vyuuwo mwivyonanena. Ndookomu nanywi munamanya namuna ya kwambukuya kula muntu.

⁷Nyakumuhumani Tukiko kwenu adzeamumpe maagu dzuu yangu. Jeje ni ndugu muhikizika humutsakiyee muno. Ni muhumisi mwenzehu eyekunigijiijani kuhenda kazi ya Ḅwana. Nimuhuma byeka adzeamungize mojo na amumpe maagu dzuu ya hali yehu huku huiko.

⁹Nyakumuhumani jeje na Onesimo. Onesimo ni ndugu muhikizika humutsakiyee muno, eye mumodza jwenu. Jeje na Tukiko wanamumpa maagu dzuu ya kula kintu.

¹⁰Huku gerenzani niiko, nya pfamodza na Arisitako. Jeje na Marko ndugujwe[6] Baranaba, wamukedhya nto. Marko akidza kwenu mupfokeeni urembo dza mwivyokwambijwa.

¹¹Yesu eyenahanwa Yust̯o nae pia kamukedhya nto. Kahi ya hawa wahumisi wenzangu, hawa hawa wohahu ndiwo wahikiza Wayahud̯i t̯u weokunigijiijani kuhenda kazi ya kusumwiiya dzuu ya Uhaju wa Muungu. Hawa wantu wohahu waningiza mojo muno.

¹²Epafuro, muhumisi jwa Kirist̯o Yesu, kuyawa mudzini kwenu, nae kamukedhya nto. Kakumuyombeani muno kwamba Muungu amumpe kungora kiruhu, na muwe na uhakika wa hivi vya Muungu evyonatsaka muhende.

¹³Mimi mwenye niona namuna amumuud̯amiiyevyo nywinywi na wahikiza wenzenu weo midzi ya Laodekia na Hirapoli.

¹⁴Mutsakwa Luka, huyu ḍakit̯ari, pfamodza na D̯ema wamukedhya nto.

¹⁵Nikedhyeani wahikiza wonse weo Laodekia, na munikedhyeyeni na Nimfa na hiḍi tsanganiko ḍiḍyonayomba humu nyumbani mwakwe.

¹⁶Mukisa kuisoma hi hii ḅaruwa, ipfiikiyeni na wantu wa tsanganiko ḍya Laodekia wakaisome. Nanywi pia hwaani hi ḅaruwa niworeeyo wao mukaisome tsanganikoni kwenu.

¹⁷Mwambeni Arikipo ahakikishe kwamba kaihenda kaisa hi kazi ya Ḅwana amumpiyeyo.

¹⁸Mimi Paulo nyakumworeani hi hii kedhya na mukono wangu mwenye. Namutsekwaarerwa kuniyombea hivi niivyo gerenzani. T̯ei ya Muungu naiwe pfamodza nanywi. Ikaani naghea.