Read pokomo 1 Watesalonike 2 Bible Online

1 Watesalonike 2 - pokomo bible

1 Watesalonike 2

¹Wandugu zangu, hat̯a nywinywi wenye mumanya ya kwamba, hichi charo chehu hudziyecho kwenu ntahukufwa ḅasi.

²Nywinywi wenye, mumanya namuna ya wantu wa mudzi wa Filipi wahukuntisiyevyo d̯ina na kuhuhendea mambo mazuka mazuka. Ela hat̯a vivyo, Muungu kahupfa mojo wa kudza kwenu hudzehumusumwiiye haya maagu yakwe mema, hat̯a ingawa huku kwenu nako kwiwa upinzani mukali.

³Swiswi kusumwiiya kwehu ntahukumusumwiiya mambo ya nsuwe, wala ntahwiiwa na nia nzuka ambu hutsake kukulakula muntu.

⁴Kusumwiiya kwehu hunasumwiiya dza wantu wa Muungu atsakizijweo nao. Jeje kahuona wantu wahikizika na kahupfa kazi ya kusumwiiya *Maagu Mema dzuu ya Yesu *Kirist̯o. Naswi hukwakusumwiiyani, ntahusumwiiye kutsakiza wantu, hunasumwiiya kumutsakiza Muungu aimanyiye hi myojo yehu.

⁵Nywinywi wenye mumanya, na Muungu nae ni shaahiḍi, kwamba, hwipfokudza kwenu kumusumwiiya, ntahukumudzia na vyuuwo vya nsuwe ambu vya kumuhalahala hupate kufaiḍi kuyawa kwenu.

⁶Swiswi ntahukudzilachia kushad̯wa ndinywi ambu muntu yungine yuḍejwonse.

⁷Gula, kwa dzambo ḍya kwamba hu *ntumi wa Kirist̯o, t̯ambere hutsakiye kudziyanga mamulaka hwiyonayo kwenu, hundevihenda. Ela hwipfokudza kwenu, humuhwaa na umpowe dza hiviḍe vya muke evyonakwamusa na kut̯unza wanawe.

⁸Swiswi hwiiwa humutsaka muuno! Hwiimutsaka chima cha kwamba, ntahukumusumwiiya hichi chuuwo cha Muungu t̯u, ela humumpa kula hwichokuwa nacho pia.

⁹Nywinywi wenye, wandugu, mumanya namuna huhendeyevyo kazi na hiḍu muno! Koro hwipfohukisumwiiya chuuwo cha Muungu kwenu, hufwa kudzihendea kazi siku na musikahi ili hutseewa muzigo kwenu.

¹⁰Nywinywi mu mashaahiḍi, na Muungu mwenye nae ni shaahiḍi, kwamba, hwipfokuwa kahi yenu nywinywi muhikiziyeo, huishi maisha ya udheru, yamutsakiziyeyo Muungu na yasiyokuwa na t̯amba zuka ḍiḍeḍyonse.

¹¹Nywinywi wenye mumanya kwamba swiswi hwikimuhwaa dza hiviḍe vya babajwe muntu evyonawahwaa wanawe.

¹²Hwikimuingamaza na kumungiza mojo, na hwikimufunda kut̯wa mutseyatsa kuishi maisha ya kuyanga kwamba mu wantu wa Muungu. Koro jeje kamuhana munjie maremboni mwa uhajuwe.

¹³Swiswi huna saḅaḅu ya kumuyaviza ḍuḍa Muungu kut̯wa. Na saḅaḅu yehu ni kwamba, hwipfomusumwiiya chuuwo cha Muungu, nywinywi mukihikiza dza chuuwo cha Muungu. Ntamukuchihwaa dza chuuwo cha mwanaad̯amu, ela muchihwaa dza chuuwo cha Muungu ḍugha. Na hichi hichi chuuwo, chakumuhendezani nywinywi muhikiziyeo, muishi maisha mema.

¹⁴Wandugu zanguni, yayaḍe yayapatiyeyo haya matsanganiko ya Muungu yamuhikiziyeo Kirist̯o Yesu hukuḍe Yud̯aya, ndiyo yamupatiyeyo nanywi. Yani, mukuntiswa d̯ina ni wantu wa kyeet̯i chenu wenye dza viviḍe vya hawa Wakirist̯o Wayahud̯i wakuntisijwevyo d̯ina ni wantu wa kyeet̯i chao.

¹⁵Wao Wayahud̯i, ndiwo wamuyagiyeo Ḅwana jwehu Yesu na manabii wangine wa Muungu. Na ndiwo wao wahukuntisiyeo d̯ina na kuhud̯aramisa kula hwendeyepfo. Hivi ntavikwakumutsakizani Muungu. Wao, kula muntu wanamupfinga

¹⁶wakitsaka kuhuvingira naswi, hutsewasumwiiya hawa wantu wa vyeet̯i vingine ili wapfonywe. Na kwa kuhenda hivi, wagija kudziundukizia nabvise zao ziwe himpi. Ela sasa, Muungu kawarejea na kakuwahukumuni vyumuni!

¹⁷Wandugu zangu, hwipfohendezwa hukit̯ana nanywi na nguvu, hut̯ana hi mii t̯u kwa muḍa, ela mat̯aro yehu yonse yewa yaa kwenu. Mwiihungiza udhuma mukali muuno, naswi huḍema kula njia hudzehumut̯embeeye kawii.

¹⁸Hwiiwa na hamu muno ya kuuja huko kwenu kawii. Mimi Paulo mwenye, niḍema kudza zaid̯i ya mweedha mumodza, ela Shaat̯ani kavihendeza vyumu kwehu kudza.

¹⁹Maana yehu ya kutsaka kuuja kawii huko kwenu, ni kwamba, huna madzikwat̯yo makuu ya kwamba, Ḅwana jwehu Yesu adzepfouja mweedha wa pfii, nywinywi munasumama usoni kwakwe, pfasipfo yutswa. Ndookomu munahupfa kutsekea na kudziona kwa dzambo ḍyenu.

²⁰Nanywi hakika, ndinywi wantu wa kuhupfa kutsekea na kudziona!