Read pokomo 1 Watesalonike 3 Bible Online

1 Watesalonike 3 - pokomo bible

1 Watesalonike 3

¹Hwipfodhimwa kukaa pfasipfo kudza hudzehumumanye hali, huhuna kumuhuma Timoteo kwenu, aswi huhangat̯a Atene. Jeje Timoteo ni ndugu na muhumisi mwenzehu jwa kusumwiiya *Maagu Mema dzuu ya *Kirist̯o. Humuhuma kwenu, adzeamungize nguvu na kumungiza mojo, mutseiyekeza hi faro yenu,

³na wala mutsesukuswa ni hizi d̯ina mwizokukuntiswani. Koro nywinywi wenye, mumanya kwamba, ni had̯i swiswi Wakirist̯o hukuntiswe d̯ina dzezohizo.

⁴Hivi muvimanya, kwa dzambo hwipfokuwa pfamodza nanywi, huvimwambia d̯ura, kwamba hudzakuntiswa d̯ina. Navyo ndivyo vihendekeyevyo ḍugha!

⁵Ndiyo maana, nipfodhimwa kukaa ḅasi pfasipfo kumanya kiḍechonse dzuu yenu, nimuhuma Timoteo kwenu adzeamanye kwamba e faro yenu muigija na nguvu ambu hat̯a! Niiwa na wasiwasi wa kwamba, Shaat̯ani atseewa kwamba kamamungiza maḍemoni na kamuhendeza muiyekeze hi faro yenu, ne kazi yehu ya kufwa na kupfona huhendeyeyo kahi yenu, iwe kwamba huhenda kazi ya ḅasi.

⁶Ela sasa myojo ihuingamaa, maanaye Timoteo kahuyehea maagu ya kwamba, amaale mugija kusumama faroni na mutsakana nywinywi na nywinywi. Na kahwamba kwamba, amaale mwakuhukumbukani muno, na muna kaja muno ya kuhuona kawii dza hivi vyehu hwivyo na kaja nkuu ya kumuona.

⁷D̯ubva wandugu, na d̯ina zehu zonse hupatiyezo na hukuntisijwezo, haya maagu huyeheejweyo ni Timoteo, kwamba amaale mugija kuhikiza, yahungiza mojo.

⁸Na kwa kwamba amaale mugija kumuserefat̯a Ḅwana, nangaa naswi le sasa hunapata sinzizi.

⁹Ntahuwezi hat̯a kumugalichiza Muungu ḍuḍa ya kut̯osa kwa dzambo ḍya tsekea muhungiziyeyo!

¹⁰Siku na musikahi, hwakumuyombani Muungu muno, huweze kudzaonana nanywi kawii na humudzaze hikiḍe kipfungukiyecho faroni mwenu.

¹¹Hwakumuyombani Muungu Baba na Ḅwana jwehu Yesu Kirist̯o, ahufungwiiye njia ya kudzaonana nanywi kawii.

¹²Hwakumuyombeani nanywi, Ḅwana jwehu amwinjipfisiye matsako, muwe na matsako makuu kwenu nywinywi na nywinywi na kwa wantu wangine, dza vya matsako yehu kwenu yevyokwinjipfani na kuwa makuu.

¹³Ḅwana jwehu Yesu namungize nguvu, mupate kuwa wadheru na musiwo na t̯amba zuka ḍiḍeḍyonse usoni kwa Muungu Baba, nsiku ya Ḅwana jwehu adzepfokudza na hawaḍe wonse weo wakwe.