Read pokomo 1 Watesalonike 5 Bible Online

1 Watesalonike 5 - pokomo bible

1 Watesalonike 5

¹Wandugu, ntaku haḍya iḍeyonse ya kumworea dzuu ya nsiku ambu t̯arehe ya kudza mweedha wa pfii kwa Ḅwana jwehu Yesu!

²Koro nywinywi wenye mumanya tswee, kwamba, nsiku yakwe ya kudza, anakudza pfasipfo kumanyikana dza hiviḍe vya mwivi evyonakudza nasiku pfasipfo kumanyikana.

³Wantu wakiwa kwambani, “Ntaku untu, kuna naghea,” ḅwikira, wanakudzijwa ni d̯ina nkuu iyo dza tsungu wa muke jwa kuvyaa. Na, dza vya muke afikie kudzifunguya asivyoweza kuud̯arama tsungu wa kuvyaa, ndivyo vya hawa wantu wasivyokudzaweza kuyapfuka hi hii d̯ina.

⁴Ela nywinywi wandugu, ntamukwaa kizani dzuu ya haya mambo hat̯a mudzemuhuswe ni kudza kwa Ḅwana jwehu Yesu dza hiviḍe vya wantu wevyonahuka wakinjiijwa ni mwivi.

⁵Koro nyonse mu wantu mwiwokuishini muyangani. Ntahukwaa wantu wa kuishi maisha ya kiza.

⁶D̯ubva swiswi, nahutseewa kuyaani dza hivi vya hawa wantu wangine wevyokuyaani, ela nahuwe matso na huwe wantu wa kudzimiza.

⁷Koro masaa ya nasiku ndiyo masaa ya wantu weyonayaa, na ndiyo masaa ya walevi weyonaruma.

⁸Ela kwa dzambo swiswi hu wantu hwiwokuishini muyangani, nahuwe wantu wa kudzimiza. Faro yehu na matsako yehu navihuchinge na mazuka dza hiviḍe vya ngao ivyonamuchinga asikari. Na madzikwat̯yo yehu ya kudzapfonywa na adhaḅu ya Muungu aiwawekeeyo wantu wazuka wonse, nayahuchinge na mazuka dza hiviḍe vya nkofia ya chuma ivyonamuchinga kitswa asikari.

⁹Koro Muungu nkakuhutsana swiswi ahuadhiḅu, ela kahutsana ahupfonye kuchiiya na kwa Ḅwana jwehu Yesu *Kirist̯o.

¹⁰Jeje Yesu kahufwiya, ili kwamba, adzepfouja mweedha wa pfii, hukiwa mojo ambu hukiwa kwamba hufwa, ahuhwae hwende hukaishi nae.

¹¹D̯ubva, ngizanani mojo na kumbakana na hivi hivi vyuuwo dza mwivyokuhendani.

¹²Wandugu, hwakumuyombani muwahile hawaḍe weonahenda kazi na hiḍu kahi yenu, weonamusumamia dza wayongozi humu matsanganikoni na kumukanya mutseegwa nabviseni.

¹³Na kwa dzambo ḍya kazi weyokumuhendeani, wahileni na muwatsake muno. Ishianani na naghea.

¹⁴Wandugu, hwakumuyombani muno muwakanye hawaḍe weonadzikaiya ḅasi, wasiotsaka kuhenda kazi. Wangizeni mojo hawaḍe wafwiyeo mojo, na muwagijiije hawaḍe wasiodzangora faro zao. Na pia wani wampowe kwa wantu wonse.

¹⁵Manyani muntu atsemuipfa halo mwenziwe kwa zuka amuhendeeḍyo. Nywinywi kut̯wa, ḍemani muno kuhendeana mema nywinywi na nywinywi na kuwahendea mema wantu wangine wonse.

¹⁶Tsekeani nsiku zonse!

¹⁷Yombani kut̯wa!

¹⁸Muyavizeni ḍuḍa Muungu kwa kula ḍidzeḍyohendeka! Koro haya ndiyo ya Muungu eyonatsaka muhende, nywinywi mwiwo hariani mwa Kirist̯o Yesu.

¹⁹Namutsemuvingira Ruhu Mudheru kuhenda kaziye kuzimuni mwa myojo yenu.

²⁰Wala namutsebalifa vyuuwo vya unabii.

²¹Kipimeni kula chuuwo, muhwae hikiḍe chicho cha ḍugha,

²²na muyekeze kula chicho cha nsuwe.

²³Nyakumuyombani Muungu, eyenahupfa naghea, amudherese muwe wadheru kaḅisa! Jeje namuweke maisha yenu yonse, ya mwii na ruhu, yatseewa na t̯amba zuka ḍiḍeḍyonse, hat̯a nsiku ya Ḅwana jwehu Yesu Kirist̯o adzepfouja mweedha wa pfii.

²⁴Na kwa dzambo huyu Muungu amuhaniye nywinywi ni muhikizika, jeje anavit̯imiza.

²⁵Wandugu, gijani kuhuyombea naswi.

²⁶Mukwakukedhyanani, noneanani, kuyangana matsako ya kindugu.

²⁷Nyakumuamuruni kwa sari ḍya Ḅwana jwehu Yesu kwamba, hi ḅaruwa muiwasomeye wandugu wonse.

²⁸T̯ei ya Ḅwana jwehu Yesu Kirist̯o naiwe pfamodza nanywi nyonse. Ikaani naghea.