Read pokomo 1 Timoteo 3 Bible Online

1 Timoteo 3 - pokomo bible

1 Timoteo 3

¹Hu muneno huu ni muneno wa ḍugha: Yuḍejwonse eye na hamu ya kuwa muyongozi jwa tsanganiko kadzitsania kazi nyema.

²Muyongozi jwa tsanganiko ni had̯i awe muntu asiyealat̯ika. Ni had̯i awe muyume jwa muke mumodza[1] t̯u, awe mutuvu, awe na mvidhyo, awe muntu jwa kuhilwa, awe muntu jwa kukaraḅisha wageni nyumbani mwakwe na awe muntu eyenaweza kuyongweeza wantu.

³Ni had̯i atseewa muntu jwa kuruma ambu muntu mundwani wala muchikodzo. Ela ni kuwa muntu mumpowe, na ni had̯i atseewa muntu jwa kutsaka fwedha.

⁴Ni had̯i awe muntu amanyiye kuisumamia nyumbaye urembo na kuwahendeza wanawe wamut̯ii na kumuhila.

⁵Koro ikiwa kwamba muntu nkadzi hat̯a namuna ya kuisumamia nyumbaye, kadzawezadze kuḍisumamia aḍi tsanganiko ḍya Muungu?

⁶Ni had̯i atseewa Mukirist̯o mwanana. Ambu sivyo, anaweza kunjijwa ni kudziona na ahukumigwe ni Muungu, dza vya Shaat̯ani evyohukumigwa.

⁷Pia muyongozi jwa tsanganiko ni had̯i awe muntu jwa kwamba anahilwa ni wantu wa nze ya hiḍi tsanganiko, ambu sivyo, anaajaiswa na anagwa mikononi mwa Shaat̯ani.

⁸Wahumisi wa matsanganiko nao, ni kuwa wantu wa t̯aḅia nyema na weonahikizika. Ni had̯i watseewa wantu wa kunwa mvinyo muno ambu wantu wahamile wa kudzilachia fwedha.

⁹Ni had̯i wagije kuihikiza hi faro ya Kikirist̯o iyanganyijweyo kwehu na wawe na mojo wa kumanya wechokuhendani.

¹⁰Ni had̯i wapimigwe nguzi tswee, na wakionekana ya kwamba ntawa t̯amba zuka, d̯ubva wayatsigwe wahumike.

¹¹Hawa wakazao[2] nao, ni had̯i wawe wantu wa t̯aḅia nyema, na watseewa wantu wa nyano. Ni had̯i wawe wantu watuvu na weonahikizika kwa kula kintu.

¹²Muhumisi jwa tsanganiko ni had̯i awe muyume jwa muke mumodza, na eyenaweza kuwasumamia wanawe na nyumbaye urembo.

¹³Hawaḍe wahumisi wa matsanganiko wadzeohenda kazi nyema, wanadzipatia hila kahi ya Wakirist̯o wenzao, na wanaweza kunena pfasipfo oga dzuu ya hivi wamuhikiziyevyo *Kirist̯o Yesu.

¹⁴Hivi nivyokukworeani hi hii ḅaruwa, nyakuyoweeyani kwamba nidzakudza nidze huonane si hat̯a kae.

¹⁵Ela ikiwa kwamba nikawa kudza, hi ḅaruwa inakumanyisa hivi hwivyonamala kudzihwaa kuzimuni mwa tsanganiko ḍya wantu wa huyu Muungu eye mojo. Hiḍi tsanganiko ndiḍyo hi nguzo na musinji wa faro ya Kikirist̯o.

¹⁶Na ya kwamba hi ngadzi ye faro yehu ni nkuu, hayo hayo ntaya kajela. Kirist̯o kadza lumwenguni dza mwanaad̯amu, na kayanganywa ni huyu Ruhu kwamba ni muhachi. Kaonegwa ni malaika, na nsumwiizi dzuuye zisumwiijwa kwa vyeet̯i vingine vyonse. Kahikizwa ni wantu wa lumwengu yuzima, na kahwajwa kwenda kwa Muungu mbinguni dzuu.