Read pokomo Tito 3 Bible Online

Tito 3 - pokomo bible

Tito 3

¹Wakumbusye hawa wantuwo wawe wakiwat̯ii kwa kula namuna hawa wat̯awala na wantu weo na mamulaka, na wadzifunge kuhenda kula aina ya dzambo dzema.

²Nawatsekaiya nyano na kuwa wantu wasio na naghea, ela nawawe wantu wa kusikiana, na meshi wawe wampowe kwa kula muntu.

³Koro swiswi wenye d̯ura hwiiwa wantu maḍyura, husiwomut̯ii Muungu na hwaariyeo. Hwiiwa wahumwa wa t̯amaa zehu za kudzitsekeza na wahumwa wa kula aina ya raha. Maisha yehu yonse yasiiya mazukani na kufwiyanani ḍea; wantu wehukeva naswi hwiiwakeva.

⁴Ela wema na matsako ya Muungu mupfonya jwehu yepfohudzia,

⁵hupfonywa. Na nkakuhupfonya kwa dzambo ḍya mambo mema huhendeyeyo, ela ni kwa dzambo ḍya kuhufwiya t̯ei. Muungu kahupfonya kuchiiya na kwa nguvu za Ruhu Mudheru, eyenahupfa kuvyajwa upfya na kuwa na maisha mapfya kwa kuhudheresa kiruhu.

⁶Muungu kamuhukakanyia Ruhu Mudheru kwa winji, kuchiiya na kwa Yesu *Kirist̯o mupfonya jwehu,

⁷ili kwamba, kwa kuhufwiya t̯ei kwakwe, hupate kungizwa hariani mwa sawa na Muungu, kisa hupfokee haya maisha ya kuunga na yuungo hudzikwat̯iyeyo kuyapata.

⁸Hivi ni vyuuwo vya ḍugha. Natsaka uyangizie hiḍu haya mambo, ili kwamba hawaḍe wamuhikiziyeo Muungu, wamuud̯amie kuhenda mambo mema. Wakihenda hivi ni urembo na vina maana kwa kula muntu.

⁹Ela wewe, dzit̯anye na yuḍaat̯o jwa uḍyura na utsekaiya milongo miyeya miyeya ya masari ya wabibi zenu na wala utsenjia matsowanoni na kuhehani dzuu ya hi *Sharia. Haya ni mambo ya uḍyura na yasiyo maana.

¹⁰Na muntu jwa kuyeha migawikano, mukanye ḍya d̯ura na ḍya pfii, na akitsasikia, yawana nae.

¹¹Kumanya ya kwamba muntu dzae kaara hi njia, na kakuhendani nabvise, na vyakuyangani tswee kwamba kakutsoweani.

¹²Nikisa kumuhuma Atema ambu Tukiko kwako, ḍema kula njia udze Nikopoli, huku nihuniyeko kwendakaa huyu sika.

¹³Ḍema kula udzevyoweza, kumumpa ugijo huyu wakili Zena na Apolo wakiwa charoni mwao, na ut̯unze kwamba ntawa t̯uri wa kintu.

¹⁴Hawa wantu wehu ni kudziyongweeza kuhendea wantu mema, wayavye vyao kwa wantu weo na t̯uri wa ḍugha. Nawatsekaiya kuishi maisha yasiyo maana.

¹⁵Hawa wonse weo pfamodza nami hapfa wakukedhya nto. Hukedhyeye hawa weo waḅamu zehu wa faro. T̯ei ya Muungu naiwe pfamodza nanywi nyonse.