Read pokomo Waeburania 1 Bible Online

Waeburania 1 - pokomo bible

Waeburania 1

¹Kae Muungu ekinena na wabibi zehu myeedha minji na minji kwa njia garagara, kuchiiya na kwa hawa manabii.

²Ela hizi hizi nsiku, ziizo nsiku za mwiso, Muungu kakunenani naswi kuchiiya na kwa Mwanawe. Hangu lumwengu ntajudzaumbwa, Muungu kamutsana kudzamumpa kula kintu kiwe chakwe, na kajuumba huju lumwengu kuchiiya na kwa huyu huyu Mwanawe.

³Huyu Mwana kakuyangaani na marembo ya Muungu, na jeje ka ḍa na Muungu. Jeje ndiye eyekujuwekani lumwengu yuzima kwa nguvu za chuuwoche. Kahudheresa nabvise zehu kisa kakaa mukono kuyume wa Muungu awee mbinguni.

⁴Huyu Mwana jwa Muungu kahendezwa kuwa mukuu kuchia hawa malaika, dza vya sariḍye apfegejweḍyo ḍiivyo kuu kuchia haya masari yao.

⁵Koro Muungu nkakunena na malaika yuḍejwonse, amwambe, “Wewe u Mwanangu, yeo nikuvyaa.” Na wala nkakunena dzuu ya malaika yuḍejwonse ambe, “Mimi nawa Babajwe, nae anawa Mwanangu.”

⁶Na kawii Muungu epfomuyeha Mwanawe hangafa lumwenguni, kamba, “Malaika wangu wonse nawamuvunzie nkuhi.”

⁷Na dzuu ya hawa malaika, Muungu kamba, “Nawahendeza hawa malaika wawe dza vut̯o, na wawe wahumisi weo dza maḅiliḅili ya moho.”

⁸Ela huyu Mwanawe, Muungu kamwamba, “Uhajuwo e Muungu, unakaa maishi na maishi! Wewe unawat̯awala wantuwo na hachi.

⁹Wewe kutsaka hachi na kukeva mazuka. Ndiyo maana mimi Muungujo, nikuhiiya mafuha nikutsana, na nikuhendeza uwe na tsekea ya kuhilwa, tsekea iyo nkuu kuchia hi ya hawa wenziwo.”

¹⁰Na kawii kamwamba, “Wewe Ḅwana, hapfaḍe ḍabvu kujuumba huju lumwengu, na hizi mbingu nazo ni kazi ya mikonoyo.

¹¹Vyonse ntavikudzawapfo kawii. Koro vidzaḅaika-ḅaika dza vit̯ani. Ela wewe unawapfo maishi na maishi.

¹²Kudzavilinga-linga dza vit̯ani, na vidzaperujwa dza nguo zijariyezo. Ela wewe nkuperuke, unaishi maishi na maishi.”

¹³Na Muungu nkakwambia malaika jwakwe yuḍejwonse amwambe, “Ikaa mukono wangu wa kuyume, hat̯a nidzepfowangiza nyabvao mikononi mwako.”[1]

¹⁴Mani d̯ubva awa malaika mbwa? Wao ni ruhu zizonamuvunzia nkuhi Muungu na zizonahumwa kuwahumikia hawaḍe wa Muungu adzeopfonya.