Read pokomo Waeburania 10 Bible Online

Waeburania 10 - pokomo bible

Waeburania 10

¹Hi *Sharia ya Kiyahud̯i ni dza picha iyo mawizawiza ya hayaḍe mambo yenye. Ni mazimbozimbo t̯u ya hayaḍe yeyokudzani. Hawa wantu wekiyavya mvuugiya zizo kwa zizo kut̯wa kula mwaka. Ela hizo hizo mvuugiya ntazikuweza kuwahendeza wagulufu hawaḍe weowakimuyomba Muungu.

²T̯ambere wandeewa kwamba wadhereswa nabvise zao ḍugha, ntawandedzionea viwi kwa dzambo ḍya nabvise zao, na ntakundeewa na mvuugiya za kuyavya kawii.

³Amoo hivi viivyo ni kwamba, hizi mvuugiya zakuwakumbusyani hawa wantu kula mwaka dzuu ya nabvise zao.

⁴Maanaye, mwazi wa mbuzi na ngombe ntauwezi kumudheresa muntu nabviseze hat̯a kachuchu.

⁵Ndiyo maana, *Kirist̯o epfoakidza lumwenguni, kamwamba Muungu, “Wewe nkukutsaka mvuugiya wala mat̯ola ya wantu ya kukuyavia. Ela kunimpa mwii wa mwanaad̯amu.

⁶Wewe nkutsakizwe ni mvuugiya za waḍondo wa kutsomwa wazima wazima, ambu mvuugiya za kuyavigwa kunwiiya wantu nabvise.

⁷D̯ubva nami nyamba, ‘Ndimi huyu, e Muungu jwangu. Nidzia kuhenda miroyo, dza vyorejwevyo dzuu yangu kuzimuni mwa Chuo cha Sharia.’ ”

⁸Pfantu pfa d̯ura Kirist̯o kamba, “Wewe Muungu nkukutsaka na wala nkutsakizwe ni mvuugiya na mat̯ola, ambu waḍondo wa kutsomwa wazima wazima, wala mvuugiya za kuyavigwa kunwiiya wantu nabvise.” Kanena hivi hat̯a ingawa hizi ni mvuugiya za hi Sharia yambiyezo kwamba ziyavigwe.

⁹Kisa kamba, “Ndimi huyu, e Muungu jwangu, nidzia kuhenda miroyo.” Ndookomu Muungu kazinuya hizi mvuugiya za kae, na pfantupfe kaweka hi mvuugiya ya Kirist̯o.

¹⁰Na kwa kwamba Yesu Kirist̯o kahenda miro ya Muungu, hudhereswa nabvise kwa njia ya hi mvuugiya ya mwiiwe mwenye, ayaviyeyo mweedha mumodza t̯u.

¹¹Kula *mukohani jwa Kiyahud̯i anahenda kazize za kiḍini nsiku kwa nsiku, na kuyavya mvuugiya zizo kwa zizo kut̯wa. Amoo hizi mvuugiya ntaziwezi kumunwiiya muntu nabvise.

¹²Ela ae Kirist̯o kadziyavya mweedha mumodza t̯u dza mvuugiya ya kuhunwiiya nabvise zehu ngera zonse, kisa kakaa mukono kuyume wa Muungu.

¹³Hukuḍe kakaa kuindiiya mumpaka hapfaḍe pfa nyabvawe wadzepfogiswa nsii ya nyajoze.

¹⁴D̯ubva kwa kudziyavya dza mvuugiya mweedha mumodza t̯u, jeje kawakamilisha maishi hawaḍe eokuwahendezani kuwa wadheru.

¹⁵Huyu Ruhu Mudheru pia, nae kahwambia dzuu ya haya haya mambo. Kamba,

¹⁶“Ḅwana kamba, ‘Hiḍi ndiḍyo ḍamano nidzeḍyowekeana nao nsiku zizokudzani: Nazyora sharia zangu myojoni mwao, na naziweka akilini mwao.

¹⁷Nami siwat̯aliye nabvise zao kawii, wala mazuka yao.’ ”

¹⁸D̯ubva, Muungu epfonayatsia wantu nabvise, ntakuwe na haḍya kawii ya mvuugiya ya kuyavigwa kunwiiya wantu nabvise.

¹⁹D̯ubva wandugu zanguni, kwa dzambo ḍya kufwa kwa Yesu, hupata ujangina wa kunjia hapfa pfantu pfadheru pfa mwiso.

²⁰Jeje kahufungwiiya njia mpya ya kumwendea Muungu, iyonahupfa maisha. Kaihufungwiiya kwa kuchia na humu mwa huju yukangadzi, yani kwa kudziyavya jeje mwenye dza mvuugiya.

²¹Huna Mukohani Mukuu eyekuisumamiani nyumba ya Muungu mbinguni.

²²D̯ubva nahutsegeeye hafufi na Muungu na mojo mumodza pfasipfo kuwa na kajela. Ni huwe na myojo idheresejweyo mazukaye na mii idheresejweyo na madzi masafi.

²³Nahuyagije na nguvu haya madzikwat̯yo hwiyonakwamba hunayo, koro humanya ya kwamba huyu Muungu ayahupfiye nkavunze ahad̯i yakwe.

²⁴Nahumuud̯amiyane kungizana mojo hupate kutsakana dza ndugu na kuhendeana mema.

²⁵Nahutseyatsa kukaa na kutsanganika pfamodza kwa mayombo, dza vya wantu wangine wevyokuhendani. Ishinu ni kungizana mojo zaid̯i na zaid̯i, koro humakuonani kwamba Nsiku ya Ḅwana ya kudza imaawa hafufi.

²⁶Hukikaiya kuhenda nabvise nangere hat̯a ḅaad̯a ya kuimanya hi hachi, ntaku mvuugiya ingine idzeyoweza kuyavigwa ihunwiiye nabvise zehu.

²⁷Kidzechosaa chonse, inawa ni kuindiiya na oga hukumu ya Muungu na hu moho wa bvibvibvibvi udzeowananga-nanga hawaḍe wonse weonamupfinga Muungu.

²⁸Muntu adziziye kuit̯ii hi Sharia ya Musa, ekiyagwa pfasipfo kuonejwa t̯ei ikiwa kwamba kuyavigwa ushaahiḍi ni wantu wawii ambu zaid̯i, kwamba hiḍi tsowa kaḍihenda ḍugha.

²⁹Ehe fat̯i wantu weonamubalifa Mwana jwa Muungu, wanahukumigwa myeedha myengaa zaid̯i? Wantu weonahenda hivi, kisa hu mwazi wa ḍamano ḍya Muungu uwadhereseyeo wakauhwaa dza mwazi usiokuwa mudheru, hakika wantu dzao wanahukumigwa vyumuni! Wao wanamukufuru Ruhu jwa Muungu na hali huyu Ruhu ndiye eyenahuyanga hi t̯ei ya Muungu. Hachi wantu dzao wadzapata hukumu nkali!

³⁰Koro humanya ya kwamba Ḅwana Muungu ndiye ambiye, “Halo nzangu. Mimi naipfa halo.” Na jeje ndiye ambiye, “Mimi nawahukumu wantu wangu.”

³¹Vyaa oga muno kugwa mikononi mwa Muungu eye mojo.

³²Zit̯ariyeni hizi d̯ina nkali mukuntiyezo na namuna mwivyoit̯isa mwipfohikiza na sambi.

³³Myeedha ingine mwitsezejwa kacha ya wantu na kukuntiswa d̯ina, na myeedha ingine mwikigijana na hawaḍe wantu weowakihendegwa mambo dzayo.

³⁴Nywinywi muwafwiya t̯ei wafungwa. Na hat̯a vija vyenu vipfohwajwa na nguvu nywinywi mudzikaiya na tsekea, maanaye mwimanya kwamba muna nkandi ya maana iyonakaa maishi.

³⁵D̯ubva namutseefwa mojo, kwa kwamba hi serefano yenu inamuyehea t̯ubvo kuu.

³⁶Nywinywi munamala kuit̯isa ili mupate kut̯imiza miro ya Muungu makisa mupfokeye haya amuahid̯iyeyo.

³⁷Koro haya matsoro yamba, “Indani kit̯emo kachuchu t̯u, na huyuḍe eyekudzani, nkakawe anakudza.

³⁸Wantu wangu, weonahenda miro yangu, wao wananiserefat̯a na wanaishi kwa faro. Ela yuḍejwonse kahi yao adzeyeujia nyuma, huyo sitsakizwe nae.”

³⁹Aswi le ntahukwaa wantu hwiwonaujia nyuma na hukaara. Humuserefat̯a Muungu nae anahupfonya.