Read pokomo Waeburania 12 Bible Online

Waeburania 12 - pokomo bible

Waeburania 12

¹D̯ubva, kwa kwamba hwakuyojwani ni wingu kuu na kuu ḍya mashaahiḍi wayangiyeo faro zao, nahuyekeze kula chichonahugija-gija na huiyatse hi nabvise iyonatsaka kuhuhabvaka. Nahud̯arame na d̯iḍa hizi mbio hungizijwezo.

²Nahugije kumuyowa Yesu eye muḍabvisa na mut̯imiza jwe faro yehu. Jeje kabea kufwa kwa kinyaya hapfaḍe muhini mwa mpatsa pfasipfo kuviona dza kintu, kwa dzambo ḍya tsekea eyoakiyoweeya kudzawa nayo. Na sasa kakaa mukono kuyume Uhajuni mwa Muungu.

³T̯ayowani haya akuntananiyeo nayo na namuna ait̯isiiyevyo upinzani mukali wa wantu wanabvise! D̯ubva nanywi namutseefwa mojo muiyekeze hi faro yenu.

⁴Maanaye, hivi viha vyenu mwivyokujwanani na nabvise, ntamudzajwana viha vya kumuyaga.

⁵Mumavyaarerwa avi vyuuwo vya kungiza mojo vya aya matsoro yaneneyevyo? Haya matsoro yamba, “Mwanangu, Ḅwana epfonakuruḍi sivibusheshe, na epfonakukanya, sifwe mojo.

⁶Maanaye Ḅwana anamuruḍi kula amutsakiye, na anamuadhiḅu kula eyenamuhwaa dza mwanawe.”

⁷D̯ubva it̯isani hizi d̯ina mwizokukuntani, muzihwae dza adhaḅu mwiyokupfegwani ni baba jwenu. Muungu kakumuhendani dza hiviḍe vya babajwe muntu evyonawahenda wanawe. Ni mwana ga asiyeadhiḅigwa ni babajwe?

⁸Mukitsaadhiḅigwa dza hawa wana wangine, ndokwaa nywinywi ntamukwaa wana wa nyumbani, mu wana wa usi.

⁹Wababa zehu wa kibenaad̯amu t̯u wanahuadhiḅu kisa vivyo hukawahila. Ehe fat̯i Baba jwehu jwa mbinguni hunamala kumuhila chima ga, ili hupate kuwa na maisha ya kiruhu?

¹⁰Hukiwa amaale hu wana, wababa zehu wanahuadhiḅu dza wevyonatsaka. Muungu jeje anahuadhiḅu kwa faiḍa yehu wenye, hupate kupata hu umuunguwe.

¹¹Hiḍe saa hwiyonaadhiḅigwa ntahuwe na tsekea, hunanjijwa ni tsungu. Ela hawaḍe weonadziuja na nyuma kuyawana na adhaḅu dzayo, wanapata kuishi maisha ya naghea na ya kumutsakiza Muungu.

¹²D̯ubva dzipfeni mojo, namutseyekezeka-yekezeka na matsofu.

¹³Ishini maisha yarongaariyeo ili mutsekudzawahendeza hawaḍe weo wadhaifu kiruhu waare, ela muwahendeze wapate matsea.

¹⁴Ḍemani kukaiyana na naghea na wantu wonse na muishi maisha ya udheru, maanaye ntaku adzeyemuona Ḅwana pfasipfo kuishi maisha madheru.

¹⁵Manyani muntu atseuja na nyuma aiyekeze hi t̯ei ya Muungu. Na manyani kutsekudzawa muntu eye dza mbeju ya sumu kahi yenu, atsekudzayeha d̯ina na kunanga wangine wenji.

¹⁶Manyani kutseewa muntu muḅari kahi yenu wala muntu asimuhila Muungu dza Esau, aguziye uhangafawe kwa dzambo ḍya kuḍya kwa mweedha mumodza.

¹⁷Nywinywi wenye mumanya kwamba, nyumae, jeje kadzakatsaka kuvodhyegwa dza mwana hangafa, ela babajwe kamudzizia. Na hat̯a ingawa kalacha kuvodhyegwa huku akiiya, nkakuwa na cha kuhenda apate kuupata uhangafawe kawii.

¹⁸Nywinywi ntamudzafika pfantu pfa kusumamiana uso kwa uso na mambo ya kuhusya dza moho wa bvibvibvibvi, kiza cha go, na vut̯o kali, dza hayaḍe ya hawa Waisiraeli wat̯ongananiyeo nayo hapfaḍe pfa hu Murima wa Sinai.

¹⁹Wao wasikia saut̯i nkuu ya t̯arumbet̯a na saut̯i ya Muungu akwakunenani, na wamuyomba atsenena nao jeje,

²⁰maanaye ntawakubea kuisikia hi amuri yambiyeyo, “Hat̯a muḍondo adzeuhora hu murima ni kubigwa na mawe ayagwe.”

²¹Haya mambo yewa ya kushoogesa muuno, hat̯a Musa nae kamba, “Nyakuhehemani maanaye viningiza oga.”

²²Ela nywinywi muudzia Murima wa Sayuni, kwiko mudzi wa Muungu eye mojo. Yani, muidzia Yerusalemi ya mbinguni, kwiko maelefu na maelefu ya malaika.

²³Mudza kwa tsanganiko ḍya wana mahangafa wa Muungu, weo tsaikoni. Hawa, masari yao yoregwa mbinguni. Mudza kwa Muungu, eye muhukumu jwa wantu wonse. Na mudza kwa ruhu za wantu wema wa kae wapfegejweo kukamilika.

²⁴Nywinywi mudza kwa Yesu, eye muntu jwa kahi jwa hiḍi ḍamano ipfya. Jeje, mwaziwe uhika na uhuwekea ahad̯i ya mambo mema zaid̯i kuchia mwazi wa Habili.

²⁵D̯ubva manyani mutsekudzadziza kumusikiiya huyu eyekunenani. Hawaḍe weod̯ucha masikio yao, wakidziza kumusikiiya huyu eyeyeha maagu ya Muungu lumwenguni, ntawakuweza kupfona. D̯ubva fat̯i hukidziza kumusikiiya huyu eyekunenani naswi kuyawa mbinguni, hunapfonadze?

²⁶Hihiiḍe ngera, hi saut̯iye ihehemesa nsi yonse. Ela sasa kaahid̯i kamba, “Naihehemesa kawii nsi yonse pfamodza na hizi mbingu pia.”

²⁷Hichi chuuwo cha “kawii,” chakuyangani tswee kwamba, kula kiumbijwecho kidzasukuswa kisa kinujwe. Hiviḍe visivyosukusika t̯u, ndivyo vya kuhafa.

²⁸D̯ubva swiswi nahumuyavize ḍuḍa Muungu, kwa kwamba hwakupfegwani uhaju usiosukusika. Nahumuyavize ḍuḍa Muungu na humuyombe na njia ya kwamba inamutsakiza, hukimuhila na kumushooga,

²⁹maanaye Muungu hakika ka dza moho wiwonananga-nanga.