Read pokomo Waeburania 2 Bible Online

Waeburania 2 - pokomo bible

Waeburania 2

¹D̯ubva ni had̯i huyagije na nguvu haya maagu ya hachi husikiiyeyo, ili hutsekudzakwaara njia.

²Hi *Sharia ipfegejweyo wabibi zehu kuchiiya na kwa malaika iyanga kwamba iwa na nguvu, koro kula aivunziye na asiyeit̯ii, kaadhiḅigwa dza ivyomumala.

³D̯ubva hukitsaufwanya mupfonyo mukuu dzohuu, hunapfona kutsahukumigwa? Huyu Ḅwana mwenye ndiye jwa d̯ura aneneye dzuu ya hu huu mupfonyo. Na hawa wamusikiiyeo, wavihuyanga tswee kwamba ni ḍugha.

⁴Muungu nae kavihuyanga tswee kwamba ni ḍugha kwa kuhuyanga vihambwiizo, mambo ya mafara na mambo ya kumakisa menji na menji, pfamodza na kupfa wantu t̯ola ya Ruhu Mudheru dza atsakiyevyo mwenye.

⁵Muungu nkakuweka malaika wawe wat̯awala wa huju lumwengu yupfya judzejokudza, hwijokuneneani.

⁶Koro vyoregwa humu matsoroni kwamba, “E Muungu, mwanaad̯amu nae ni ga, hat̯a ukae na kumut̯aria? Ambu mwanaad̯amu nae ni ga, hat̯a ukae na kumumuud̯amia?

⁷Kumuweka nsii ya hawa malaika kwa muḍa, kisa kumumpa marembo na kumuhendeza ahilwe.

⁸Kumumpa mamulaka ya kut̯awala kula kintu.” Haya matsoro yakyamba kula kintu, yana maana ya kwamba ntaku kiyatsijwecho. Ela hat̯a vivyo, amaale ntayadzaḍabva kuhendeka.

⁹Hwichokuonani ni huyu Yesu, eyewekwa nsii kachu ya hawa malaika, na sasa akipfegwa marembo na hila kwa dzambo ḍya hichi kifo afwiyecho. Iwa ni t̯ei ya Muungu kwehu, kwamba Yesu afwe kwa dzambo ḍya kula muntu.

¹⁰Muungu kaumba kula kintu na ndiye eyekuvihendezani vyonse viwepfo. Jeje kaona urembo kwamba amuhendeze Yesu kuwa mukamilifu kuchiiya na kwa hizi d̯ina akuntiyezo. Kahenda hivi ili aweze kungiza wanawe wenji maremboni mwakwe. Koro Yesu ndiye eyenawayongowa kuwangiza mupfonyoni.

¹¹Huyu eyenadheresa wantu, yani Yesu, na hawa eonadheresa, wonse Baba jwao ni mumodza. Ndiyo maana jeje Yesu nkaone yutswa kuwahana wanduguzwe.

¹²Koro kamwamba Muungu, “Nawasumwiiya wandugu zangu namuna uivyo. Nakushad̯a kuzimuni mwa tsanganiko ḍya wantuwo.”

¹³Na kawii kamba, “Mimi serefano yangu niiweka kwa Muungu.” Na kisa kamba, “Ndimi huyu, mimi na wana wa Muungu animpiyeo.”

¹⁴Kwa dzambo ḍya kwamba hawa wana wa Muungu ni wanaad̯amu waumbijweo na mwazi na nyama, Yesu nae kawa dzao. Kahenda hivi ili kwamba, kwa kufwakwe aweze kumunanga-nanga Shaat̯ani eye na nguvu za kuyaga wantu.

¹⁵Na kwa hi hii namuna, Yesu kawaweka huru hawaḍe weowakiishi maisha yao yonse dza wahumwa, kwa dzambo ḍya kushooga kufwa.

¹⁶Koro hangu d̯ura Yesu nkakudzia kuwagijiija malaika, ela kadzia kuwagijiija wantu wa yuvyee jwa Iburahimu.

¹⁷Ndiyo maana iwa imumala kuwa dza wanaad̯amu wangine wonse kwa kula namuna, ili apate kuwa *Mukohani Mukuu jwao eye mut̯ei na eyenahikizika kwa uhumisiwe kwa Muungu, ili kwamba hawa wantu wapate kuyatsijwa nabvise zao.

¹⁸Na kwa kwamba jeje mwenye engizwa maḍemoni na kukuntiswa d̯ina, sasa ana uwezo wa kuwagijiija hawaḍe weokungizwani maḍemoni.