Read pokomo Waeburania 4 Bible Online

Waeburania 4 - pokomo bible

Waeburania 4

¹Hi ahad̯i ya Muungu ya kuhupfiika hiḍe nsi ya kuyavya hara, amaale ipfo. D̯ubva nahuchimizeni, kutsekudzawa hat̯a mumodza jwenu jwa kuonekana kwamba kashindwa kuinjia hi nsi ya kuyavya hara.

²Swiswi huyasikia haya *Maagu Mema yasumwiijweyo kwehu, dza viviḍe vya hawa weokuwa hukuḍe yuwandani wayasikiiyevyo. Ela wao, haya Maagu Mema ntayakuwafaiḍi kintu, kwa kwamba ntawakuyahikiza.

³Swiswi huhikiziyeo, hudzakunjia huku kuntu kwa kuyavya hara. Koro Muungu kamba, “Kwa ngoro waningiziyeo, niyapfa kwamba ntawawezi kukunjia meshi huku kuntu kwa kuyavya hara nikowawekea.” Jeje kanena hivi, hat̯a ingawa hi mipango yakwe ya haya adzeyohenda iwa ikamilika hangu epfojuumba huju lumwengu.

⁴Huvimanya kwamba ikamilika, kwa kwamba kungine haya matsoro yamba, “Kufikia nsiku ya fungahe, Muungu ewa kesa kuhenda kazize zonse na kayavya hara.”

⁵Pfapfo kawii haya matsoro yamba, “Ntawawezi kukunjia meshi huku kuntu kwa kuyavya hara nikowawekea.”

⁶Hawaḍe wa d̯ura weoyasumwiijwa haya maagu, ntawakuweza kuinjia hiḍe nsi, kwa kwamba ntawakuhikiza haya ya Muungu aneneyeyo. Nae kakuyatsani wantu wangine wanjie huku kuntu kwa kuyavya hara.

⁷D̯ubva Muungu kaweka nsiku yehu ya kunjia kuntukwe kwa kuyavya hara, na hiyo hiyo nsiku ni yeo. Myaka na myaka ḅaad̯aye, Muungu kanena dzuu ya hi hii nsiku kuchiiya na kwa D̯aud̯i aneneye matsoroni akyamba, “Mukiisikia saut̯i yakwe yeo, namutseihendeza myumu myojo yenu.”

⁸T̯ambere Yoswa andeewa kawafisya hawa wantu huku kuntu kwa kuyavya hara, Muungu nkandeenena ḅaad̯aye dzuu ya nsiku ingine ya kunjia kuntu kwa kuyavya hara.

⁹Ndookomu nsiku ya wantu wa Muungu ya kunjia kuntu kwa kuyavya hara, amaale ipfo.

¹⁰Yuḍejwonse eyenanjia huku kuntu, anayavya hara akiwa kesa kazize, dza viviḍe vya Muungu evyokwisa kazize za kuumba lumwengu kisa akiyavya hara.

¹¹D̯ubva naswi nahujwaniye kunjia huku kuntu kwa kuyavya hara kwa Muungu ahuwekeeko. Nakutseewa hat̯a mumodza jwehu jwa kutsaat̯ii dza hawaḍe weokuwa hukuḍe yuwandani na wakishindwa kuinjia hi nsi ya kuyavya hara.

¹²Chuuwo cha Muungu chaa mojo, kisa kina nguvu nyinji. Kina makai hat̯a kuchia kisu chicho na makai kuwii. Kinahuna-huna kikanjia hat̯a kwiko mojo na ruhu na kwiko mifufa na mbuju. Na kinayanga wema ambu uzuka wa mat̯aro na t̯amaa za mwanaad̯amu.

¹³Ntaku chichonaweza kufitsika kwa Muungu. Jeje kula kiumbe kakuchionani tswee. Na ndiye hudzeeyamuparia hayaḍe yonse huhendeyeyo maishani mwehu.

¹⁴Ndookomu nahuigije na nguvu hi faro hwiyonait̯ima. Koro huna *Mukohani Mukuu jwa maana endeyeakikaa usoni kwa Muungu. Nae ni Yesu Mwana jwa Muungu.

¹⁵Na huyu Mukohani Mukuu jwehu ni muntu aumanyiye udhaifu wehu. Jeje kaḍemegwa dzaswi na kula njia, ela nkakugwa nabviseni.

¹⁶D̯ubva nahumudzie Muungu mut̯ei pfasipfo oga. Jeje anahuyanga wemawe na t̯eiye hwipfonawa mad̯inani.