Read pokomo Waeburania 6 Bible Online

Waeburania 6 - pokomo bible

Waeburania 6

¹D̯ubva amaale nahutsekaiya yayaḍe mayongweezo ya ḍabvu ḍabvu hudziyongweezeyeyo dzuu ya *Kirist̯o. Ishinu nahwende usoni hupate hayaḍe mayongweezo ya kuhuhendeza hungore kiruhu. Ntahunamala kuyaujia yayaḍe mayongweezo ya ḍabvu, ya kwamba huyatse mazuka humuhikize Muungu.

²Ntahunamala kukaiya mayongweezo dzuu ya adha za kudzidheresa na mayongweezo dzuu ya kuwekea wantu mikono. Na wala ni kutsakaiya mayongweezo dzuu ya kufufujwa kwa wafu na dzuu ya hukumu isiyo mwiso iyokudzani.

³Na Muungu akitsaka hunagija kukuya kiruhu.

⁴Ntaiwezekane kuwaudzya njiani hawaḍe weoimanya hi hachi kisa wakiiyekeza hi faro yao. Wao weet̯at̯a t̯ubvo ḍya Muungu na kupfokea Ruhu Mudheru pfamodza na wantu wangine.

⁵Wedzionea wao wenye hu wema wa chuuwo cha Muungu, na weziona hizi nguvu za ut̯awala wa Muungu.

⁶D̯ubva wakiiyekeza faro yao, ntaiwezekane kuwaudzya njiani. Ni sawa na ya kwamba wao wakumupfatsikani na kumuajaisa kawii huyu Mwana jwa Muungu.

⁷Mutsanga wiwonanwa madzi ya mvuya kisa ukakuzya mimea iyo na maana kwa hawaḍe weonauima, Muungu anauvodhya.

⁸Ela ukikuzya miwa na pfaiya ḍingine, huo unawa ntau maana. Unaḍujwa na mwisowe udzatsomwa.

⁹Hat̯a ingawa nyakunenani dza hivi, nywinywi le si shaka nanywi waḅamu zangu watsakwa. Nimanya ya kwamba, muna haya mema yeyonayawana na hu mupfonyo mupatiyeo.

¹⁰Muungu anahendea wantu hiḍe ya hachi. Nkawezi kwaarerwa hi kazi yenu muhendeyeyo ambu matsako mumuyangiyeyo kwa namuna mwivyowagijiija na mwivyokuwagijiijani hawa Wakirist̯o wenzenu.

¹¹Hamu yangu nkuu ni kwamba mugije kuwa wahiḍu mumpaka mwiso, ili haya mwiyokudzikwat̯yani muweze kuyapata.

¹²Sit̯aki muwe wantu wasiotsaka kuhenda kintu, ela natsaka muwe dza hawaḍe weonahikiza na wakait̯isa, kisa wakapfokea hayaḍe ya Muungu aahid̯iyeyo kuwapfa.

¹³Muungu epfoakimuwekea ahad̯i Iburahimu, kayapfa kumuhendea hivi amuahid̯iyevyo. Na kwa kwamba ntakwiwa muntu yungine mukuu kumuchia jeje, Muungu kayapfa kwa sariḍye jeje mwenye.

¹⁴Kamwamba, “Hakika nakuvodhya na nakupfa yuvyee yukuu.”

¹⁵Iburahimu kait̯isa, na haya ya Muungu amuahid̯iiyeyo yamuwea.

¹⁶Benaad̯amu wakwakuyapfani wanayapfa kwa sari ḍya muntu eye dzuu yao. Na muntu akisa kuyapfa t̯u, kunawa ntaku yuḍaat̯o kawii.

¹⁷Muungu ekitsaka kuviwawekea wazi hawaḍe awawekeyeo ahad̯i, kwamba, nkawezi kuvunza ahad̯i yakwe meshi, ndookomu nae kawayapfia.

¹⁸D̯ubva haya mambo mowii haya, yani ahad̯i ya Muungu na kuyapfa kwakwe, ntakuwezi kuperuka, koro Muungu nkanene nsuwe. Ndookomu swiswi hud̯aramiyeo kwakwe ili huwe salama, hi ahad̯i yakwe inahungiza mojo muno huyagije haya madzikwat̯yo ahupfiyeyo.

¹⁹Haya haya madzikwat̯yo ni dza nanga nziho ya kuikumiiza hi myojo yehu. Haya madzikwat̯yo yehu, yaa kwa huyuḍe achiiye na humu mwa huju yukangadzi jwa hi *Hekalu ya mbinguni, akinjia hapfaḍe pfantu pfadheru pfa mwiso pfe Hekalu.

²⁰Yesu ndiye hudzimukwat̯iyee, na ndiye anjiiye hapfaḍe pfantu pfadheru pfa mwiso kwa dzambo ḍyehu. Kahenda *Mukohani jwehu Mukuu jwa maishi dza hiviḍe vya Melekized̯eki.