Read pokomo Waeburania 8 Bible Online

Waeburania 8 - pokomo bible

Waeburania 8

¹D̯ubva hwichokunenani ni kwamba, huna *Mukohani Mukuu eye mbinguni, akaiye mukono kuyume wa Muungu jwa marembo.

²Jeje kakuhumikani dza Mukohani Mukuu hapfa pfantu pfadheru pfa mwiso. Yani, kakuhumikani kuzimu mwa hiḍi hema ḍyenye, ḍimbakijweḍyo ni Ḅwana, wala si hiḍiḍe ḍimbakijweḍyo na mikono ya wanaad̯amu.

³Kula *Mukohani Mukuu kawekwa apate kuyavya mat̯ola na mvuugiya za wantuwe kwa Muungu. D̯ubva iwa ni had̯i huyu Mukohani Mukuu jwehu awe na kintu cha kuyavya.

⁴T̯ambere andeewa ka lumwenguni, nkandeewa *mukohani haswa, maanaye t̯ayari kuna hawa wakohani weokuyavyani mvuugiya kuuḅana na hi *Sharia.

⁵Wao wakuhumikani kuzimu ya hema ḍiḍyo mufaano ambu ḍiḍyo dza kivwii cha hiḍiḍe ḍya mbinguni. Ndiyo maana Musa epfofika kuḍimbaka hiḍi hema, Muungu kamwamba, “Hendani dza viviḍe nikuyangiyevyo hapfa murimani.”

⁶Ela sasa, Yesu kapfegwa kazi ya ukohani iyo na maana zaid̯i kuchia hiḍe ya hawa wakohani wangine. Jeje kakusumamiani ḍamano ḍiḍyo na maana zaid̯i kuchia hiḍiḍe ḍya kae, maanaye ḍina ahad̯i ziizo na maana zaid̯i.

⁷T̯ambere hiḍi ḍamano ḍya d̯ura ḍindeewa ḍinaweza kut̯imiza hayaḍe yonse ḍiyomala kut̯imiza, ntakundeewa na haḍya ya kuwa na ḍamano ḍingine.

⁸Koro Muungu kaona kwamba wanaad̯amu wana matsowa. Ndookomu kamba, “Nsiku zakudzani, nidzepfohenda ḍamano ipfya na nyumba ya Isiraeli na nyumba ya Yud̯a.

⁹Ntaḍiwe dza hiḍiḍe ḍamano niḍyohenda na wabibi zao, nipfowagija mukono nikiwayavya na Misiri. Wao ntawakuḍigija hiḍi ḍamano ḍyangu ami nao, d̯ubva nami niwayatsa.

¹⁰Hiḍi ḍamano nidzeḍyowekeana na nyumba ya Isiraeli ni hiḍi: Nsiku zizokudzani, nazyora sharia zangu myojoni mwao, na naziweka akilini mwao. Mimi nawa Muungu jwao, nao wanawa wantu wangu.

¹¹Kudzawa ntaku haḍya ya muntu jwa kumuyongweeza mwenziwe ambu ndugujwe, amwambe amumanye Ḅwana. Koro hangu mukuu hat̯a muḍoḍo, wonse wanawa wanimanya kwamba mimi ndimi Muungu jwao.

¹²Nawayatsia nabvise zao, na wala siwat̯aliye mazuka yao kawii.”

¹³Muungu epfonenea dzuu ya ḍamano ipfya, hiḍi ḍamano ḍya d̯ura kaḍihwaa kwamba ḍijara. Na kiḍechonse kijariyecho kinatsafurika-tsafurika mumpaka kinasiya.