Read pokomo Waeburania 9 Bible Online

Waeburania 9 - pokomo bible

Waeburania 9

¹Hiḍi ḍamano ḍya d̯ura ḍiwa na masharia ya kuyanga namuna ya kumuyomba Muungu, na ḍiwa na pfantu pfa kuyombea pfaelekanyijwepfo ni wanaad̯amu.

²Hiḍi hema ḍipfoḍikimbakwa, ḍihunwa vyumba viwii. Hichi cha d̯ura, chichokuwa na hu muhi wa kupfatsikia hizi tsaa pfamodza na hi meza ya kuwekea hi mikahe iyavijweyo mvuugiya kwa Muungu, chikihanwa Pfantu Pfadheru.

³Kisa kuwekwa yukangadzi. Ukichia huju yukangadzi unanjia hichi chumba cha pfii chichochikihanwa Pfantu Pfadheru pfa Mwiso.

⁴Humu chumbani kwiwa haya *madhabahu ya kufukizia vumba yapfakazijweyo dhahaḅu pfamodza na hiḍi sand̯uku ḍya ḍamano ḍipfakazijweḍyo dhahaḅu. Humu mwa hiḍi sand̯uku, kwiwa hu mut̯ungi wa dhahaḅu wiwokuwa na hi mana. Kwiwa na hi nsimbo ya Haroni iyomea magomba, pfamodza na hivi viḍyae vyowii vivyokuwa na hizi amuri kumi.

⁵Hapfa dzuu ya hiḍi sand̯uku, kwiwa kumiminwa viumbe viwii vya dhahaḅu vivyo dza makeruḅi, kuyanga kuwapfo kwa Muungu. Hizi mbawa zao zigonzokea dzuu kupfavinga hapfa pfantu pfa wantu pfa kuyatsijwa nabvise zao. Ela hapfa si haḍya ya kuhadza kula kintu.

⁶Hivyo ndivyo vya kula kintu chivyokaa humuḍe kuzimu. Hawa wakohani wekinjia na kuyawa hapfa pfantu pfadheru kut̯wa, wakihenda hayaḍe yeyowamala kuhenda.

⁷Ela eyeakinjia na kuyawa hapfa pfantu pfadheru pfa mwiso, ni huyu *Mukohani Mukuu jeje heket̯u. Nae ekinjia na kuyawa mweedha mumodza t̯u kwa mwaka. Ekinjia na mwazi wa waḍondo wayavijweo mvuugiya kwa dzambo ḍya nabviseze na nabvise za hawa wantu wahendeyezo pfasipfo kuvimanya.

⁸Na kuyawana na hayo yonse, huyu Ruhu Mudheru kakuyangani kwamba, chima cha hiḍi hema ḍya ḍamano ḍya kae ḍivyokutumikani, ndivyo vya hi njia ya kunjiiya hapfa Pfantu Pfadheru pfa Mwiso ikaiyevyo dza kwamba ifungwa.

⁹Hu ni mufaano kwehu hizi hizi nsiku, wiwokuyangani kwamba haya mat̯ola na hizi mvuugiya zizozikiyavigwa, ntazikuweza kuudheresa hu mojo wa huyuḍe muntu eyeakiyomba.

¹⁰Haya haya masharia ni dzuu ya kuḍya na kunwa na maad̯a yangine garagara ya kudzidheresa. Haya ni masharia yawekejweyo, yasiyohora mojo wa muntu. Yakutumikani mumpaka ngera ya Muungu adzepfoperuya mambo yonse kuwa mapfya.

¹¹Sasa, *Kirist̯o kesakuwa Mukohani Mukuu jwa haya mema hwiyokuonani. Jeje kanjia humu mwa hiḍi hema ḍya maana ḍikamilikiyeḍyo na kula kintu. Hiḍi si hema ḍimbakijweḍyo na mikono ya wanaad̯amu na wala si ḍya huju huju lumwengu.

¹²Na Kirist̯o kanjia hapfa Pfantu Pfadheru pfa Mwiso mweedha mumodza t̯u. Na nkakunjia na mwazi wa mbuzi wala wa ngombe, jeje kayavya maishaye mwenye na kahuhendeza huwe huru maishi na maishi.

¹³Kuuḅana na adha, mwazi wa ngombe na mbuzi pfamodza na ivu ḍya mwana ngombe ayavijwe mvuugiya, vikifwit̯ijwa-fwit̯ijwa wantu, vinaihendeza mii yao kuwa midheru.

¹⁴D̯ubva, mwazi wa Kirist̯o una nguvu zaid̯i za kuidheresa myojo yehu, hutsekaiya kuhenda mazuka, ela hupate kuhenda miro ya Muungu eye mojo. Koro kwa nguvu za huyu Ruhu Mudheru eyenaishi maishi, Kirist̯o kadziyavya kwa Muungu dza mvuugiya isiyo kapet̯a.

¹⁵D̯ubva Kirist̯o kahenda ndiye huyu muntu jwa kahi jwa hiḍi ḍamano ipfya. Kawa muntu jwa kahi ili kwamba hawaḍe wonse wa Muungu ahaniyeo kuwa wantuwe, wapfokeye hi ahad̯i ya Muungu awawekeeyo iwe yao maishi. Kirist̯o kawa mukinakahi kwa kwamba, ndiye afwiye ili awapfonye wantu kuyawana na nabvise zao wahendeyezo ngera ya hiḍi ḍamano ḍya d̯ura.

¹⁶Muntu akiyatsa hat̯i ya kuyanga hawa wa kuḍaliswa hivi vijavye, ntaviḍaliswe mumpaka imanyikane hakika kwamba huyu mwenye kafwa.

¹⁷Maanaye, hat̯i ya kuḍalisa vija ntaiwe na maana yaḍeyonse ikiwa kwamba amaale mwenye ka mojo. Inatumika t̯u hapfaḍe pfa huyu mwenye aiyatsiye, epfonawa kwamba kamaafwa.

¹⁸Ndiyo maana hat̯a hiḍiḍe ḍamano ḍya d̯ura, iwa kwamba ni had̯i ḍiḍabviswe kwa kwiha mwazi wa muḍondo.

¹⁹Cha d̯ura, Musa kawambia hawa wantu haya yonse yorejweyo humu Shariani. Kisa kahwaa mwazi wa wana ngombe na mbuzi utsanganyijweo na madzi, kaufwit̯ia-fwit̯ia hichi chuo che *Sharia na hawa wantu wonse. Kaufwit̯a-fwit̯a na mahambi ya muhisopo yalingilijweyo na manyala ya ranji ya zazi iwivwiyeyo.

²⁰Makisa kawamba, “Hu ndiwo hu mwazi ukaiyeo dza hakikisho ḍya hiḍi ḍamano ḍya Muungu ahendeyeḍyo nanywi, na akimuamuru kwamba muḍigije.”

²¹Na pia Musa kaḍifwit̯ia-fwit̯ia mwazi hiḍi hema na vijavye vyonse vivyovikitumika kwa mayombo.

²²D̯ubva ni kunena kwamba, kuuḅana na hi Sharia, hafufi kula kintu kinadhereswa na mwazi. Pfasipfo mwazi kuhika, ntaku kuyatsijwa nabvise.

²³D̯ubva hivi hivi vija, vivyo mufaano wa hiviḍe vya mbinguni, viwa vinamala kudhereswa na mwazi dzeviḍe. Ela hivi vija vya mbinguni vyenye vinatsaka mvuugiya za maana zaid̯i.

²⁴Koro Kirist̯o nkakunjia pfantu pfadheru pfaelekanyijwepfo ni wanaad̯amu na pfepfo mufaano wa hapfaḍe pfantu pfenye, ela kanjia mbinguni kwenye. Na hukuḍe, kenda kasumama usoni kwa Muungu kwa dzambo ḍyehu.

²⁵Jeje kadziyavya mvuugiya mweedha mumodza t̯u, si dza huyu Mukohani Mukuu eyenanjia hapfa pfantu pfadheru pfa mwiso kula mwaka, akinjia na mwazi wa waḍondo.

²⁶T̯ambere si hivyo, Kirist̯o andeewa kwamba kafwa myeedha minji na minji hangu kuumbwa kwa lumwengu. Ela hivi adziyevyo, kadza mweedha mumodza t̯u hizi hizi ngera za nsiku za mwiso hwizokuishini, apate kuhunwiiya nabvise zehu kwa kudziyavya jeje mwenye dza mvuugiya.

²⁷Mwanaad̯amu korejwa kufwa mweedha mumodza t̯u, kisa adzeasumame hukumuni.

²⁸Kirist̯o nae kayavigwa dza mvuugiya mweedha mumodza t̯u, ya kunuya nabvise za wenji. Kadzakudza mweedha wa pfii kuwapfonya hawaḍe weokuyoweeyani kudzakwe, nkakwakudza kawii kutsukuya nabvise za wantu.