Read pokomo Yakobo 1 Bible Online

Yakobo 1 - pokomo bible

Yakobo 1

¹Mimi Yakobo, niiye muhumisi jwa Muungu na jwa Ḅwana Yesu *Kirist̯o, nyakumworeani nywinywi wahikiza mwiwo wa vyeet̯i kumi na viwii vya Wayahud̯i mut̯amisaiyeo nsi garagara. Nyonse nimukedhya nto! Ntamu untu?

²Wandugu zangu, mwipfonapatwa ni maḍemo ya kula namuna, nywinywi tsekeani t̯u,

³koro ni mumanye ya kwamba, kupimigwa kwa hi faro yenu kunamukumiiza myojo, na munagija kumuserefat̯a Muungu.

⁴Nywinywi ni mugije kuit̯isa hat̯a mwiso, mupate kukuya, mungore na mukamilike kwa kula njia, mutsepfungukijwa ni kiḍechonse.

⁵Muntu akitsowa mvidhyo ya kumanya namuna ya Muungu evyonatsaka huishi, namuyombe Muungu, nae anaimumpa. Koro Muungu akwakumumpani muntu kintu, anakimumpa na mojo mumodza, wala nkawezi kumuajaisa.

⁶Ela muntu akwakuyombani, ni had̯i amuserefat̯e Muungu, ni kutsaawa na umbiimbii. Maanaye, muntu eye na umbiimbii ni dza wimbi ḍya ḅahari ḍiḍyonabigwa ni mpepfo ḍikapfiikwa huku na huku.

⁷D̯ubva muntu dzae, natset̯ara ya kwamba anaweza kupata kintu kuyawa kwa Ḅwana.

⁸Muntu jwa umbiimbii meshi ni muntu asiye musumamo.

⁹Huyuḍe muhikiza eye masikini, natsekeye kwamba Muungu kamukuzya.

¹⁰Ela muntu jabva, namanye kwamba Muungu kadzamususya nsii. Maanaye, dza hiviḍe vya kiyuwa chivyonawaa kisa kikaharachaa, ndivyo vya muntu jabva adzevyokaa kisa atsekudzaonekana kawii.

¹¹Dzuwa ḍipfonawaa kali, ḍinaibiga mimea hat̯a kiyuwa kikaharachaa kisa nayo ikafwa, na remboḍye ḍikaara kaḅisa! Hat̯a kwa muntu jabva vinawa dzevyo. Jeje anawa kakuchiiyani-chiiyani shuulize na kufwa kunamudzia.

¹²Heri muntu eyenapatwa ni maḍemo na akait̯isa! Koro akiit̯isa hat̯a akiyashinda, Muungu anamumpa t̯ubvo ḍya maisha ya kuunga na yuungo. Hiḍi ni t̯ubvo ḍya Muungu aahid̯iyeḍyo kuḍiwapfa hawaḍe wonse wamutsakiyeo.

¹³Muntu akipatwa ni maḍemo, natsekwamba Muungu ndiye eyekumuḍemani. Koro Muungu nkawezi kuḍemegwa anjie kuhendani mazuka, na wala nae nkawezi kumuḍema muntu amungize kuhendani mazuka.

¹⁴Ela muntu anaḍemegwa ni t̯amaa zakwe jeje mwenye! Zinamukulakula, zikamuhendeza atsake kuhenda mazuka.

¹⁵Muntu akisakumiha t̯amaa nzuka, hizi t̯amaa zinavyaa nabvise. Na hi nabvise ikikuya hat̯a ikyenda ikingora, inavyaa kufwa.

¹⁶Wandugu zangu watsakwa, namutsekulika-kulika hat̯a!

¹⁷Kula chicho chema na kisicho kapet̯a kinayawa kwa Muungu, aumbiye hiḍi dzuwa, mwezi na nyoha. Ela Muungu jeje nkakwaa dza hiḍi dzuwa, mwezi na nyoha, vivyonaperuka-peruka. Na wala nkakwaa dza vivwii vivyonaperuka-peruka!

¹⁸Kwa miroye mwenye, kahupfa kuvyajwa upfya kuchiiya na kwa hichi chuuwoche cha hachi. Kahenda hivi ili kwamba, kahi ya vyonse aumbiyevyo, swiswi huwe ndiswi viumbe vya maana vya mwiso kwakwe.

¹⁹D̯ubva wandugu zangu watsakwa, kula mumodza jwenu nawe mupesi jwa kusikiiya, ela natseewa muharaka jwa kut̯amuka ambu jwa kudzirejea ḅasi ḅasi.

²⁰Koro muntu akireja, nkawezi kuhenda yeyo ya hachi usoni kwa Muungu.

²¹Ndookomu nanywi, dzyapfuseni na kula aina ya hendo zuka na mambo yasiyokuwa mema. Ipfokeyeni na umpowe hi mbeju ya chuuwo cha Muungu ihodzejweyo myojoni mwenu. Koro ndicho chuuwo chichonaweza kumupfonya.

²²Mukiwa wantu wa kusikiiya chuuwo cha Muungu na kuchiyatsia pfapfo, mwakudzikulanikulani wenye. Ni muwe wantu wa kusikiiya chuuwo cha Muungu na kuhenda chivyokunenani.

²³Koro muntu eyenasikiiya chuuwo cha Muungu na kutsahenda chivyokunenani, ni sawa na muntu eyenadziyowa kiyooni akaona namuna akaiyevyo,

²⁴kisa iyo saa akinuka na hapfo akaarerwa kwamba ewa kakaadze.

²⁵Ela muntu akigija kuyauḅa haya mayongweezo yeyo mema na yeyonahuweka huru, na akitsakwaarerwa kuhenda hivi vya hichi chuuwo chivyonamwambia, Muungu anamuvodhya.

²⁶Muntu akwakudzihwaani kwamba jeje ni muntu muchuuwo na huku nkawezi kut̯unza jwiimijwe, huyo kakudzikulanikulani mwenye, na kuwa muntu muchuuwo kwakwe, ntaku maana yaḍeyonse.

²⁷Muntu jwa Muungu Baba jwehu eyenamuhwaa kuwa muntu muchuuwo jwa ḍugha na asiye t̯amba, ni huyuḍe eyenat̯unza wake wachiwa na wana wachiwa weo na d̯ina, na kudzit̯unza mwenye atsedzinanga kwa kuhenda mazuka ya wantu wa huju huju lumwengu.