Read pokomo Yakobo 3 Bible Online

Yakobo 3 - pokomo bible

Yakobo 3

¹Wandugu zanguni, si kula muntu kwamba atsake kuwa mwaalimu jwa tsanganiko hat̯a! Koro dza mumanyiyevyo, swiswi waalimu, Muungu kadzahuhukumu vyumuni kuchia wantu wangine[1] kwa hayaḍe mazuka hwiyonahenda.

²Gula ni ḍugha, kwamba wantu wonse hunakaa hukahenda matsowa kut̯wa, ela hawaḍe weonaweza kuzit̯unza hizi nyiimi zao, wao wangora na wanaweza kudzimiza kwa kula hali.

³Kwa mufaano, ukitsaka kuḍihendeza farasi ḍikut̯ii, unaḍifunga mfunaura na ndookomu unaweza kuḍipfiika kuḍekwonse wikonatsaka.

⁴Hat̯a mashuwa nayo, na ukuuwe wonse, na kupfiikwa ni mpepfo nkali kwakwe, inaweza kuperujwa na kasukani kachuuchu na yende kuḍekwonse kwa huyu nahudha ekonatsaka yende.

⁵Huju jwiimi najo, ni kiungo kiḍoḍo muno cha hu mwii, ela junahenda mambo makuu na makuu. Hat̯a nsetse modza t̯u ya moho inaweza kugiza moho bad̯a nzima!

⁶Jwiimi najo jwaa dza moho. Judzaa kula aina ya mazuka yeyonaweza kunanga maisha ya muntu mazima! Junagiza moho maisha ya muntu, jukayananga dza kwamba jugizwa moho usiwozimika dza huḍe wa *Jehanamu.

⁷Benaad̯amu hangu kae wekit̯awala viumbe vyonse, na mumpaka saambi wakut̯awalani waḍondo wa bad̯ani, weonaguuka, weonahambaa na wa madzini.

⁸Ela ntaku awezeye kujut̯awala jwiimijwe. Hu jwiimi ni yuzuka, ntajugijike. Juna hat̯ari dza sumu nkali.

⁹Kwa jujo jwiimi yumodza hunamushad̯a Ḅwana Muungu, eye Baba jwehu. Na kwa jujo jwiimi hunawaḍuwa wanaad̯amu wenzehu waumbijweo dzaswi kwa mufaano wa Muungu.

¹⁰Kako kanwa kamodza kanaḍuwa na kako kanwa kakamushad̯a Muungu. Wandugu zanguni, sivyo!

¹¹Ni tsana ga ya mutsangani kuzimu, iyonakakanyika madzi mema na kukakanyika madzi yeyonatsama viwi na pfapfo pfantu pfamodza?

¹²Wandugu zanguni, ni muhi ga wa mutini wiwonaweza kuvyaa matunda ya mizeituni? Ni muhi ga wa muzabibu wiwonaweza kuvyaa matunda ya mutini? Ambu, ni tsana ga ya mutsangani kuzimu, iyonakakanyika madzi ya munyu, na iyo tsana modza ikakakanyika na madzi mema?

¹³Kukiwa yuḍejwonse kahi yenu, eye na mvidhyo na uimufu wa njia za Muungu, naviyange na t̯aḅiaye kwamba anakaa akiishi dza muntu mumpowe na eye na mvidhyo.

¹⁴Ela humu myojoni mukiwa na wivu mwinji na t̯amaa ya kudzikuzya nywinywi ḅasi, namutsedziona mwambe muna mvidhyo, na hali huku mwakuikanani hi hachi ya Muungu.

¹⁵Mvidhyo dzayo ntaiyawe kwa Muungu na wala si ya kiruhu, ni mvidhyo ya kilumwengu iyonayawa kwa Shaat̯ani.

¹⁶Koro pfaḍepfonse pfepfonawa na wivu na t̯amaa ya kudzikuzya, kunawa kutsaimukana na kula aina ya dzambo zuka.

¹⁷Ela hi mvidhyo iyonayawa kwa Muungu, nguzi d̯ura inamumpa muntu kuishi maisha yasiyo t̯amba zuka ḍiḍeḍyonse. Kisa, inamumpa kutsaka kuishi na wantu na naghea, inamumpa kut̯aria wenziwe na inamumpa mojo wa kusikiiya na kuhwaa vyuuwo vya wangine. Mvidhyo ya Muungu inamumpa muntu kufwia t̯ei wenziwe na kuwahendea mema kut̯wa, na nkawezi kuwa na uḅaguzi wala umbiimbii.

¹⁸Na hawaḍe wantu watsakiyeo kuishi na wantu na naghea, wanahodza mbeju ya naghea kahi ya wantu, na wechonavuna ni wema wiwonamutsakiza Muungu.