Read pokomo Yakobo 5 Bible Online

Yakobo 5 - pokomo bible

Yakobo 5

¹Sikiani, nywinywi wantu majabva! Ḍabvani kuiya chiiyo cha mabaanano koro mwakudzijwani ni d̯ina nkuu muno.

²Malit̯e yenu yonse yamawowa tswee na nkanzu zenu ziḍigwa ni mafunzi.

³Dhahaḅu na fwedha zenu zihenda nkanga. Na hiyo hiyo nkanga idzakaa dza ushaahiḍi wa nabvise zenu nsiku ya hukumu. Nanywi mudzanangwa-nangwa dza kwamba munangwa-nangwa ni moho. Nywinywi munadziundukizia mali menji na menji, ntamudzi kwamba azi ni nsiku za mwiso?

⁴Haya, t̯ayowani sasa! Wantu wamuvunia makonde yenu, anywi mukidzamukinuka, muwakulakula ntamukuwaipfa. T̯asikiani hiyo nabvise ikwakumusit̯akini kwa Muungu! Chiiyo cha hao wahenda kazi kimufikia Ḅwana, mwenye nguvu zonse.

⁵Muishi na raha humu lumwenguni, mukidzitsekeza na kula mwichomukitsaka. Mudzit̯oseza hi myojo yenu, na sasa mwakuindiiyani nsiku ya kudzahukumigwa.

⁶Muwahukumu na kuwayaga wantu wasio tsowa ḍiḍeḍyonse, wasioweza hat̯a kudzihehea usoni yenu.

⁷Wandugu zanguni, nywinywi it̯isani huku mukwakuyoweeyani kudza yupfii kwa Ḅwana. T̯ayowani namuna ya wantu weonaima wevyonait̯isa mumpaka wakavuna makonde yao. Wao wanait̯isa mumpaka hi mvuya ya kuivyaza hi mimea ikanya, na wakapata bvaro.

⁸Nanywi pia, namutseefwa mojo, it̯isani, koro nsiku ya kuuja kwa Ḅwana ntaikwaa kuye.

⁹Wandugu zangu, namutsekaiya kuwawakiana nywinywi na nywinywi mutsekudzahukumigwa. Manyani, huyu Muhukumu Mukuu kamaawa hafufi kudza!

¹⁰Yowani mufaano wa hawa manabii weowakikaa na kuyavya maagu ya Muungu eyoakiwapfa. Wao wakuntiswa d̯ina amoo wait̯isa.

¹¹Hwonse, wantu wait̯isiyeo hunawahwaa kwamba ni wavodhyegwa. Na nywinywi wenye musikia namuna ya Ayubi ait̯isiyevyo mad̯inani na mumanya hayaḍe ya Muungu adzeyoakimuhendea mwisoni. Hakika Muungu ni Muungu mut̯ei na munanso.

¹²Ela zaid̯i ya vyonse wandugu zangu, mukwakunenani namutseyapfa kwa sari ḍya Muungu, kwa kulamba mutsanga ambu kwa njia ingine iḍeyonse. Mukyamba, “Ndivyo,” naiwe ndivyo, na mukyamba, “Sivyo,” naiwe sivyo, ili mutsekudzahukumigwa.

¹³Ikiwa kwamba kahi yenu kuna yuḍejwonse eye d̯inani, namuyombe Muungu. Na ikiwa kwamba kuna yuḍejwonse eye na tsekea, namushad̯e Muungu na meya.

¹⁴Yuḍejwonse kahi yenu akiwa mujwazi, nawahane wazee wa tsanganiko, wadzewamuyombeye na kumupfakaza mafuha[3] kwa sari ḍya Ḅwana.

¹⁵Na hayo mayombo, wakiyayomba wakiwa na serefano kwa Muungu, yanamupfoza huyu mujwazi na anapata matsea. Na hat̯a ikiwa kwamba kahenda nabvise, Ḅwana anamuyatsiya.

¹⁶D̯ubva, nywinywi namutsefitsa kwambiana nabvise zenu na namutseyatsa kuyombeana ili Muungu apate kumupfoza. Mayombo ya muntu muhachi yana nguvu na yanahenda mambo makuu.

¹⁷Kwa mufaano, *nabii Eliya ewa ni mwanaad̯amu dzaswi, ela kamuyomba Muungu na mojo, kutseenya mvuya nsi yonse ya Isiraeli. Na hakika, ntakukunya mvuya kwa myaka mihahu na nusu.

¹⁸Kisa kamuyomba Muungu anyese mvuya, nayo ikakanyika kuyawa dzuu, na nsi yonse ishauka mimea.

¹⁹Wandugu zanguni, mumodza jwenu akyaara njia, akiiyatsa hi njia ya hachi, kisa yungine adzeamuudzye njiani,

²⁰ḅasi huyu amuudziye njiani namanye kwamba, kula amuudziye njiani munabvise kamupfonya na kufwa. Na anamuhendeza Muungu atsemut̯alia nabvise huyu muntu munabvise.