Read pokomo 1 Pet̯ero 1 Bible Online

1 Pet̯ero 1 - pokomo bible

1 Pet̯ero 1

¹Mimi Pet̯ero niiye *ntumi jwa Yesu *Kirist̯o, nyakumworeani nywinywi wantu wonse wa Muungu mwiwokukaani nsi garagara za ugenini, za Ponto, Galatia, Kapadokia, Asia na Bitinia.

²Muungu Baba jwehu kamutsana hangu kae, na mut̯engwa ni Ruhu jwakwe. Nanywi mumut̯ii Yesu Kirist̯o nae kamudheresa na mwaziwe. Muungu namuvodhye na kumumpa nagheaye kwa winji.

³Nahumuyavizeni ḍuḍa Muungu, eye Baba jwa Ḅwana jwehu Yesu Kirist̯o; koro kahufwiya t̯ei muno, hat̯a kahupfa maisha mapfya. Kwa dzambo ḍya kwamba kamufufuya Yesu Kirist̯o kuyawa kwa wafu, kahupfa madzikwat̯yo makuu.

⁴Ndookomu hwakuindiiyani kupfokea hizi mvoni za Muungu aziwawekeeyezo wantuwe. Kazihuwekea mbinguni, pfantu zisipfowowa, wala kunangika, nolawe kujara.

⁵Kwa dzambo ḍya kumuserefat̯a kwenu, Muungu kakumwamiani na uwezowe, hat̯a saa kudzepfokudza hu mupfonyo wiwo hafufi kuyanganywa kwenu ngera za mwiso.

⁶Kwa dzambo ḍyevihivi, tsekeani muno ingawa hi saasambi ni had̯i mupatwe ni kula namuna ya maḍemo kwa muḍa.

⁷Haya maḍemo yadza t̯u, kuzipima hizi faro zenu kuyanga kwamba mumuserefat̯a Muungu ḍugha. Dza vya dhahaḅu ivyonapimwa na kudhereswa na moho, ndivyo vya faro zenu zivyokupimwani na kudhereswa, kuchiiya na kwa haya maḍemo. Na faro zenu kwa Muungu zina thamani kuchia dhahaḅu ambayo nsiku modza idzanangwa. Ndookomu ikiwa kwamba faro zenu zionegwa kwamba ni karit̯u, mudzapata shad̯u, marembo na hila nkuu, nsiku ya Yesu Kirist̯o adzeyokudza.

⁸Ingawa ntamukumuona Yesu na matso, mumutsaka. Na ingawa hi hii saasambi ntamukwakumuonani, mumuhikiza. Mwakutsekeani na tsaiko kuu muno, ḍisiḍyoweza hat̯a kuneneka,

⁹koro mwakupfokeani t̯ubvo ḍya kuhikiza kwenu kwa kupata mupfonyo wenu.

¹⁰Dzuu yohuu mupfonyo, hawa manabii wat̯aḅiriyeo dzuu ya hi t̯ei ya Muungu idzeyokudza kwenu,

¹¹walacha na kut̯apakura na hiḍu dzuu ya hiḍi hiḍi dzambo. Walacha kumanya kwamba ni muntu ga ambu ni ngera ga, za ayu Ruhu jwa Kirist̯o ezoakinena, epfoakiwamba wat̯aḅiri dzuu ya d̯ina adzezokunta Kirist̯o, na maremboni adzemonjia ḅaad̯aye.

¹²Muungu kawapfenuiya hawa manabii kwamba haya haya mambo ntayakwakuhendeka ngera zao, ela yadzahendeka ngera zenu. Na sasa, haya *Maagu Mema yesakusumwiijwa kwenu ni wantu wayongowejweo ni Ruhu Mudheru asusijwe na yuwinguni. Haya ni mambo ambayo kwamba hat̯a malaika wakuyakamiani wayamanye.

¹³D̯ubva pfenuyani matso muyat̯ariye haya haya urembo, na madzikwat̯yo yenu yonse yawe kwa hi t̯ei mudzeyofwijwa ni Yesu Kirist̯o, adzepfokudza.

¹⁴Wani wana wat̯iifu kwa Muungu. Na mahendo yenu nayatset̯awaligwa ni hiziḍe t̯amaa mwizokuwa nazo musidzaimanya hi hachi.

¹⁵Ishinu nanywi, wani wadheru kwa kula njia dza hiviḍe vya huyu amuhaniye aivyo mudheru.

¹⁶Koro haya matsoro yamba, “Wani wadheru kwa kwamba mimi ni mudheru.”

¹⁷Muungu anahukumu kula muntu kuuḅana na mahendoye pfasipfo kumuhendea kind̯eḍi. D̯ubva ikiwa kwamba Muungu munakaa na kumuhana Baba, ḅasi ni had̯i hapfa lumwenguni mwipfokukaani dza wageni, muishi kwa kumuhila.

¹⁸Mumanya kwamba muipfijwa rando mupate kuwa huru kuyawana na haya mambo yasiyo maana muyaḍaliyeyo kuyawa kwa wabibi zenu. Ntamukugujwa na vija vivyonanangika dza fwedha ambu dhahaḅu,

¹⁹ela mugujwa na mwazi wa thamani wa Kirist̯o, wiwo dza mwazi wa mvuugiya ya mwanambuzi asiye na kapet̯a wala t̯amba.

²⁰Eetsanwa ni Muungu hangu kae, kaḅila kuumbwa kwa lumwengu, ela kayanganywa hizi hizi ngera za mwiso kwa dzambo ḍyenu.

²¹Na kuchiiya na kwa Kirist̯o, mumuserefat̯a Muungu. Jeje ndiye amufufwiiye Kirist̯o kuyawa kwa wafu akimumpa marembo, ili nanywi muwe na faro na madzikwat̯yo kwa Muungu.

²²Na sasa, kwa dzambo muit̯ii hi hachi, mudhereswa kuyawana na nabvise zenu, na muwatsaka na mojo hawa wahikiza wenzenu. D̯ubva tsakanani na mojo ḍugha,

²³koro mumaavyajwa yupfii, kuchiiya na kwa chuuwo cha Muungu, chichonapfa wantu maisha ya kuunga na yuungo. Huku kuvyajwa kwenu yupfii si kuvyajwa kimwii ni benaad̯amu hat̯a, ela ni kuvyajwa kiruhu kuchiiya na kwa chuuwo cha Muungu chichonakaa maishi.

²⁴Dza vya matsoro yaneneyevyo yakyamba, “Wanaad̯amu wonse waa dza mani, na rembo ḍyao ḍyonse ḍyaa dza kiyuwa. Mani yananyuuka, na kiyuwa kinaharachaa,

²⁵Ela chuuwo cha Muungu kinakaa maishi.” Na hichi ndicho chuuwo kisumwiijwecho kwenu.