Read pokomo 1 Pet̯ero 3 Bible Online

1 Pet̯ero 3 - pokomo bible

1 Pet̯ero 3

¹Dza vivyo, nywinywi wake, ni had̯i mudziweke nsii ya mamulaka ya wayume wenu, hat̯a ikiwa kwamba wangine wao si wahikiza wa chuuwo cha Muungu. Koro wakiona namuna mwiivyo kukaani nao na hila na kuwahendea mahendo mema, wananuhika kuwa wahikiza, hat̯a pfasipfo nywinywi kuwambukuya chuuwo.

³Namutsekaiya kudzirembosa hi mii yenu kwa kusuka nywii, na kuvwaa nguo nyema nyema ambu kudzifayat̯a na vija vya dhahaḅu.

⁴Ela rembo ḍyenu naḍiwe kuzimu ya myojo yenu. Naḍiwe rembo ḍisiḍyosia, ḍya myojo mimpowe na iingamaiyeyo, iyo ya thamani nkuu usoni kwa Muungu.

⁵Koro hawa wake wadheru wa kae wadzimukwat̯iyeo Muungu, wekidzirembosa kwa kuwat̯ii woome zao.

⁶Hat̯a Sara ewa dzevihivi. Kamuhila Iburahimu hat̯a ekimuhana “Ḅwana jwangu.” Nanywi yeo, ikiwa kwamba muhenda hachi pfasipfo kushooga kiḍechonse, munawa dzae.

⁷Nywinywi wayume nanywi, ikaani na umpowe na wakazenu, mukimanya kwamba wake ni viumbe vidhaifu. Wahileni, koro hi t̯ola ya Muungu ya maisha ya kuunga na yuungo, wanaipfokea pfamodza nanywi. Mukikaa nao dza hivi, ntakuwe na kiḍechonse cha kut̯iidhya mayombo yenu kusikijwa.[1]

⁸Mwiso nyakumwambiani nywinywi nyonse mwiwo Wakirist̯o, ikaiyanani urembo, mukifwiyana t̯ei na kutsakana dza ndugu. Wani wampowe kahi yenu nywinywi na nywinywi.

⁹Muntu akikuhendea dzambo zuka, simugalichizie dzambo zuka. Akikutsola, simugalichizie kitsolo; ishinu muvodhye, koro ndivyo vya Muungu evyonatsaka. Mukihenda hivi, Muungu anamuvodhya.

¹⁰Dza vya matsoro yaneneyevyo yakyamba, “Yuḍejwonse atsakiye kuḍya raha wa maisha, na kuishi maisha ya tsekea, ni had̯i adzikanye kunena mazuka, na ayatse kunena nsuwe.

¹¹Ni had̯i ayatse kuhenda mazuka na ahende mambo mema. Ni had̯i alache naghea na ailache na hiḍu.

¹²Koro matso ya Ḅwana yanawaona hawaḍe weo wadheru, na masikiyoye yanasikia mayombo yao. Ela weonahenda mazuka jeje anat̯aragiana nao.”

¹³D̯ubva, ikiwa kwamba meshi munakamia kuhenda mema, ni ga jwa kumudhuru?

¹⁴Kenge hat̯a ikiwa kwamba mukuntiswa d̯ina kwa dzambo ḍya kuhenda mema, tsekeani muno! Namutseshooga kiḍechonse, nolawe kuhangaika myojoni mwenu.

¹⁵Ishinu muhileni *Kirist̯o koro ndiye huyu Ḅwana jwenu. Saa zonse wani t̯ayari kumusumwiiya muntu yuḍejwonse adzeemuuza dzuu ya haya madzikwat̯yo yenu mwiyonayo.

¹⁶Ela viwambieni na umpowe na kwa njia ya hila. Ni had̯i mukimanya mwichokuhendani ili kwamba kwa dzambo ḍya t̯aḅia zenu nyema za Kikirist̯o, muwagize yutswa hawaḍe weonamunenea mazuka.

¹⁷Koro ikiwa kwamba ni miro ya Muungu kwamba mukunte d̯ina, d̯ubva ni heri kukunta d̯ina kwa dzambo ḍya kuhenda mema, kuliko kukunta d̯ina kwa dzambo ḍya kuhenda mazuka.

¹⁸Koro Kirist̯o mwenye, kafwa mweedha mumodza t̯u kwa dzambo ḍya wanabvise. Jeje eye muhachi kafwa kwa dzambo ḍya wantu wasikwaa wahachi. Kahenda hivi ili aweze kumuyeha kwa Muungu. Wamuyaga hu mwii, ela kafufuka, na ruhuye yaa mojo.

¹⁹Na kwa umboḍye ḍya kiruhu, kenda kazilalabvia ruhu zifungijwezo gerenzani.

²⁰Hizi ziwa ni ruhu za hawaḍe wadziziyeo kumut̯ii Muungu hangu kae, ngera za Nuhu. Nuhu epfoakielekanya hi safina,[2] Muungu kawaindiiya muno wapfyehuze mama wapfone. Ela wantu wanjiiyeo humu safinani wewa ni wanane t̯u, nao ndiwo wapfoneyeo na hi zuruwa.

²¹Haya madzi ye zuruwa yayanga mufaano wa kut̯opyegwa kwenu kwa hizi hizi ngera. Kut̯opyegwa si kudheresa nongo ḍya mwii hat̯a; ela ni hukuḍe kuahid̯i na mojo mumodza kudziyavya kwa Muungu. Huku kut̯opyegwa kunamupfonya kuchiiya na kufufuka kwa Yesu Kirist̯o.

²²Kirist̯o kenda mbinguni na kakaa mukono kuyume wa hila wa Muungu. Ana mamulaka dzuu ya malaika wonse na nguvu zonse za kiruhu zizo yuwinguni.