Read pokomo 1 Pet̯ero 5 Bible Online

1 Pet̯ero 5 - pokomo bible

1 Pet̯ero 5

¹D̯ubva nyakumuusiani nywinywi wazee wa matsanganiko, nikimufunda dza muzee mwenzenu, na ninkiwa dza shaahiḍi jwa mad̯ina ya *Kirist̯o akuntiyeyo. Na kawii nyakumuusiani ninkiwa dza mumodza jwa hawaḍe wakupfokea haya marembo ya Ḅwana yadzeyoyanganywa ngera adzeyokudza.

²Wani wat̯ikisa wa hu mwona wa Muungu auyatsiyeo mikononi mwenu. Namutseut̯ikisa dza kwamba mwakusharut̯iswani, ela ut̯ikiseni na hiari yenu, dza vya Muungu evyonatsaka. Hi kazi yenu namutseihenda kwa dzambo ḍya kupata fwedha, ela ihendeni na mojo kindindi wa kutsaka kuhumika.

³Namutsedzihendeza wakuu kwa hawaḍe weo nsii yenu, kenge uyangeni hu mwona mufaano mwema wa maisha ya Kikirist̯o.

⁴Makisa ngera ya huyu Mut̯ikisa Mukuu adzeyokudza, munapfegwa t̯ubvo ḍya d̯aha ḍisiḍyonangika maishi.

⁵Nanywi wayume waḍoḍo ni had̯i muwat̯ii hawa wazee wenu. Na nyonse ni had̯i muwe wampowe, mukihumikiana nywinywi na nywinywi. Koro matsoro yamba, “Muungu anawafwia t̯ei hawaḍe weo wampowe, ela wavikodzo anat̯aragiana nao.”

⁶D̯ubva wani wampowe mukidziweka nsii ya mamulaka ya Muungu, ili kwamba ngeraye ikifika, nae anamukuzya.

⁷Na mirumiru zenu zonse zimuyatsieni jeje, koro ndiye eyenamumuud̯amia.

⁸Pfyenuyani matso na muchimize! Koro huyu nyabva jwenu, Shaat̯ani, kakuzingani dza nsimba eyekuvumiizani, akilacha muntu jwa kumuḍya.

⁹D̯ubva zigijeni faro zenu muno, na mut̯aragiane nae; mukimanya ya kwamba hat̯a hawa wahikiza wenzenu wa lumwengu yuzima, nao wakukuntanani nezihizi d̯ina mwizokukuntani nywinywi.

¹⁰Muungu kamufwiya t̯ei kuchiiya na kwa Kirist̯o na kamuhana munjie maremboni mwakwe mudzemokaa maishi. Mukisa kukunta d̯ina kwa kat̯emo kachuchu, kadzamuhwaa na kumumbaka kipfya, kadzamut̯aragisa na kumukomeza faroni, na kumungiza nguvu kawii.

¹¹Muungu ndiye mwenye uwezo wonse, sasa na hat̯a pfasipfosia. Amina.

¹²Nyakumworeani hi hii ḅaruwa mfufi kwa ugijo wa Sila,[3] nimuserefat̯ie dza ndugu. Nyakumworeani kumungiza mojo na nikishuhuḍia kwamba haya ndiyo matsako ya ḍugha ya Muungu. D̯ubva yagijeni na nguvu.

¹³Pfokeani kedhya kuyawa kwa imbu ḍyenu, tsanganiko ḍya Babeli,[4] ḍitsanijweḍyo ni Muungu dzanywi. Marko eye muurani wangu jwa kiruhu nae pia kamukedhya nto.

¹⁴Kedhyanani na matsako ya Kikirist̯o. Naghea gulufu naiwe kwenu nyonse mumuhikiziyeo Kirist̯o.