Read pokomo 2 Yohana 1 Bible Online

2 Yohana 1 - pokomo bible

2 Yohana 1

¹Mimi muzee, nyakukworeani wewe muke utsanijwee ni Muungu. Nyakukworeani wewe na wanao nimutsakiyeo muno.[1] Simi t̯u nimutsakiyee, ela hat̯a na hawaḍe wonse waimanyiyeo hi hachi. Wamutsaka

²kwa dzambo ḍya kwamba hi hachi yaa kuzimuni mwehu na inawa naswi maishi.

³Muungu Baba, na Yesu *Kirist̯o, Mwana jwa huyu Baba, nawahuvodhye nto, wahufwiye t̯ei na kuhupfa maisha ya naghea. Na wanavihupfa ikiwa kwamba hukaa hachini na matsakoni.

⁴Ami niwa na tsekea hii, nipfokudza nikiwaona wangine wa hawa wanao wakuishini hachini, dza viviḍe vya Baba ahuamuriyevyo!

⁵D̯ubva wewe muke utsakijwe, nichokukworeani kukuyomba, ni kwamba hutsakane swiswi na swiswi. Hi hii amuri si amuri ngeni hat̯a, ni iiḍe amuri hwiyokuwa nayo hangu ḍabvu.

⁶Haya matsako niyokunenani ni kwamba, ni had̯i huzigije hizi amuri za Muungu. Na dza musikiiyevyo hangu ḍabvu, hi amuri yakwe ni hii ya kwamba, muishi maisha ya matsako.

⁷Humu lumwenguni kuhika waalimu wenji na wenji weo na makulekule. Hawa ni wantu weokudzizani kuhikiza ya kwamba Yesu *Kirist̯o kadza dza mwanaad̯amu. Wantu dzao ni wapfinga Kirist̯o na ni wantu weonakulakula.

⁸D̯ubva dzit̯unzeni, ili kazi zenu muhendeyezo zitsekudzadziaria ḅasi, ela mudzemupate maipfo yenu mazima!

⁹Yuḍejwonse eyenayawa nze ya mayongweezo ya Kirist̯o, akavuka mimpaka, huyo nka haria na Muungu. Ela yuḍejwonse eyenakaa kuzimuni mwa haya mayongweezo, ana haria na huyu Baba na huyu Mwana.

¹⁰D̯ubva muntu yuḍejwonse akimudzia, na akitsamudzia na haya haya mayongweezo, namutsemukaraḅisha nyumbani kwenu. Na hat̯a kumukedhya, namutsemukedhya!

¹¹Koro yuḍejwonse amukaraḅishiye muntu dzae nyumbani mwakwe, kakugijanani nae kuhenda haya mazukaye.

¹²Nina menji na menji ya kukwambia, ela sikitsaka kuyakworea yonse humu ḅaruwani. Nyakuyoweeyani ya kwamba nakut̯embeeya, ninene nawe kanwa na kanwa, ili hupate kunjijwa ni tsekea t̯ipu.

¹³Hawa wana wa imbuḍyo atsanijwe ni Muungu, nao wakukedhya nto.